شجاعت و شهادت حضرت سیدالشهدا علیه السلام
..
..
مرحوم سعدی زمان
..
..
عراقه شور سالوب بانگ شهریار حجیز
ایدنده دشت بلاده مخالفیله ستیز
..
ایدر رعیته شه ناز اگر محبّ اولالار
ویرر فشار ویرولسه تمرّدیله تمیز
..
حجاز شاهی تمرّد گوروب رعیت دن
اوزین ووروب قشونا الده تیغ قهر آمیز
..
وراردی پر باشی اوستونده طایر نصرت
ایدردی امر همایونیدن ولی پرهیز
..
شکسته دلدن ایدنده نوا و سوز و گداز
ایدردی بادیۀ نینوانی آتش بیز
..
نه قالدى میمنه نه میسره نه قلب وجناح
تراب ذلّته دوشدی سرِ سران عزیز
..
یارا سیزلتیسی، گون ایستیسی، سوسوز ،یالقوز
او حالیله گینه ایلردی جنگ شورانگیز
..
حسین شجاعتی شیر خدا شجاعتنی
عدم یرینده قویوب باغلانوبدی راه گریز
..
تاپانمیوب ملک الموت قبض روحه مجال
دولاندوروردی اجل الده ساغر لبریز
..
عنان مرکبی گاهی چکوب آلوب نفسین
ویرنده قان یارالار گوسترور آتا مهمیز
..
سعادت بشره عالم ترقّیده
ویروبدی روح تدّین او شاه رستاخیز
..
قلج وروب یورولوب قلبینه بیر اوخ ورولوب
قتالی بوشلادی باش ویرماقى قیلوب تجویز
..
دوشوب ترابه خداوند دین امام مبین
ابوتراب چکوب ناله گوزلری خونریز
..
..
نماز صاحبی اقدام ایدوب نماز قیلا
او آخر عمریده خلّاقه کشف راز قیلا
..
..
مقام عشقده عالی بیر امتیاز آلدی
بوغازینون قانینی دوتدی دستماز آلدى
..
او کثرت ایچره ایدوب بزم وحدت اول شه ساز
قویوبدی آنّینی توپراقه باشلیوبدی نماز
..
او قان ایچینده ایدوب مصرعین أمام مبین
تجلّیات جمالیله رشک عرش برین
..
دگوب بیری بیرینه قانلو لبلری او زمان
او عالمه جبروت اهلی قالدیلار حیران
..
او حالیله که سیزیلداردی شاه تشنه جگر
ایدردی هلهله و های هوى قوم کفر
..
هلالدن بو روایت بیله اولوب منقول
دیر امامین او حالی منی ایدوب مشغول
..
او قانلو لبلری گوردوم دگور بیری بیرینه
قشون ورولّا ولی نیزه اوخ قلج یرینه
..
تکلم ایلوری آهسته گوردوم اول شه دین
بیله خیال ایلدیم دشمنی ایدور نفرین
..
دیدیم اگر بو یارالی دل آچسا نفرینه
بلا امان ویره هیهات لشگر کینه
..
یاخونلاشاندا نه گوردوم که گورمسون گوزلر
یواش یواش دیوری العطش او تشنه جگر
..
او بی کسه اوره گیم یاندی ایلدیم شیون
رئیس لشگره گلدیم دیدیم بو مطلبی من
..
امیر بو یارالی قان ایچینده جان ویروری
دگنده گون یارالار چشمه چشمه قان ویروری
..
ولی اوزاقدی بوانصافدن مروّتدن
سو ویرمیه اونا بیر کیمسه بو جماعتدن
..
یارالیدور ئولورى بو یارالی اولما رضا
گون ایستیسینده سوسوز جان ویره بو میرهدا
..
سوزوم امیر حضورینده گیچسه گیچمسه ده
سو ایچسه ده ئوله جاق بو یارالی ایچمسه ده
..
اجازه ویر سو ویروم بیر ایچیم بو تشنه لبه
که عار اولور سوسوز ئولسه قبائل عربه
..
باشین سالوب اشاقا دینمه دی او بی ایمان
اونون سکوتینی بُلدوم رضایته عنوان
..
فراته سرعتیله ایلدیم من عطف عنان
سو دولدوروب اونا بیر جام شوقیله او زمان
..
دیدیم بو گون اوزیمه یاخشی آبرو ویرّم
عزیز فاطمیه جان ویرنده سو ویرّم
..
نگوردوم اوندا که یرلر تزلزله دوشدی
تمام انفس و آفاقه غلغله دوشدی
..
قرا یل اسدی هوا ایله تیره تار اولدی
دوتولدی گون گیجه تک انجم آشکار اولدى
..
گلور نه گوردوم او ساعتده شمر بد اختر
بیر الده دامنی بیر الده قانلو بیر خنجر
..
سپاهه یتماقا ایلور تمام سعی و تلاش
بهار ابری کیمی گوزلری توکور یوزه یاش
..
دولاندیروب منه یوز سویلدی او بدافعال
سوئی هارا آپارورسان بیان ایله هلال
..
دیدیم یارالی حسینه من ایستورم ویرم آب
اونی عطش گورورم ایلیوبدی چوخ بی تاب
..
جواب ویردی که سالما اوزیوی زحمته سن
بو خنجریله سو ویردیم پیمبر اوغلونا من
..
آچوبدی دامنینی اول ستمگر بی دین
نشان ویروبدی منه بیر یارالی باش او لعین
..
دیدیم گلوردی اگر رحمون ای ستم پیشه
امامی ئولدوروب اولدون ندن جری بو ایشه
..
اونا اگر اوره گون یانمادی بو صحراده
کسوب باشینی گتوردون بالالارین داده
..
شهادته یتوروبسن أمام تشنه لبی
بو شدّتیله آخور گوز یاشون ندورسببی
..
دیدی که منده دیمه رحمدن نشان واردور
منی بو حالیله اما بیر آغلادان واردور
..
عذاره گوزیاشیمی توکمورم من اؤز باشیما
بیر آیری قصّه سبب دور منیم بو گوز یاشیما
..
شرار آهیله سنده اوزیوی یاندور یاخ
دولاندیروب گوزیوی بیرجه اول چوخور یره باخ
..
دونوب باخاندا ویروب یوز منه ده بیر رقّت
نگوردوم اوردا اوجا بویلی بیر خانم عورت
..
دوتوب یانا یانا بیر خورداجا قیزین الینی
ایدور سرشگیله خاموش سوزش دلینی
..
ویروبله هر ایکسی اذن گوزده گوز یاشینا
ایدولّه دور او باشسیز جنازه نین باشینا
..
توکور او عورت عذاره سرشک چشم یانور
جنازه نون باشینا حسرتیله گه دولانور
..
او نازنین بدنه حسرتیله گاه باخور
کسوک بوغازدان آخان قانی ساچلارینا یاخور
..
دیور حسین باجون ئولسون بو لشگر عدوان
بو چولده ایلدیلر قانیوه سنی غلطان
..
بوچوخ گراندی منه قلبیمه سالوب چوخ سوز
ایکی سویون آراسندا باشون کسوبله سوسوز
..
بالاجا قیزدا دیور عمه جان دئ بیر منه سن
هارا آپاردی بابامی بو سنگدل دشمن
..
او ظالیمه دئ که گورسون گوزیمده گوز یاشینی
آپارماسون منه ویرسون بابام حسین باشینی
..
اجازه سیل کیمی چشم اشکباره ویروم
یوووم سرشگیله قانین اؤپوم دوباره ویروم
..
«حسینی» بوندان آچوخ یازما بو قضایانی
بو غصه آغلاداجاق حشر اولونجا زهرانی
..
..
#حسینیه #سعدی_زمان #حسینیه_شهادت #حسینیه_شجاعت #ترکی #زبدةالاشعار #کنزالحسینی2
نظر دهید