زبانحال حضرت لیلا (س)
در شهادت حضرت علی اکبر(ع)
..
..
مرحوم شانی تبریزی
..
..
ای منیم روح روانیم اوغول ایوای علی ایوای
گوزون آچ تازه جوانیم اوغول ایوای علی ایوای
..
..
سن گیدندن اورگیم لحظه ای آرام دگلدی
وحشی آهو کیمی روحیم بدنه رام دگلدی
هیچ گمانیم بیله ای جان و دل آرام دگلدی
بوئیدی هاردا گمانیم اوغول ایوای علی ایوای
..
..
ای عزیز دل لیلا آناوین عزّتی سنسن
گوزیمون نور ضیاسی دیزیمون قوّتی سنسن
قلبیمون صبر و قراری اورگیم طاقتی سنسن
یوخ داخی دلده توانیم اوغول ایوای علی ایوای
..
..
فکر ایدردیم سنیله خاطریمی شاد ایدرم من
باخارام قدّیوه گویلوم ایوین آباد ایدرم من
بزیوب حجلۀ عیشون سنی داماد ایدرم من
قالی دنیاده نشانیم اوغول ایوای علی ایوای
..
..
شه جنازون گتورنده چخماقا دیشره اوتاندیم
الیمی قویدوم اورک باشنه بیر قدر دایاندیم
سس اوجالدی بو خانم عمّه لرون حالنه یاندیم
ممکن اولمادی دایانیم اوغول ایوای علی ایوای
..
..
او قدر یاره دگوب جسمیوه گلمز سانا نیلوم
گر بو حالون سنون ایستکلی سکینه قانا نیلوم
گورسه بو حالده اوغلون دوزر هانسی آنا نیلوم
دیمیوم تازه جوانیم اوغول ایوای علی ایوای
..
..
خرمن حسنده زلفون پوزولان سنبله بنزر
عارضون باد خزانیله سولان بیر گله بنزر
گلی سولموش آنان افسرده اولان بلبله بنزر
یتدی هنگام خزانیم اوغول ایوای علی ایوای
..
..
نجه گلبرگی یارا خار یاروب جسموی اوخلار
نجه بلبل اولی دلزار باجون ایله سیزیلدار
نجه عمّه ن سنی اوخشار گور آناندا ایله آغلار
که اولوب ورد زبانیم اوغول ایوای علی ایوای
..
..
کاش بو گون سن ئولنجه من ئولیدیم على اکبر
نوجوان اوغلى ئولن بیر آنالار قالماقی نیلر
آند اولا روحوه بو امره رضایم من مضطر
نعشون اوسته چیخا جانیم اوغول ایوای علی ایوای
..
..
بو قدر نیزه قلج اوخ که ووروب جسموه اعدا
آناوین قلبینه ایکاش دگیدی هامی یکجا
بو بدندن کیم آخور قان اورگیم قانیدی گویا
قاریشوب قانیوه قانیم اوغول ایوای علی ایوای
..
..
فکر و ذکریم بوئیدی من بو هوسده بیر آنیدیم
سرو تک قامتوین سایه سینه دالدالانیدیم
ئولمه میش گلمدون آخر باشووا بیر دولانیدیم
قوی دوروم ایمدی دولانیم اوغول ایوای علی ایوای
..
..
آغلارام شام و سحر گلّم اوغول شیونه سنسیز
ایتمرم بیرده نظر سرو گل و گلشنه سنسیز
یوز ویرور بیرده نه لر شامیده بولمم منه سنسیز
اولسا ویرانه مکانیم اوغول ایوای علی ایوای
..
..
ایلدون ای گلعذاریم منی شرمنده وطندن
یثربه دوشسه گذاریم سوروشور فاطمه مندن
یانار اوندا دل زاریم نه دیوم بس اونا سندن
ای امیدیم ای امانیم اوغول ایوای علی ایوای
..
..
نه سونَر نار محبّت نه اولور هجر اودی خاموش
نه گیدر قلبدن حسرت نه اولور غصّه فراموش
نه کفن واردی نه خلعت نه اولور نعش کفن پوش
اوجالور عرشه فغانیم اوغول ایوای علی ایوای
..
..
ای غمی لیلنی مجنون ایلین «شأننی» مفتون
نظمیم استاد «شهابون» ئوزون ائت طبعنی موزون
قافیه طرزی اونوندور اودور استاد سخن چون
بیله خوشگلدی بیانیم اوغول ایوای علی ایوای
..
..
#اکبریه #شانی_تبریزی #اکبریه_شهادت #ترکی #زبدةالاشعار
نظر دهید