ورود آل الله به کربلا
زبانحال امام به جناب زینب در کربلا
.
.
.
مرحوم عاصی تبریزی
.
.
بو کربلادی باجی چوخ بلاسی وار بو یرون
وفالی عاشقه نی تک نواسی وار بو یرون
.
هواسی غملو یری پربلا و حزن آور
فضاسی غصّه لی جور و جفاسی وار بو یرون
.
بو دشته گلمه میشم باجی جان من اوز باشما
باشمدا روز ازلدن هراسی وار بو یرون
.
بو شوریله که حسینون گلوب عراق ایچره
حجازیدن منیله مدعاسی وار بو یرون
.
مخالفینین الینده حصاره دوشماقیمی
سوؤب ازلده بو امره رضاسی وار بر یرون
.
چکن قطاریمی بو خطّۀ غم انگیزه
شکسته دلده اولان ماجراسی وار بو یرون
.
منای عشق و محبتدی، آدی کرب و بلا
حقیقی کعبه دی سعی و صفاسی وار بو یرون
.
گتورموشم بو یره نچّه قوچ قوزی قربان
کسم که تا گوره لر نه مناسی وار بو یرون
.
منم ازلده او ذبح عظیمدن مقصود
خلیله فخر ایده من تک فداسی وار بو یرون
.
نئجه برابر اولار کربلایه کعبه یری
فدای عشق ذبیحاً قفاسی وار بو یرون
.
اگر او کعبه نون اولسا فداسی اسماعیل
ولیک اکبر گلگون قباسی وار بو یرون
.
گرک باجی بو یرون بیدقی اوجا اولسون
که قارداشیم کیمی صاحب لواسی وار بو یرون
.
کسنده باشنی سو گوسترولّه قربانه
سو اوسته قولّاری تندن جداسی وار بو یرون
.
بو سرزمینده بیر طوی گتورّم ایجاده
گوره طوی اهلی نئجه کدخداسی وار بو یرون
.
مدینه دن دیمه آخر حنا گتورمه میشم
الیوه یاخماقا قاندان حناسی وار بو یرون
.
دگول بو طویدا باجی شال قرمزی لازم
باشوا سالماقا باخشی قراسی وار بو یرون
.
دوتاندا قاسم ناکامه مجلس ماتم
طوی حجله سی کیمی بزم عزاسی وار بو یرون
.
قیزم عروسه نه لازم عمارت عالی
خرابه شامده ویرانسراسی وار بو یرون
.
علیل اوغلوما ائتمه باجی غذا فکری
او زاره خون جگر تک غذاسی وار بو یرون
.
مریض شیعه لریم ایستسه تاپا صحت
یتور اولاره که خاک شفاسی وار بو یرون
.
خدا نه وقت اولور عاصی ده کربلایه گئده
دیه اورکده کی درده دواسی وار بو یرون
.
.
.
.
.
#ورود_کربلا #عاصی_تبریزی
#بو_کربلادی_باجی_چوخ_بلاسی_وار_بو_یرون
#ترکی
#زبدةالاشعار
نظر دهید