شهادت حضرت قاسم (ع)
.
✍️ #زبدةالاشعار ✍️
.
🆔: @nohe_torki
.
مرحوم عابد تبریزی
.
جسموندی یر اوزره قانه غلطان
یا غنچه دی بیر طبق عم اوغلی
رخساریوی قان ایدوبدی گلگون
یا مهری دوتوب شفق عم اوغلی
.
.
بیر نسخه دی قانیله مذهّب
بو پیکر سر بپا جراحت
هر حرفینی بیر جفا الیله
شمشیر و سنان ایدوب کتابت
مین شوم دنی شقاوتندن
هر بیر رقمی ایدور حکایت
شرح ایلوری درد و غم فصولین
بو نسخه ورق ورق عم اوغلی
.
.
از بسکه ویروبلا یاره جسمون
وار بنزری صحن لاله زاره
شمشادیدی قامتون یخلمیش
بیدادیله طرف جویباره
رخساریوی گرد و خاک ایدوبدور
ابر سیه ایچره بیر ستاره
یوخ یوخ دیمرم ستاره رویون
بیر ماهیدی متّسق عم اوغلی
.
.
تا گل کیمی باتدی قانه جسمون
دل گل کیمی اولدی چاک دامن
بیر شعلۀ جانگذاز آلدی
بو حسرت و شوق آتشیندن
بو سوز و گدازیده نلر وار
بیر شمع بولر او حالی بیر من
پروانه ده درک یوخ نه بولسون
بو عشقیدی یا عَشق عم اوغلی
.
.
عمرون گونی ای مه وجاهت
چون کوکبی بختیم اولدی آفل
یاندیردی شرار اشتیاقون
هر پرده نی وصله گوردی حایل
اجزاء وجودی درهم ایتدی
تا اولدی مراد قلب حاصل
عاشق یتیشر وصاله آری
مشی ایلسه بو نسق عم اوغلی
.
.
زلفوندی دوشوبدی رشته رشته
رخساریوی ایلیوبدی پنهان
یا ظلمت شام کفر ایچینده
مستوریدی نور صبح ایمان
بیجا دگی گوزده روز روشن
بیر لیلۀ تاره بنزر اوندان
تفسیر اولونوب بو طرّه لرده
واللیل اذا غسق عم اوغلی
.
.
ای آیت خوبی و وجاهت
اعجوبۀ دهریدور کمالون
ای معنی نزهت و طراوت
اغلوطۀ حسندور جمالون
وصفون مثل و بیانه گلمز
اسطورۀ وهمدور خیالون
حاشا گورونه سواد شبده
انوار رخ فلق عم اوغلی
.
.
گون تک اوزون ایلینده روشن
ظلمتگه عرصۀ غزانی
محو اولدی سپاه کینه پرور
گورجاق بو جمال دلربانی
تحسینه آچیبدی دل ملائک
سسلندی سروش آسمانی
جاءَ الحَق و استَطار نوره
اَلباطل قَد زَهق عم اوغلی
.
.
ساخلار منی سایه تک دییردیم
پای قد سرویوین پناهی
چوخ گوردی ولی هزار افسوس
گردون منه بو پناهگاهی
بیدادیله سالدیلار ایاقدان
شامون بو دنی صفت سپاهی
بیر قدّی که اولموش اعتدالی
طوبائیله ماصدق عم اوغلی
.
.
داماد سن ای امیدگاهیم
مقصود نگاریدور عروسون
جنّتده بهشتی رولر ایلر
شوقیله هوای پای بوسون
منده دوزرم غمونده یتسه
هر ظلمی سپهر آبنوسون
تا عمر گچر تاپار وصالون
بو خاطر مفترق عم اوغلی
.
.
بو وسعتیله جهان غمونده
بیر تنگ قفسدی مرغ جانه
خون دل و اشگ لعل گوندور
بو طایره سهم آب و دانه
همراه اولا روحویله ایستر
پرواز ایده گلشن جنانه
بو نیّته تیر آهی ایلر
استار سپهری شق عم اوغلی
.
.
دل رشته سی بند اولوبدی محکم
بیر رشتیه چین کاکلونده
مشهودیدی عکس لوح خاطر
آئینۀ مه شمایلونده
عشقونده اولوبدی محو نفسیم
یوخ مندن اثر مقابلونده
فرقتده قرین عین وصلم
بیهوده دی بو قلق عم اوغلی
.
.
هر ذرّه ده آفتاب عشقون
اوز قدریجه واردی آب و تابی
میزان لیاقتینجه هر کیم
ادراک ایلیوبدی بو حسابی
بو شور که سنده وار ولیکن
حیرتده قویوبدی شیخ و شابی
بو قوّۀ فوق هر قوادن
سرگشته دی ماخلق عم اوغلی
.
.
بی شبهه گوروبدی ماه مصری
سیاره بت رواق گردان
شاهددی که حسنویله اوندا
در عین کمال واردی نقصان
بو جلوه که گورسنیر یوزونده
خورشید ده یوخ نه ماه کنعان
بو حسنه نظیر کلک قدرت
ماصوَّر فی سَبق عم اوغلی
.
.
گوز سیر جمالون ایلر اوندا
اود جانه سالار شرار غیرت
بیهوده دگول کی قلبیم ایلر
آخماقدا یوزه سرشگه سبقت
آگهدی کی بی لقای جانان
یوخ عمرده بیر بها و قیمت
بو باره ده دونسه قانه غمدن
ذی حقدی بحقّ حق عم اوغلی
.
.
دور ایلدی قبّۀ مدوّر
بیر گردش باژگونه ایله
هر گامیده سیری توأم اولدی
مین فتنۀ گونه گونه ایله
بو فتنه لری سالیب ایاقدان
من بیکسی بیر نمونه ایله
تا فُلک حیاتون ایلیوبدور
قان موجینه مغترق عم اوغلی
.
.
تأثیر عوامل طبیعی
پیدایش نوبهار ایدنده
خاک سیهی بدایعیله
حق خامه سی پرنگار ایدنده
طغیان شرارۀ عواطف
آه دلی شعله بار ایدنده
گل غنچه لری یانار چمنده
تابیندن ایدر عرق عم اوغلی
.
.
دور گور نجه کربلا چولونده
پیچیده اولوب آنان نواسی
اقطار صوامع فلکده
واردور بو نوادن انعکاسی
ذرّات جهان اولوب غمونده
اول بیکس و یار همصداسی
معناده دولوبدی شیونیله
بو طارم نه طبق عم اوغلی
.
.
چوخ شعر ایلدون ردیف «عابد»
بی معنی و سست و پوچ و بیراه
سوز صاحبی فیض ویردی اما
تا اولدی رسا بو فکر کوتاه
خوش نظم ایلدون بو شعری الحق
طوبی لَکَ ثمّ اَحسنَ الله
جسموندی یر اوزره قانه غلطان
یا غنچه دی بیر طبق عم اوغلی
.
.
#کوچ_کربلا #عابد_تبریزی
#قاسمیه_شهادت
#جسموندی_یر_اوزره_قانه_غلطان_یا_غنچه_دی_بیر_طبق_عم_اوغلی
#ترکی
.
✍️ #زبدةالاشعار ✍️
.
🆔: @nohe_torki
نظر دهید