حسین بزمی جنتدی نه مافیا
.
#زبدةالاشعار
.
: @nohe_torki
.
محمدرضا نصیری میانجی
.
حسین نوکری ای حقون بنده سی
حسینون جهاندا نماینده سی
عملده دوز اول ، اولما شرمنده سی
اگر بیز بیر اولساخ بارینار حسین
عمل ده دوز اولساخ تانینار حسین
.
.
گورنده هاچان خائن هیئتی
دئنن بیز قبول ائتمروک ذلتی
دوشه قویما دلدن حسینیتی
دانیش ، آتما آدابوون پرچمین
اوجا ساخلا اربابوون پرچمین
.
.
گرکدور اورک دردینی دیل دیه
ملبس ائدوم قوی چوخون پردیه
سوزوم چوخدی تزویره سرکردیه
او کس که فقط فکری فتنده دی
ئولنده حسیندنده شرمنده دی
.
.
اودور نوحه پرداز و دسته باشی
دئسون یا ابوالفضل آخا گوزیاشی
طرف ائتمیه قارداشا قارداشی
اوزون یوخ ، فقط نور عینی گوره
حسینی حسینی حسینی گوره
.
.
حسینون آدین قویما یا اوستووه
قویوب ، سپمه رنگ ریا اوستووه
شرفدن توخی بیر قبا اوستووه
قوروب فتنه ، های سالما ای خود نما
حسین بزمی جنتدی نه مافیا
.
.
دئنن میلیونی پول قویان پاکته
آتوب ، ساتما هم شهرووی شهرته
حسینی فدا ائتمه جمعیته
بونا خاطر اولموش سبب دعوتون
فقط ایستیسون که دولا هیئتون
.
.
حسین بزمینی قوشما تشریفاتا
حسین چولده یاتدی بو ایشلر باتا
نه که سن کیمون لر مقامه چاتا
حفاظت اله بیل حرم جبهووی
آدین اوسته سیندیرما هم جبهووی
.
.
حسین مجلس با ریا ایستمور
قاپون آغزینیجان دولا ایستمور
دوز عاشق سچور مین قوا ایستمور
اقلیّتِ مقتدا آختارور
او یتمیش ایکی جان فدا آختارور
.
.
حسینه اولوب مقتدا روضه قوی
قویورسان اگر بی ریا روضه قوی
ائدوب قلبووی کربلا روضه قوی
غروری اورکدن سیلر گوزیاشی
اورک که دوزلدی گلر گوزیاشی
.
.
قاباخ چوخلاری اهل اعجازیدی
حسینیله هم سوز هم سازیدی
حسین عشقی دیلده حسین بازیدی
ولی ایندی چوخلار لقب ساز اولوب
حسینی آتوب نوحه خوان باز اولوب
.
.
گئدن هیئته نوحه خوانه گوره
جنانی ساتوبدور جهانه گوره
گئد هر بزمه صاحب زمانه گوره
بُت ائتمه اونی ، عشقووی مشق ائله
اوزون یاحسین دئ ، اوزون عشق ائله
.
.
سوزوم چوخدی نیلوم یورولما قلم
دانیش حق سوزی ساکت اولما قلم
الیمده بولوط مثلی دولما قلم
حسین ایندیده تکدی میدانیده
گوزی یوخ منافق مسلمانیده
.
.
او کس که آلاردی حسیندن نجات
قاچوب درگهیندن دئدی وار ممات
کرونا دن آلدیلا چوخلار برات
ووروب اوزلرینه کلک قاچدیلار
حسینی قویوب بی کمک قاچدیلار
.
.
قاچان دسته نون عشقی منحلّیدی
عیاری او عاشقلرون بللیدی
چوخون حسینی لیقی فصلیدی
قالوب شرمه والله یالاندان گلور
محرمده بش گون زوراندان گلور
.
.
دیین یوخ حسین معضلی نیلیور
ایکی گونلیک آب و گلی نیلیور
حسین سن تک آغ سقلی نیلیور
حسین نه عزایه رقیب آختارور
حسین مسلم ایستور حبیب آختارور
.
.
قاچیتما حسینیه دن ملتی
او یردن چوله چکمه جمعیتی
داغیتما ریایه گوره هیئتی
اصالت ایپین قیرما ای مدعی
قدیم رسمه ال ویرما ای مدعی
.
.
حسینیه نی جای کسب ایلمه
حسینوندی او خانه غصب ایلمه
فقط اون گونی قاره نصب ایلمه
گرک یاد ائدخ اُول شه بی کسی
گله هر گون اوردان حسین وای سسی
.
.
حسین بابینه اوخ ساچوب باغلاما
اوزون گِت ، گدنده قاچوب باغلاما
فقط اون گون ایلده آچوب باغلاما
بونی شمر ایستوردی طرحه سالا
قاپی باغلیوب شمری ویرما دالا
.
.
حسینون حسینیه سین باغلیان
یزیده اولوبدور علم ساخلیان
دل ماسوانی اودور داغلیان
وگرنه ائدر اهل حق اعتراض
حسینچی حسین درگهین باغلاماز
.
.
او یردن که هر هفته سس چخمادی
شب جمعه اول یرده اشک آخمادی
غم ایّامی اعضانی غم سخمادی
او یری دیون سیز نَیه اوخشادوم
نَیین من حسینیّیه اوخشادوم
.
.
اویان یاتما سنگر حسینونکیدی
چکوب باغلاما دَر حسینونکیدی
بو مسجد بو منبر حسینونکیدی
عناد ائتمه ، گویلر حسینونکیدی
بو دنیا سراسر حسینونکیدی
.
.
محافل معابد حسینونکیدی
مراحل مقاصد حسینونکیدی
مجالس مساجد حسینونکیدی
مریدان آگاه حسینونکیدی
خود کعبه والله حسینونکیدی
.
.
گل ای صاحب عصر ، صاحب زمان
دوتوب شیعه نون قلبینی لخته قان
اولوب گور کیم هیئتلره پاسبان
اوزون گل خلاص ایله چوخ هیئتی
تانیتدیر جهانه حسینیّتی
.
.
اوزون گل گور ایمان سیز انسانلاری
دئنن کیم سالوب بیربیره جانلاری
ندن توز باسوب جلد قرآنلاری
اوز ائوینده اللهدان هئچ قوتموسوز
نیا جدیمون روضه سین دوتموسوز؟
.
.
هانی غیرتوز ، همتوز ، عزتوز
ندن هر شب جمعه یوخ هیئتوز
سفارش مگر ائتمیوب حضرتوز
یری واردی هر گون اورکدن یانام
حسینی کیمه تاپشیروب گور بابام
.
.
گجه آغلارام من گونوز آغلارام
دیوب وای بابا سینمی داغلارام
حسینون عزاسین اوزوم ساخلارام
منه گوزیاشوز تازه نفس وئرر
منه چوخلاروز روضه ده سس وئرر
.
.
بی بیم زینبینده آلوب خیمه سین
آلیشدیرلار قیزلارین جامه سین
کیمون ویرسالار گور خانم عمه سین
گجه گوندوزی آغلیار آغلاماز؟
یانان سینه سین داغلیار داغلاماز؟
.
.
حریم اللهه اوخشار عباسیه
باباما گوزل اوخشار عباسیه
نقدری حسین وار ، وار عباسیه
وار اوردا عزا بی کفن جدیمه
گلوب آغلارام اوردا من جدیمه
.
.
گوروم سینماسین بزم وحدت لری
اوجالسین ، چوخالسین طراوت لری
بی بیم زینبه چوخدی الفت لری
آلوبدیلا نوکرلیقین سهمینی
دوتاللار هر ایل عمّمین ختمینی
.
.
اوز عمّمده بیر بزم عرفان دوتوب
یانان قبلینی غصه دن قان دوتوب
او صحراده شام غریبان دوتوب
اولده او اوخلی گوزی اوخشادی
اوزی نوحه قوشدی اوزی اوخشادی
.
.
دئدی گل باجون خانه بردوش اولوب
دونوب روزگاری فراموش اولوب
یانان خیمه اطفاله سرپوش اولوب
گوزوندن ایراق ائل آمان سیز قالوب
باجون خیمه سی پاسبان سیز قالوب
.
.
باشیمدا بلا وار اورک غمده دی
دیور چاره میز قیزلار عممه دی
منیمده گوزوم نهر علقمده دی
دوشوبدور حرم حیطه دشمنه
هامیمیز ابوالفضل دخیلوک سنه
.
.
(نصیری) ادب ساخلا استادووه
قلم چک سن اوندان قاباق آدووه
بویوردو دونن جمع اوتادووه
کیمون گر عملکردی اولسا قلیل
اوزون نوحه خوانلیقدا ائتمز دخیل
.
.
#حسینیه_نصیری_میانجی
#حسین_نوکری_ای_حقون_بنده_سی
#ادب #بزم_عزا #پندیات_ترکی #مجلس_عزای_حسین
.
#زبدةالاشعار
.
: @nohe_torki
نظر دهید