مدح و جلالت امام حسین (ع) گریز به وداع حضرت ابوالفضل (ع)
.
✍️ #زبدةالاشعار ✍️
.
🆔: @nohe_torki
.
اسماعیل زرین
.
شهید کرب و بلانون عجب جلالتی وار
هامی اورکده اونون مهری وار محبتی وار
.
چه مسلم و چه نصارا چه شاه اولا چه گدا
یاخین گله اونا دارِینده سعادتی وار
.
حسین محبتی بیرحصن دور که داخل اولان
محاط امن اولی هر حیثدن که وحشتی وار
.
حسین محبّتی بیر حرزدور جهنم اودون
سالار اثردن اگرچه اودون حرارتی وار
.
حسین محبتی باران ابر رحمتدور
نه نوع شوره یره یاغسا خیر ورحمتی وار
.
حسین محبتی بیر کیمیادی دگسه اگر
بو تیره توپراقا ناقدلر ایچره قیمتی وار
.
حسین سراج منیر صراط حکمتدور
اونیله حقى تاپار هرکه روح حکمتی وار
.
حسین سپهر شریعتده مهر تاباندور
نفوذ و تابشی وار هاردا کفر ظلمتی وار
.
حسین فضای دیانتده بدر کامل دور
ستاره دوره ده بیرجمع باهمیّتی وار
.
بنای دینی حسین قانی ائیلدی محکم
اوقان نه قاندی اونون بیربویوک حکایتی وار
.
حسیندی کلمه توحیدی سطح غبراده
جلی خطیله یازوب قانیله کتابتی وار
.
آدی دوادی هامی درد بی مداوایه
فدا اولوم آدیناحق یانیندا حرمتی وار
.
خلیل حسینله خلّتده هم طراز اولماز
خدا یانیندا بونون فوق العاده خلّتی وار
.
خلیل کعبۀ اصلی بودور فداسنه باخ
بولر بونکته نی دلده اوکه بصیرتی وار
.
بیرینون اولمیا بوینوندا حج اعمالی
حسین زیارتنون حجّه اولویّتی وار
.
حسین مظهر یکتا عزیز طاها دور
پیمبرین بونا بی انتها محبتی وار
.
حسینُ منّی انا مِن حسین دیردی رسول
بو بیرخبردی محدثلر ایچره شهرتی وار
.
محبّ شاه شهیده خدای یکتادی
رجوع مقتله قیل بوذرین روایتی وار
.
خدایه سویگلودی چون حسین اودور سببی
حسینی ایستیه نین فوق العاده عزّتی وار
.
بلورسن هیچ نیه چوخدی مقامی عباسین
خدا یانیندا بئله شأنی وارشرافتی وار
.
حسینه چون او وفادار محبّ صادقدور
بلوردی چون بو محبّتده حق رضایتی وار
.
گوروب که عترت و قرآنه روز عاشورا
حمایت ائتماقنا یاخشی موقعیتی وار
.
او آی که حجت حقدور قالوب غریب و وحید
کتاب حقدی اونون احتیاج نصرتی وار
.
اودمده شوقیله ائتدی اوزون فنا فی الله
بو یولدا ئولماقینون گوردی چوخ سعادتی وار
.
بوفكره دوشدی ائده دینه نفسینی قربان
تاپا سعادت دارین اگرچه زحمتی وار
.
تمام زحمتى راحت بولوب ته دلدن
دوزوب بلایه گوروب حق یولوندا لذّتی وار
.
اوزون یتوردی حضور شه شهیدانه
ائیله حضور که شهلرده رشک حسرتی وار
.
اجازه ایستدی شهدن که ائتسون عزم جهاد
که دین یولوندا جهاد ائتماقین فضیلتی وار
.
خصوص ایله جهادی که تک قالوبدی امام
آلوبلا دوره سین اعدانین اکثریتی وار
.
امام گوردی که قارداشی اذن جنگ ایستور
گر ایسته سه گیده آردینجا درد فرقتی وار
.
که قارداش ایستوری آخر گئده ئولوم یولونا
شهید اولماقا حق اوسته چوخلی رغبتی وار
.
ولیک دار محبّتدن هست و نیستی گئدر
کیمون اونون کیمی بیر یار باصداقتی وار
.
محالیدور دوغا عباسی مادر گیتی
عزیز جانیدی حیدر کیمی شهامتی وار
.
هزار مرتبه جسمی تاپا فنا و بقا
فدا ائدر اونا دلده ز بس مودّتی وار
.
ائله صدیق جواندان چتیندی ال اوزماق
که آیریلق اودونون دلده آرتوخ حدّتی وار
.
بویوردی قارداشوی تک قویوب بیله گتمه
بو چولده قارداشووین گورموسن مصیبتی وار
.
من غریبه داخی قالمیوبدی یار و معین
بو بی کسه گوروسن روزگارون عسرتی وار
.
بو فاطمه بالاسی گوز تیکوبدی بیرجه سنه
بو لشکرین بولوسن که زیاده قدرتی وار
.
منیم داخی کمکیم قارداشیم ائلیم سن سن
ئولوبدی اوغلوم علی دلده داغ محنتی وار
.
دیدی نه چاره قیلوم قالمیوب داخی کمکون
سنه کمک لیقیمون ایمدی موقعیتی وار
.
باخاندا خیمه لره قیزلارون سوسوزدان ئولور
گئدنده رزمگه دشمنون شماتتی وار
.
سوسوز حرملریون ناله سی گویه اوجالار
سوسوزلوقون اولارا بسکه دلده شدتی وار
.
بو ناله لر داخی آرامیمی الیمدن آلوب
نجه بو حاله دوزر بیر نفر که غیرتی وار
.
امام گوردی که یوخ چاره صبر و تابی گیدوب
اگر چه وئرسه اجازه بیوک ملالتی وار
.
اجازه آخر اونا ایستر ایستمز وئردی
اگر چه آیریلوقون گوردی سخت حسرتی وار
.
ولیک سوز دلیله دئدی گئدور سن گئت
سوسوزلارا گوروسن که سوون ضرورتی وار
.
سوسوز اوشاقلارا بیر مشک سو تدارک ائیله
سو ویرماقین سوسوزا حق یانیندا اجرتی وار
.
اجازه حاصل اولوب مشکی آلدی دوشدی یولا
امامین امرینه مین شوقیله اطاعتی وار
.
گوروب که شوقیله قارداش گئدورئولوم یولونا
او راه پر خطری گتماقیندا سرعتی وار
.
بولوردی گلمیه جاق گتسه بیرده خیمه لره
دیدی دایان بو غریبون بیر اوزگه نیتی وار
.
پیاده اول که اولاخ بیرده قول بویون قارداش
بو آیریلق دمنون پر اسف بیر حالتی وار
.
محالیدور دوشه بیرده اله بوساعتمیز
نتیجه اخذ ائدر عاقل نقدر فرصتی وار
.
اولوبلا هر ایکی قارداش او دمده هم آغوش
خدا بولور او ایکی قارداشین نه حالتی وار
.
دویونجا آغلادیلار ترک ائدوب بیری بیرینی
دوشوب یولا گیدور عباسین عزم غربتی وارا
.
باخاردی قادراشینا شاه دین حسرتیله
بولوردی آردیجابو گتماقین شهادتی وار
.
هامی مصیبته دوزدی شهید کرب و بلا
بو دوزماقیندا بولوردی خدا رضایتی وار
.
حسین محبّتنی ساخلا سعی ائیله زرین
حسین محبّتنون آخرتده قیمتی وار
.
.
#عباسیه_اسماعیل_زرین
#حسینیه_مدح
#عباسیه_شهادت
#شهید_کرب_و_بلانون_عجب_جلالتی_وار
#ترکی
.
✍️ #زبدةالاشعار ✍️
.
🆔: @nohe_torki
نظر دهید