وداع حضرت امام حسین (ع )
سوال و جواب
..
..
مرحوم واقف سرابی
..
..
/// زبانحال امام حسین (ع) ///
..
..
باجی عزم ایلدیم من کارزاره فی امان الله
سنی تاپشورموشام پروردگاره فی امان الله
..
..
باشوندان قمچیلر دگسَه قولون باغلانسا صبرایله
دوتوب اود خیمه لر خردا اوشاقلار یانسا صبرایله
خلیل الله تک بیماریمیز اودلانسا صبر ایله
قوجاقلا سال یانار اوددان کناره فی امان الله
..
..
عیالیمدن کنار اولما بوقوم اینجیتمه سون باجی
اوجادان آغلاما دشمن شماتت ایتمه سون باجی
گریبان چاک قیلما حلم و صبرون گتمه سون باجی
گیرنده کوفه ده هر رهگذاره فی امان الله
..
..
باجی الله یولوندا قوم و قارداشمدان ال چکدیم
جلال و ملکدن گچدیم بنی هاشمدن ال چکدیم
یزیدین مجلسینده بو کسیک باشیمدن ال چکدیم
لبیمدن خیزران ایلر اشاره فی امان الله
..
..
..
ایدر بو جسمیمون قانی بو دشتی کوه مینا تک
باشیم ایلر جدا اوسته تجلّا طور سینا تک
یهودیلر ووراللار باشیمی دار اوسته عیسی تک
اولاندا زینت دارالاماره فی امان الله
..
..
باشیم چوخ دور ایدوب سر نیزه ده میل تنورایلر
تنور خولیه شعله سالوب مشکوة نورایلر
گونون وار قدرتی بیر جذبه ده سنگی بلورایلر
هو القادر و یکفیک الاشاره فی امان الله
..
..
گرک شامه گیدن دمده باشمدا ازدحام اولسون
گورنده مشتری بیماریمه بازار شام اولسون
متاعیم شامده قرخ بیر کنیز و بیر غلام اولسون
شفاعت اولماقا روز شماره فى امان الله
..
..
دوتار مسکن قالور بیر یرده دورت مین اوخ بو سینه مده
قالاندا توپراق اوسته آت چاپالار چوخ بو سینه مده
گورر شمر لعین اگلشماقا یر یوخ بو سینه مده
یوزی اوسته سالوب ایلر اشاره فی امان الله
..
..
گل ای عمرونده خوش گون گورمیوب چوخ غم چکن زینب
وصیت ایلرم ساخلا فراموش ایتمه سن زینب
گلورسن باشیم اوسته جان ویرن ساعتده من زینب
سکوت ایت گلمه آرتوخ آه و زاره فی امان الله
..
..
ایدر بلبل گل اوسته هر صباح و هر سحر ناله
چخوب واقف منابرده وورار سینه ایدر ناله
بو وقفه خاک پایوندا اگر قیلسا اثر ناله
نظر قیل سن بو چشم اشکباره فی امان الله
..
..
#وداع #واقف_سرابی #حسینیه_داع #ترکی #زبدةالاشعار
نظر دهید