ورود کاروان به کربلا
.
.
ظهیر تبریزی
.
.
تا کرب و بلا دشتی حسینه وطن اولدی
زهرا قیزینا یر یوزی بیت الحزن اولدی
.
.
گورسندی غم آثاری او سیمای جلیده
یعنی رخ زیبای حسین بن علی ده
.
.
غم قافله سی دشت غم افزایه یتیشدی
شاه شهدا دلده تمنّایه یتیشدی
گویا که نبی مسجد الاقصایه یتیشدی
معراج ایلیوب سیر ایده افلاک و سمانی
ترجیح ویره مركبینه نوک جسدانی
.
.
تنگ ایله دیلر عرصه نی اول شاه رئوفه
اندوهی یتوب الفدن آلاف و الوفه
مجبور ایلیوبله او بیاباندا وقوفه
گور امری حسینون نقدر مشکله دوشدی
باجادی دیسم ناقۀ صبری گله دوشدی
.
.
احساس ایلیوب دلده او شاهنشه والا
اوز جدّی دیَن یردی او صحرای غم افزا
لازم بولوب ایتسون او بیابانیده مأوا
تكلیفنه نسبت ایدوب اول شاه اراده
اجلال نزول ایلدی اول دشت بلاده
.
.
احضار ایلیوب محضرینه قارداشین اول شاه
عباسینی اسرار دلندن ایدوب آگاه
امر ایتدی چوخور یرده ورون خیمه و خرگاه
وار بو خبر مجمله بیر شرح مفصّل
ایمائیله آگاه ائدرم من سنی اوّل
.
.
گل ای آتام اوغلی منه ای یاور و غمخوار
سرلشکریم ای لشکر اسلامه علمدار
آل اللّهه بو چولده اولان یار و هوادار
ویر لشکریمه میمنه و میسره ترتیب
اهداف قیامه ایله انصاریمی ترغیب
.
.
بو چولده اولور لشکر دین کفره مقابل
بو یرده مصاف ایلیه جاق حقّیله باطل
جان نقدی دگل رونق اسلامده قابل
بو امریده اولماق هامی بیر مشكله فائق
لازمدی جهاندا ایلماق ترک علائق
.
.
قارداشیم امام حسنین صلحینه نسبت
صبر ایلدیم ایللر بویی گلسون اله فرصت
تا حاصل اولا قارداشیمون چکدیقی زحمت
هم ائتدیقی عهدین یتیشه وقتی تمامه
تکلیفیدی منده ایدیم اقدام قیامه
.
.
بو نهضتیمه عالم آرا ایتماقا اقدام
ترک وطن ایتدیم هدفیم رونق اسلام
بو کعبۀ مقصوده طرف باغلادیم احرام
توش اولمیا یولّاردا منه قوم اراذل
خائف یَتَرَقّب ائلدیم طیّ منازل
.
.
بونهضتیمون واردی مسیرینده شهادت
من ئولمه سم اولماز اولا پاینده شریعت
خوشدور منه گر خیمه لریمده اولا غارت
چون رونق قرآن بو کشاکشده هدفدور
بو جنگ ریاست دگوری حفظ شرفدور
.
.
قانیم بو بیاباندا اولار سو کیم جاری
تا یخماقا کاخ ستم و زور و فشاری
چوخداندی ایدردیم بو گونی لحظه شماری
چوخ شكر اولا مقصود دلیم حاصل اولوبدی
بو باره ده آلام دلیم زایل اولوبدی
.
.
گوردوم که یزید ایلوری دین حقى تحریف
ایلور علناً امّتین افكارینی تضعیف
بولدوم اوزومه شرعیده بو نهضتی تکلیف
تا دینه تصرّف ایلین ریشه کن اولسون
اسلام حریمینده گرکمز فتن اولسون
.
.
گونلر گیچوب اولدی دهم ماه محرّم
برنامۀ عاشور حسین اولدی مسلّم
اجراسینه شاه شهدا اولدى مصمّم
تا رونق اسلام ایچون اول حجّت برحق
اوز قولینه فعلیله تحقّق ویره مطلق
.
.
بیر نهضت خونین ایدوب اول شمس هدایت
انصاری اوزی نوش ایلدی جام شهادت
دین اهلینه بو یولدا ویروب درس شهامت
اوز پایۀ عشقینده قویوب عالمی مبهوت
شام ایچره یزیدین ایلیوب تختینی تابوت
.
.
بیر نحویله ئوز نهضتینی ویردی تمامه
دنیا بویی بیر درسیدی هر خاصیله عامه
هر قدر جهان گردشینه ویرسه ادامه
مین ایله دوشر هر باشا مین شوری حسینون
سرمشق اولی برنامۀ عاشوری حسینون
.
.
اوّلده علی اکبرینی شاه شهیدان
اول عشق مناسینده ویروب دیننه قربان
تا باشه یتیشسون حقیله ائتدیقی پیمان
بو قانیله خیل شهدایه یول آچیلدی
دنیادی فنا دار بقایه یول آچیلدی
.
.
جمله شهدا گتدیله اول راه وفانی
دین اوسته آخوب هر بیرنون سوکیمی قانی
ایلوبدوله بیر رشک جنان کرب و بلانی
بخصوص او چولده توكولوب قانی حسینون
عریان یارالی تشنه چیخوب جانی حسینون
.
.
کعبه یرینه عالم آرا خالق عزّت
یرلرده ویروب بی حد و بی پایه جلالت
وار کرب و بلاده ولی بیر اوزگه شرافت
کعبه ایوی پاینده اولوب سنگ و گلیله
آباد ولی کرب و بلا خون دلیله
.
.
بیر خون دلی که تن اسلامه دمادی
دل خانۀ حق خونی اونون خون خدادی
بو خون دل پادشه کرب و بلادی
بیر قاندی که محکم ایلیوب پایۀ دینی
بیر قاندی که ممتاز ایلیوب اهل یقینی
.
.
هر کس نقدر دینه «ظهیرا» ویره قیمت
مین ایله ویرر قیمت اونا خالق عزّت
فکر ایلمه بی صاحب اولوب دین و شریعت
حامیدی اوزی دینه خدای احدیّت
بیر مصلح الیله ویرجاقدور ابدیّت
.
.
.
#ورود_کربلا #ظهیر_تبریزی #ترکی #زبدةالاشعار
سلام لطفاً سبک شعرها هم گذاشته شود . اجرتون با آقا ابالفضل
سلام و احترام … در حد امکان و فرصت چشم ان شاءالله … التماس دعا