بیریسی چشم بصیرتله باخسا دنیایه #پیامبراسلام_صالح_علی_نژاد

شهادت حضرت خاتم الانبیا (ص)
.
#زبدةالاشعار
.
: @nohe_torki
.
صالح علی نژاد (صالح تبریزی)
.
بیریسی چشم بصیرتله باخسا دنیایه
نظام و گردشی عبرتدی اهل معنایه
.
وفاسی یوخدی جفادن گوتورمز ال بیر آن
ترحّم ایلمز اعلایه یا که ادنایه
.
اگر اولیدی وفا و عطوفت و مهری
ایدردی حضرت طاهایه آل طاهایه
.
مگر ایشیتمه میسن حضرت رسول انام
صفا ویروبدی وفاتیله دار عقبایه
.
بو فَرقیله ملکُ الموت اذن آلوب اوندان
ادبله عرض سلام ایلیوب او مولایه
.
او باب رحمت و فضلی ایدوبدی دَقُّ الباب
بیر اهل درددی گویا گلوب تمنّایه
.
بیله یازولّا که زهرا بویوردی مَن فِی الباب
او پیک حق بیله ویردی جواب زهرایه
.
رسول حقّه رسولم واریمدی بیر پیغام
لزومی وار یتورم سمع میرِ بطحایه
.
جواب ویردی بابام حال انکساریده دور
نه حالی لفظ بلایه قالور و نه لایه
.
دیدی گرکدی گورم ایمدی، واجبُ العرضم
مشرّف اولمالیم مختصر بو ماوایه
.
بو سوزده تیتردی اندام فاطمه گل تک
سرشکی چشمه ی چشمیندن آخدی سیمایه
.
او پیک حق سسین آلدی آچوب گوزون طاها
تفقّدیله بویوردی بتول عذرایه
.
قیزیم دایانما دایاندیرما ویر اجازه گله
نه میهماندی نه ایو اهلیدور نه همسایه
.
مَلَکدی قابِضُ الارواحدور بشر دگلی
اونون آچخدی یولی انجمه گونه آیه
.
اجازه ایمدیه دین آلمیوبدی بیر یردن
سپهر چتری سالاندان یر اوستونه سایه
.
ولی سنون آتاوین حرمتین رعایت ایدور
بو پایگاهه بودور میلی آرتورا پایه
.
خلاصه محضر طاهایه گلدی عزرائیل
ویروب سلام رسول خدای یکتایه
.
بولوردی چون ملکُ الموت نیّتین طاها
دُرِ سرشکینی دولدوردی چشم شهلایه
.
بیر آز دایان دیدی جبریل قارداشیم گلسون
گتورمه تیز عمل قبض روحی اجرایه
.
امین وحی بو سوزده نزول ایدوب گویدن
آچوبدی شهپرینی فرش قیلدی غبرایه
.
اورکلنوبدی گورن دمده جبرئیلی رسول
اوجاتدی آهینی یردن سپهر مینایه
.
بویوردی قارداشی قارداش مگر بیله یوخلار
دوشن زمانیده اندوهِ تاب فرسایه
.
گورنده غصّه لی پیغمبری گلوبدی دله
سلامیدن صورا عرض ایلوب ای گرانمایه
.
بهشته سندن اوتور باغلیوبدیلر آذین
سنون قدومیوه لایق ویرولّه پیرایه
.
بویوردی اُلماقیما راضیم یوخومدی سوزوم
ازلده خلق اولونان خلق اولوبدی اَفنایه
.
دم پسینیده دلواپسم بو امّتدن
اولوب سبب او خیالیم ملال عظمایه
.
جواب روحُ الامین ویردی بو تمنّانی
یتورّم ایمدی حق بی شریک و همتایه
.
عروج ایوب قِییدوب سویلدی سنه قربان
ملول خاطریوی ایتمه بو قضایایه
.
خدای جَلَّ عَلا شَانُهُ یتوردی سلام
بو مطلب اوسته بو گون دوشمه فکر فردایه
.
کیمه تمایلون اولسا جزاده عفو ایدرم
به جز او کس که وورا ال خطای کبرایه
.
بغیشلرم او قدر که اوزون رضا اولاسان
دگل منیم بولوسن رحمتیم گلن سایه
.
بو سوزده خاتم پیغمبران اولوب خشنود
گوروب که تاپدی دوا درد بی مداوایه
.
دیدی الهی رضایم سنون رضایتیوه
عجب یتیشدیم اورکده اولان تمنّایه
.
او حالدِیدی که آغلوردی جمله آل الله
گیدردی صحن سرادن فغان ثریّایه
.
اوخوردی حضرت یاسینه مرتضی یاسین
حجاز امیری حجار اوسته آیه به آیه
.
حسینیله حسن اولموشدی قول بویون ایکیسی
آخاردی اشک روان عارض گل آسایه
.
او قدر قالمادی زهرا هلاک اولا غمدن
زبس ویروب گوز ایوین یر او قدّ بالایه
.
آچاندا بیرده گوزون مصطفی بتولی گوروب
دوشوبدی نرگس مست و خماری ایذایه
.
او قدر آغلیوب اشکین توکوب، سولوب رنگی
آتان فدا اولا سویلوب او چشم زیبایه
.
قیزیم کناریمه گل آغلاما بیله صبر ایت
بلالی باشیوی سالما بو غمده سودایه
.
گل ایمدی من سنه بیر سوز دیوم غمون آزالا
محالیدور اولا بیرده مجال نجوایه
.
ایدوب او بیر سوزیله فاطمه غمین زائل
گل اوسته یتمدی غم عندلیبِ شیدایه
.
او گونکه رحلت ایدوب ختم انبیای عظام
دولاندی دوره گیچوب هفته لر دونوب آیه
.
سوال ایدوب بیری زهرادن ای حمیده خصال
آتان سفر ایلین گونده دار عقبایه
.
نه سوز دیدی سنه شاد اولدی غصّه لی گوگلون
قالوبدی مبهم او گفتار پیر و برنایه
.
آچوبدی غنچه صفت گل دوداقین ایتدی بیان
فدا اولوم باباما مژده ویردی زهرایه
.
بویوردی جدّیوه ملحق اولان ازل سنسن
قیزیم چوخ آغلاما بو فرقت غم افزایه
.
سنون بلالیدی باشون هله قاپون یاناجاق
یتیشه جاق یارا گلدن لطیف اعضایه
.
گیدنده ظلمیله یغمایه عمر کالاسی
لزومی وار ایده سن حلم و صبری سرمایه
.
بنفشه تک ایده جاق رنگ رنگ گل یوزیوی
قباله اوسته قیزیم دشمن فرومایه
.
گوروم فلک سنه اُفّ اولسون اولدی اولمامالی
ریاست اوسته نجه باش دوشوبدی سودایه
.
دانوبلا حقّینی جبراً ایدوبله خانه نشین
دیوبله ویرمدی تن مرتضی مدارایه
.
پیمبرین قاپوسین باغلی قویدولار ایللر
اولار که قائلیدی دلده لات و عُزّایه
.
علی کیمی او که مظلوم اولوب علی اوزیدی
چتین شبیه اولا بیر کس او فرد و تنهایه
.
اولوبدی گور هارا منجرّ ایش حسین اوغلین
ایدوبله دشت بلاده مثال یحیایه
.
آیردی شمر قفادن سر مبارکینی
نه رحم قیلدی کباره نه حال صغرایه
.
ووروب جدایه باشین گزدیروبدی شهر به شهر
آپاردی مسجده گاهی گهی کلیسایه
.
دانیشدی دِرهم ناچیزه سبط طاهانی
قوناق ویروبدی کلیساده پیر ترسایه
.
گیدن دگلدی کلیسایه قانلی باش مهمان
تعجّب ایلمه منّت قویوبدی عیسایه
.
ویروبدی صالحه دم قاسمی یازولدی بو سوز
گرک آناسینا ویرسون یتورسون امضایه
.
.
.
#پیامبراسلام_شهادت
#بیریسی_چشم_بصیرتله_باخسا_دنیایه
#پیامبراسلام_صالح_علی_نژاد
#ترکی
.
#زبدةالاشعار
.
: @nohe_torki