شیعه بو نه بازاریدی بازار پوزولدی #حسینیه_بیضا_اردبیلی

شهادت امام حسین علیه السلام
..
..
..
..
مرحوم بیضا اردبیلی
..
..
..
..
شیعه بو نه بازاریدی بازار پوزولدی
عباس ئولندن صورا پرگار پوزولدی
..
..
..
..
بو صحنه ده عباس عجب وئردی نمایش
اولدی او نمایش اونا شایسته ستایش
بیر جفت قولی دوشدی یره ایلدی خواهش
اول خواهشه عشقینده کی معیار پوزولدی
..
..
..
..
عباس گزوب گوهر نایابینی تاپدی
جان نقدی وئروب چشمۀ شادابینی تاپدی
خون گرمی اولان عشقیده احبابینی تاپدی
عشقین ثمرین گورجک علمدار پوزولدی
..
..
..
..
اثنینیتی وحدته تبدیل ائلیوب شاه
اول ماریه دشتینده حسین تکدی تک الله
الله یرین تیره مکان ایلدی ناگاه
یارین یارالی گورجک همین یار پوزولدی
..
..
..
..
بلبل قفس ایچره گلی فریاده چمن سیز
جام دل غمدیده سی غملن اولی لبریز
آتماز ولی یاددان گلینون عشقنی هرگز
جانانینه جانین ائده ایثار پوزولدی
..
..
..
..
کیم گوردی یانان وقتیده پروانه دانشسون
جان منّتینی قویماقا جانانه دانشسون
هستی سی فقط جانیدی آیا نه دانشسون
جان نقدی وئروب هر نئیده وار پوزولدی
..
..
..
..
دامادون عجب پیرهنی قانه بویانمش
قان رختینون اوستونده عجب نازیله یاتمش
طاق ظفرین حجلۀ داماده اوجالتمش
افسوس او گوزل طرّۀ طرار پوزولدی
..
..
..
..
گیسوسی دلاویز ، علی اصغر مه رو
عطشانیدی دل اولمادی بیر دفعه دئسون سو
اوخ شانه وروب وردوقیجان عشقه تاپوب خو
دریای صدفده دُرشهوار پوزولدی
..
..
..
..
چالدی ال ایاق قاندا مغ و مغبچه باهم
اوخ دگدی اوخا اولدی یارا یاریه مرهم
قان قطره سی هر جسمده چون دانه شبنم
رعد ستمیلن گل گلزار پوزولدی
..
..
..
..
اولموشدی عجب عرصۀ شطرنجده شه مات
اویناردی ولی بخت عبیدالله بد ذات
منظوری اله گلمدی شش پنجده هیهات
روشن گونوزی اولدی شب تار پوزولدی
..
..
..
..
بیر داغ مذلّت دل اغیاره چکیلدی
گلگونۀ بهجت رخ دلداره چکیلدی
دوشموشدی گونون شعشعی دیواره چکیلدی
صحرای غم افزاده کی آثار پوزولدی
..
..
..
..
ازّل گونی تحسین اولونان شیوۀ مشقی
دنیانی سالار حیرته بو وحدت عشقی
ذرّ عالمی گوردوم ستم شاه دمشقی
من شاد ولی دشمن اولوب خوار پوزولدی
..
..
..
..
غرق عرق عشقم و هر سرّدن آگاه
روحیم اودی وارستۀ آزادیدی الله
اود وورسا عدو یانسا اگر خیمه و خرگاه
فکر ایلمرم حشمت سرشار پوزولدی
..
..
..
..
میخانۀ عزتده بیوک بیر هیجان وار
جانانیمه بذل ایلمگه جوهر جان وار
پیرایش و آرایشیمه قرمزی قان وار
عشقیم هیجان ایلدی اغیار پوزولدی
..
..
..
..
ای پایۀ ارشادی اولان عالمه افشا
مرشدلیگوی پیر مغان ایلدی امضا
طبعون ائلیور شعریده «بیضا» ید بیضا
اشعار سلیسون گوروب عطّار پوزولدی