زبانحال جناب لیلا در وداع حضرت علی اکبر (ع)
.
.
مرحوم عاصی تبریزی
.
.
ای پیمبر تک جمالی مطلع انوار اوغول
گل آنان لیلانی قویما حسرت دیدار اوغول
.
.
یوخ منه سندن صورا بو چولده بیر فریادرس
کیم وئرور آیا اوغولسوزلار سسینه بیرده سس
من دیمم گئتمه گئدورسن بیرجه گل آخر نفس
بیر دولانیم باشووه گوزلور یولون کفّار اوغول
.
.
باخما لیلانی ائدر زهر فراقون تلخ کام
گئت طریق عشقده وور سن بوگون شوقیله گام
باشدان ائیله باشوی بات قانه قیل تحصیل کام
اهل عشقه ائتگلن اوز عشقیوی اظهار اوغول
.
.
دلخوشام قانه بویانسا گر بو زلف چین به چین
گرچه تار زلفووه بیر کم بهادور ملک چین
اولسا ممکن خرمن زلفندن اولّام خوشه چین
بسدی زلفوندن الیمده قالسا گر بیر تار اوغول
.
.
گوندوزوم هر چند اولور سنسیز علی بیر تیره شام
لیک دولسا گل وجودون زخم خنجر له خوشام
خنجر الده قتلووه آماده دور اشرار شام
انتظارون قویما قالسون فرقۀ اشرار اوغول
.
.
بولمورم واردور علی بو گئتماقوندا نه اثر
طایر روحیم او گیسوی پریشان تک اَسَر
ائیلیوب بیر پایه ده عشقون منی شوریده سر
قالمیوب بی کس آناندا طاقت گفتار اوغول
.
.
نه آنایم من سنه بیر عاشقم سن سوگولوم
گلشن عمرومده آخر ای علی سن سن گولوم
گور روادور بیرده سن سیز من بو دنیاده گولوم
آغلارام هجرونده یانّام تا حیاتیم وار اوغول
.
.
سن وجاهت ملکونون بیر باهنر سلطانی سن
فوج حسنونله مسخّر ائتمیسن دنیانی سن
ائیله سن مجنون اگر یوز من کیمی لیلانی سن
حق سنوندور ائیلرم ذی حقلقون اقرار اوغول
.
.
مرغ دلدن هاشمی خالون آلوب صبر و قرار
آز قالور ائتسون اوغول اوز آشیانیندن فرار
نقطۀ عشقون دولانّام باشینه پرگار وار
نقطه باشینه همیشه دُؤر ائدر پرگار اوغول
.
.
صفحۀ جسمونده گر چکسه قلج خط اوسته خط
کامیاب اولّام باتا قانه بو زلف و خال و خط
خط سیر عشقدن گئتمم غلط من بیر نُقَط
چون عیار عشقدن وار الده بیر معیار اوغول
.
.
نوکرون عاصی علی بیر عمریدور ایتسر صله
ایستمزدی سن بولورسن چوخ دوشوبدور مشگله
مستحقدور وئرگیلن قویما داخی گلسون دله
هر زمان بزم غمونده ائیلر آہ و زار اوغول
.
.
#اکبریه #عاصی_تبریزی #اکبریه_شهادت #ترکی #زبدةالاشعار
نظر دهید