جلال حضرت زینبده ائیلینده خیال #کوچ_کربلا_عاصی_تبریزی

در مدح حضرت زینب (س) و حالات کوچ از قتلگاه
.
.
.
مرحوم حسن عاصی تبریزی
.
.
مقدمه رسیدن اهل بیت به قتلگاه :
#زینبیه_مدح
.
جلال حضرت زینبده ائیلینده خیال
جلالینه پی آپارماق اولور بیر امر محال
.
مقام و عزت زینبده عقل حیراندور
همین جلالینه صدیقه لفظی برهاندور
.
آناسی فاطمه تک آدی محترم سایلور
حسین تشنه لبانه شریک غم سایلور
.
حسیندن صورا زینب مُروِّجِ دیندی
اسارتی سبب عزّ دین و آئیندی
.
بو باغ دینَه حسین سو یرینه قان وئردی
باجیسی زینبی اول باغه باغبان وئردی
.
اگر چه خون حسینیله دین تاپوبدی رواج
حسیندن صورا دین اولدی زینبه محتاج
.
گر اولماسیدی خانم دین آدی دِییلمَزدی
باباسی حضرت یاسین آدی دِییلمَزدی
.
دُوزوبدی زحمت بی انتهایه دین اوسته
طناب ظلمه ایکی قولّاری اولوب بسته
.
خیال ائتمه که بیر حفظ دینَه راغبدی
حسین عزّتینه تک به تک مواظبدی
.
مگر ائشیتمه موسن اولدی حضرت زینب
حیات سیّد سجّاده قتلگهده سبب
.
.
#کوچ_کربلا
.
او ساعتیکه یتوب قتلگاهه اهل حرم
بنات فاطمیه تازه لَندی محنت و غم
.
تمامیسی دَوَه اوسته مُقیّد و مغلول
او وضع حاله ائدردی نظاره آل رسول
.
نه نوعی گوردیله بولمم شهیدلر بدنین
او حالده نظر آلدی هر کس اوز ئولَه نین
.
کسیلدی تاب و توانا عیال زهرادن
گوتورمدی قَدَمین بیر نفر او صحرادن
.
مخدّراتین او غم اختیارینی آلدی
تمامیسی دَوَه اوستن اوزین یره سالدی
.
یولا یولا ساچنی وا محمّدا گویان
قویوبلا قَتلگهَه یوز تمام ناله کنان
.
هره سی اوز ئوله نین تاپدی چکدی آغوشه
سپوب یوزینه سو اشگیله تا گَله هوشه
.
تاپوبدی لیلی غم دیده اکبرین نعشین
چکوب کناره شبیه پیمبرین نعشین
.
.
رسیدن حضرت لیلا بر سر نعش حضرت علی اکبر :
.
دئدی اویان گوزون آچ باخ منه جوانیم اوغول
قرار صبر دلیم ای عزیز جانیم اوغول
.
علی گوزوندن ایراق گور آنان نه حاله قالوب
او قدر قمچی وروبلا قولوم یوزوم قرالوب
.
نه قدر زحمتیوی چکدیم ای علی اکبر
بو فکریله که وئرر نخلۀ امید ثمر
.
امید دل بوئیدی گول یته بوداغینه
الون الیمده گئدیدوخ عروس اطاقینه
.
او هامی زحمت و رنجیم او گونده باشه گَلَه
عروسویله ویریدیم اوغول سنی اَل اَلَه
.
گئچنکی عُمریدن عالمده کام آلیدیم علی
سنون طویوندا باشا قرمزی سالیدیم علی
.
عجب مرادیمه یتدیم غریبه کام آلدیم
مقابلنده سن ئولدون باشا قرا سالدیم
.
او قاره که سنه ئولنده باشه سالندی علی
گلنده غارته دشمن اودا آلیندی علی
.
بونیله بئله گنه چکمور ال بو اهل جفا
ورالّا باشیمه قمچی دینده وا وَلَدا
.
ایدیم نه چاره اَلیم ائل قبیله دن اوزولوب
خصوص سن کیمی ای نوجوان جوانیم ئولوب
.
.
احوالات و زبانحال حضرت فاطمۀ عروس بر سر نعش حضرت قاسم :
.
عروس تاپدی او صحراده نعش دامادی
اوجالدی عرش برینه فغان و فریادی
.
گُل مُرادینی مقصود اصل درک ائتدی
دوشوب جنازه سی اوسته اوزینی ترک ائتدی
.
یارالارین ئوپوب ایگلردی بیر قزل گول تک
گَلوبدی شاخۀ گُلده نوایه بُلبل تک
.
دئدی عم اوغلی اگر چه خجالتم سندن
ولیک دوت منی معذور اینجمه مندن
.
گَلَنده خیمه لره نعشون اوسته آغلامادیم
باشون یاراسینا قربان یاراوی باغلامادیم
.
چکوب سس آغلاماقا مانع اولدی شرم و حیا
ایدَنمَدیم من عم اوغلی آنان یانندا نوا
.
اولیدی معجریم ایندی یاراوی باغلاردیم
قوییدی دشمن اگر جان وئرنجه آغلاردیم
.
آلوبلا معجریمی تار اولوب گونوز گوزومه
بو قانلی زلفومی من حایل ائتموشم یوزومه
.
عم اوغلی جان دیمه زلفوم نیه باتوب قانه
او نسگیل عُقده سی آتش سالور دل و جانه
.
ووراندا خیمه لره اود بو فرقۀ گمراه
آلشدی خیمه لر اود دوتدی اودلانوب خرگاه
.
یانار اود ایچره قالوب عترت رسول اَنام
گوروب بو حالی فراره اجازه وئردی امام
.
او دَمدَه غارته ال فرقۀ شرار آچدی
تمام عورت اوشاق یوز قویوب چوله قاچدی
.
همان او شور قیامتده داد و شیونده
قاچانلاریله قاچاردیم عم اوغلی جان منده
.
نه گوردیم اوندا بیر آتلو گلور دالیمجه منیم
گئدوب قرار دلیم دوشدی لرزیه بدنیم
.
دیزیمده قاچماقا گر چه یوخیدی طاقت تاب
بونیله بئله گِنه ائیلدیم فراره شتاب
.
یانوردیم آتش محنتده دست و پادیدیم
نه ائلیییدیم او آتلیدی من پیادئیدیم
.
ز بس کی جانیمی دوتموشدی بیم و خوف و هراس
یتورماقین ائیلدیم کعب نیزه دن احساس
.
گورن زمان بئله اوضاعی هوشیدن گئتدیم
ووروب یخوب قوری توپراقلار اوسته ضعف ائتدیم
.
او قدر گئچمدی گلدیم عم اوغلی جان هوشه
نه گوردوم عَمَّم آلوبدور باشیمی آغوشه
.
باشیمی گوردوم آچیق زلفلریم پریشاندور
قولاقلاریمدان آخور قان یوزوم گوزوم قاندور
.
قولاقیمون یاراسندان بولَرسَن حالیمی سن
نه نوعیله چخادوب گوشواره می دشمن
.
چکوب جفائیله گوشواره می چخاتمیشدی
یوزوم گوزوم اودی بو نوعی قانه باتمیشدی
.
یاخاندا سن اَلیوه قان حنا دوزوب باخدیم
قولاقیمون قاننی منده زلفومه یاخدیم
.
عم اوغلی تا دئمه سونله باشی قرالی منی
دئسونله تازه گلیندی باشی حنالی منی
.
.
احوالات و زبانحال حضرت رباب به حضرت علی اصغر
.
اَلی اورکده ربابون گوزونده اشگ بصر
گزردی هر یانی سسلردی جان علی اصغر
.
دیردی هارداسان ای ماه انوریم بالا وای
سولان جمالی سوسوزدان وای اصغریم بالا وای
.
تاپام جنازه وی وئرمور بو اشگ دیده اَمان
توکور عذاریمه قانیاش بو گوزلریم بالا وای
.
دوشه اگر نظریم گُلسِتاندا غُنچه گله
فغانیله دیرم غنچۀ تریم بالا وای
.
اوره گیمون اودی سونمور نقدر اووشدرورام
گوئل یانور گلوری جوشه غملریم بالا وای
.
سسیمه سس ویر اماندور اوغول کباب اولدوم
دولانماقا داخی گلمور بو دیزلریم بالا وای
.
الیم ئورکده گوزوم یاشی حالیم افسرده
غریبه غملیدی بو حال مضطریم بالا وای
.
دوشنده یادیمه هر دم سوسوزدان آغلاماقون
یانور او حالته قلب مُکَدَّریم بالا وای
.
صاقا صولا گئدیرم حسرتیله سر گردان
قالوبدی گورنجه قوینومدا اللریم بالا وای
.
اوشاق بویوک هاموسی حالیمه باخوب آغلور
واریمدی بسکه اَسَفناک منظریم بالا وای

.
.
احوالات و زبانحال حضرت کلثوم به حضرت ابوالفضل :
.
زبسکه ایلدی کلثومه فوج محنت هجوم
دولاندی تاپدی علمدار نعشین اول مغموم
.
گورنده نعشینی اوَّل دولاندی بیر باشنا
آچوبدی باشینی وئردی اجازه گوز یاشنا
.
باخوب نه گوردی نه باش وار نه قول بدنده قالوب
یارالی جسمنی دوشمن بیر اوزگه حاله سالوب
.
او قدر یاره ووروب قوم دون او بی یاره
وجود پاکینی صد پاره ائیلیوب یاره
.
توکوب عذاره اورک قانین اشگینه قاتدی
بو دللریله هامی اهل بیتی آغلاتدی
.
دور ای دوشن قد موزونی کربلا یرینه
دولان سو مشکینه قان لخته لخته ماء یرینه
.
سالوبلا قولّاریوی سرنگون اولوب علمون
چاتوبدی باش باشا سینَنده اوخ لوا یرینه
.
غم ائتمه یوخدی یانوندا آنان ائده ناله
اوزوم سنون دوتارام یاسیوی آنا یرینه
.
بو رسمدور ئوله نین اقرباسی روز عزا
اوشاق بویوک هاموسی جمع اولار عزا یرینه
.
بولولَّه یوخدی هله آغلاماقا مانع اولان
گَلوبله آل عبا بو غم و بُکاء یرینه
.
سویوبلا بیزلری قارداش تاپولموری قاره
سالوبلا مه یوزه گیسولرین قرا یرینه
.
وجود اقدسوین یاره سی چیخوب حَدَّن
قلج اوخ اوسته دگوب اوخ دگوب جدا یرینه
.
نه بی مُروّتمیش بو سپاه بی انصاف
اوتانمیوب گِنه یاره ووروب یارا یرینه
.
مناده سن کیمی قربان کسیلموب ایندیه دین
سنیله فخر ائده جاق کربلا منا یرینه
.
.
ادامه احوالات حضرت زینب در کوج از قتلگاه
.
تصور ائتمه که چیخدیم کناره مطلبدن
بو یازدیقم غمه وار بیر اشاره زینبدن
.
کومکلیق اولماسا گر اوزلریندن اهل قلم
محالدور ائده بیر نقطه نی کتابه رقم
.
بو آستانه ده #عاصی که کلبدن کم دور
ولیک قیمتی واردور سگ معلم دور
.
بو خانوادیه منسوب اولوبدی نسبتی وار
اورکده زینبه مخصوص بیر ارادتی وار
.
گر عمریمون گونی کام دلیمجه ائتسه وفا
الیم دلیم قلمیم صورته وئرر معنا
.
همان او حالده که اهل بیت دل خسته
ائدردی ناله هره بیر یارالی نعش اوسته
.
مُخدّرات که سر گرمدی مصیبتله
گزردی زینب اودشتی تمام حیرتله
.
گئدردی گه صولا گه صاقه ناله و حیران
باخاردی هر طرفه متصل گوزی نگران
.
چکردی آه دمادم توکردی گوز یاشینی
گزوب تفحص ائدردی یارالی قارداشینی
.
.
زبانحال جناب زینب در موقع کوچ:
.
دیردی هارداسان ای نور هر دو عینیم حسین
باجوی غصه هلاک ائتدی ای شه حرمین
.
هایانداسان دئ گوروم باغریمی غم ایلدی قان
سسیمی آل یارالی ویر منه ئوزووی نشان
.
یورولموشام آنام اوغلی یوخومدی تاب و توان
بو قدر قویما گزوم قتلگاهی سر گردان
.
ز بس پوزولموشودی حال زینب دلگیر
شه ایستدی ویره بیر باجی حالینه تغییر
.
یارالی جسمله باجی سسینه سس وئردی
همان او قالب بی روحینه نفس وئردی
.
آلوب همان سسی اول بنت پادشاه نجف
سالوب گذارینی گودال قتلگاهه طرف
.
همان یره گوروب آلات حرب و اوخ توکولوب
دولوبدی داشیله از بسکه سنگ چوخ توکولوب
.
گئدنمَدی داخی اوردان کناره اول مُضطر
تعجب ائتدی دوروب دقتیله سالدی نظر
.
گوروب او نیزه قلج اوخ سینقی قانه باتوب
او قان ایچنده یوزی اوسته بیر یارالی یاتوب
.
گَتوردی قارداشنون پیکرینی بیر نظره
دوتوب وجودینی لرزه خانم اوتوردی یره
.
داخی بولوردی که تأخیره قالمیوبدی محل
او اوخ قلج سنیقین چکدی بیر کناره ازل
.
مَشام جانه یتوب نور عینینین عطری
گتوردی زینبی حاله حسینینین عطری
.
ایکی طرفدن حمایل ائدوبدی اللرینی
چووردی آرخاسی اوسته یارالی پیکرینی
.
توکوب عُذارینه گوز یاشی چکدی دلدن آه
تعجبیله دئدی لا اله الا الله
.
باخوب او پیکر صد پاره نون جراحتیله
تعجب ایلدی اهل جفا شقاوتینه
.
دیدی حسین بئله ظلم و بئله جفا اولماز
بو یاره لر ندی قارداش بئله یارا اولماز
.
بولار نه زخم قلجدور نه نیزه و اوخدور
بئله یارا آنام اوغلی نشان ویرن یوخدور
.
بولار نه یاره سی دی جسموه ووروب دشمن
سنی بو نوعی گورونجه حسین ئولیدیم من
.
بو سهلدور که کسوبدور باشون قفادن عدو
ائدوب مضایقه وئرموبدی بیر ایچیم سنه سو
.
باشون کسیلماقی گر قصد شمر کافریدی
الون کسن دئ گوروم هانسی بیر ستمگریدی
.
گوروبدی ایندیه دین کیم بو ظلمین آفاقین
مگر کَسَلَّه برادر شهید بارماقین
.
نه بی مُروّتمیش بو سپاه کینه سِیَر
تمام رختیوی قارداش سویوبدیلار یکسر
.
گئدوبدی غارته حتّی او کهنه پیرهنون
قالوبدی عور قوری توپراق اوسته گول بَدَنون
.
او کسکه ای شه عطشان سنی بو نوعی سویوب
گور عترتون آنام اوغلی سنون نه حاله قویوب
.
ایله سویوبلا بیزی بو گروه کینه شُعار
که قالمیوبدی بو چولده خیامیدن آثار
.
جلال و جاهیمزی ائیلیوبدویلر تاراج
اولوبدی آل پیمبر کُمک لیقا محتاج
.
وورا وورا آلنوبدور سکینه دن معجر
سالوبدی گول یوزه گیسولرین او مه منظر
.
یوخومدی وقت اوتوروب عرض حال ائدم سنه چوخ
دوشوب یولا گئدیری کاروان مجالیم یوخ
.
نه بیر دقیقه منه گوز یاشیم امان وئروری
نه وار علاج نه مهلت بو ساربان وئروری
.
نه اکبریم نه ابوالفضل وار نئدیم قارداش
نه عون و قاسم و جعفر نئجه گئدیم قارداش
.
.