حضرت سلطان علی موسی الرضا #رضویه_حضرتی_ناعمی

ضمانت آهو
.
زبدة الاشعار
.
: @nohe_torki
.
علیرضا حضرتی(ناعمی)
.
حضرت سلطان علی موسی الرضا
سرور و سلطان مردان خدا
.
سبط ختم الانبیا و شاه طوس
نور چشم فاطمه، شمس الشموس
.
آیت حق، حجت پروردگار
رهبر دین، هشتم هشت و چهار
.
طلعتیندن اوخشویان پیغمبره
غیرتیندن شاه مردان حیدره
.
ایلین آفاقی نوری منجلی
وارث فضل و کمالات علی
.
مشهدی گوللی گلستان ایلین
طوسی رشک کوی رضوان ایلین
.
لطف ائدن سائللره ارزنده پای
گنبدیندن نور آلان هم گون هم آی
.
پر ویران صحن و رواقینده ملک
طوف ائدن دور حریمین نُه فلک
.
دائما دارالشفاسی باز اولان
زائری مستغرق اعجاز اولان
.
جامینون اهل ولا مستانه سی
آب کوثر، آب سقاخانه سی
.
آن سخنران رسول الله سرشت
با طلا باید کلامش را نوشت
.
گفت فرموده است حی لم یزل
در مقام ذوالجلالی این غزل
.
کلمه ی توحید چون حصن من است
از عذابم قائل آن ایمن است
.
لیک، گفت این قول، مولامان رضا
هشت مشروط ای مریدان ولا
.
شرط آن حبّ علی موسی المرتضاست
دوستیّ اهل بیت مصطفاست
.
یادگار پادشاه لوکشف
ملک ایرانه وئرن شأن و شرف
.
سسلسون یاضامن آهو مدد
درگهیندن ایلمز مأیوس رد
.
اولسا هر بیر مشکلون آسان ائدر
لطفیلن هر دردوه درمان ائدر
.
بحر رحمتدی او مولای عطوف
کان احساندی او سلطان رئوف
.
شهره ی عالمدی آهو قصه سی
ایلیوب مبهوت و حیران هر کسی
.
بیر گونی، بیر چؤلده اول صاحب وقار
گؤردی بیر آهونی صیّاده شکار
.
چیرپینور شدّتله قلب مضطری
دولموش اشک غمله زیبا گؤزلری
.
هی باخور اطرافه حسرتلن ملور
غصه لی رخساره گوزیاشین الور
.
ناگهان دوشدی گوزی اول حضرته
غم کشیده قلبی گلدی رقّته
.
اؤز دلیلن دردینی قیلدی بیان
سسلدی الغوث ای جان جهان
.
من بیر آهوی گرفتارم آقا
بی قرار و مضطر و زارم آقا
.
اولموشام قید بلاده دستگیر
جور دام صید صیّاده اسیر
.
گرچه شکوه م یوخ مشیّتدن منیم
بیر گلایم وار طبیعتدن منیم
.
سن ولی مولی ولی الله سن
دلده گیزلین دردیمه آگاه سن
.
علتی وار غملی ام پوزقون حالام
واردی بیر جوت شیرخواره گل بالام
.
ایندی بو صحراده سرگرداندیلار
غصه لی چؤللرده اشک افشاندیلار
.
بیلمورم هاردا قالوبلار آج سوسوز
ناله آفاقه سالوبلار آج سوسوز
.
اونلارین دردی منی درده سالوب
طاقت و آرامیمی الدن آلوب
.
قیل عنایت ای امام انس و جان
چاره قیل ای چاره ی بیچارگان
.
تا گئدیم اطفالیمه بیر باش چکوم
ایکّی پوزقون حالیمه بیر باش چکوم
.
ایلیم بو درده من درمان گلیم
صود وئریم دیلسیزلره اوندان گلیم
.
چون بو گفتاری ائشیتدی اول جناب
قیلدی اول آهونی مهریلن خطاب
.
غم یئمه سندن حمایت ایلرم
لازم اولسا گر ضمانت ایلرم
.
ئوز سورا صیاده دؤندردی آقا
دیل آچوب اول ثامن آل عبا
.
قیلدی فرمایش سنه وار بیر سؤزوم
فاش سنله ایلورم بو سرّ سوزوم
.
ائتموسن سن کی بو آهونی شکار
قلب ائوینده گؤر نه درد و رنجی وار
.
سربه سر القصه اول سبط النبی
کشف ائدوب صیاده یکسر مطلبی
.
بو سؤزی صیاد ائشیتدی قالدی مات
چون اونا مجهولیدی چوخلی نکات
.
باخدی مولایه دئدی کیم سن مگر؟
سرّ آهودن وئرورسن سن خبر
.
طلعتون نورانی گل رخسارسن
مرد حق سن واقف الاسرارسن
.
منده بیر صیادم ای مرد خدا
ایلیور شغلوم بو نوعی اقتضا
.
پاک روزیدن ساری قیللام تلاش
ایلورم بو یولدا امرار معاش
.
جانیم ای سرور فدا اولسون سنه
گؤز تیکوبدی اهل و اولادیم منه
.
قیلدی فرمایش او شاه ذوالکرم
منده اللهه سنون تک بنده ام
.
ایله سون بو لطفی الساعه اگر
قویمارام یئتسون سنه ذره ضرر
.
قیل رها بو آهوی دلخسته نی
برده عنوانیله دوت ساخلا منی
.
گئتسه بو آهوی خوش نقش و نگار
گلمسه، بازاره بو زاری آپار
.
سات غلامون، آل بهاسین خرج ائله
دوشمه سین اهل و عیالین مشکله
.
دولدوروب مهر و محبت جامینی
بو غزال نازین اوللام ضامنی
.
گؤردی چون صیاد امامین رأفتین
حضرتین قیلدی تقبّل صحبتین
.
آهوی مغمومی آزاد ایله دی
بندین آچدی قلبینی شاد ایلدی
.
سیلدی آهو قلبیدن گرد غمین
اؤپدی مولانین تراب مقدمین
.
اذن آلوب مولادن اولدی رهسپار
قاچدی صحرایه غزال بی قرار
.
یوللاری طی ایلدی چولدن چؤله
مقصدی تا کی یئتیشسون حاصله
.
راحت روحین گزوب مادر تاپوب
صودامر آهولرین آخر تاپوب
.
هر بیرین بیر گل مثالی ایگلدی
اونلاری ناز و نوازش ایلدی
.
اذن وئردی شوقیدن گؤزیاشینه
مهریلن دؤندی اولارین باشینه
.
برّه آهولرده گلدی رقّته
تؤکدولر اشک زلالی صورته
.
قلبیمیز دؤندی دیوردیلر آقا
باغریمیز یاندی هایاندیدون آنا؟
.
سؤز دئدی چوخدور قویون قالسون هله
واردی باشیمده منیم بیر مسئله
.
صودامون الساعه سیز آج سیز بالا
بو غذای پاکه محتاج سیز بالا
.
چون آنا محنتله گفتار ایلدی
برّه لر بو سؤزده اصرار ایلدی
.
وار نه دردون چوخ پریشان سان آنا
اشک ریزان سان نواخوان سان آنا
.
غم سنی معلومیدور دلدن سالوب
غصه لر آراموی الدن آلوب
.
فاش ائله بو اضطرارین علتین
بیر بئله شور و شرارین علتین
.
سویلدی ای نازنین سئوگوللریم
گؤزلریمون نوری، شیرین دیللریم
.
ایلیون دقت سیزه بیر سؤز دیوم
واردی تا عمروم نصیحت ایلیوم
.
بیربیروزدن سعی ائدون آیریلمیون
هر یئره باهم گئدون آیریلمیون
.
قوی سیزه فاش ایلیوم من مطلبی
قلبوزون تا آرتماسین تاب و تبی
.
الغرض دیل آچدی آهو موبه مو
اصل جریانی ائدوبدی گفت و گو
.
سویلدی بو مطلبی اوندان صورا
ایندی ضامندی منه مولا رضا
.
عهدیمه منده گرک ایفا ائدم
محضر مولایه الساعه گئدم
.
تا کی مولامیز علی موسی الرضا
عمق قلبیندن اولا بیزدن رضا
.
گلدیلر گفتاره آهو برّه لر
عرض ائدوبلر بو سؤزی خونین جگر
.
بیزده گللوک هر یئره گئتسون آنا
قلبیمیز دوندی بو محنتدن قانا
.
یاخشی فرصت ایلیوب ممکن فلک
محضر جانانه قوی بیزده گلک
.
خاک پاییندن ویراق بوسه اونون
فازَ فی هذا مقامِ الفائزون
.
بیربیره همراه اولوب اوچ ماه رو
وصل دلداری ائدوبلر جست و جو
.
محضر حضرتده حاضر اولدولار
کعبه ی آماله زائر اولدولار
.
گؤردی بو جریانی صیاد اولدی مات
عرض قیلدی ای امیر کائنات
.
ایلرم بو جانیمی قربان سنه
بلکه قربان عالم امکان سنه
.
کیم سن آیا سنده وار بو اقتدار
بو تصرّف، بو شرف، بو اختیار
.
سربه سر دنیا سنون حکمونده دی
آهوی صحرا سنون حکمونده دی
.
قیلدی فرمایش انا بن الفاطمه
حکمرانم عالمه هم آدمه
.
جدّ ذی جودیمدی سلطان امم
سبط طاهایم، امام هشتمم
.
شهرتیمدور حضرت شمس الشموس
میهمانم ، میهمان ارض طوس
.
حق یولوندا هر قدر گؤرسم بلا
راضی ام، ائتمم گلایه برملا
.
کلمه ی توحیده شرط لازمم
من علی بن امام کاظمم
.
پؤزدی بو مطلب منیم احوالیمی
جاری ائتدی گؤزدن اشک و آلیمی
.
آغلارام شمس الشموسین حالینه
حضرت سلطان طوسین حالینه
.
دیلسیز حیواندان حمایت ایلدی
غملی آهونی ضمانت ایلدی
.
آهیم اوج ایلر غمینده سینه دن
دوغرانوب اکبادی زهر کینه دن
.
ظلمیله مأمون ملعون و دنی
ائتدی مسموم اول گل صدیقه نی
.
بزمیدن خارج اولان وقتده آقا
باشینه چکدی عباسین دلده وا
.
زهر کینه حضرته ائتدی اثر
سربه سر اعضاسینه دوشدی شرر
.
پیچ و تابه دوشدی اودلاندی آقا
شعله چکدی زهر الولاندی آقا
.
گاه اوتوردی گاه دوردی چکدی آه
گه یئره گاهی گویه قیلدی نگاه
.
گاه شکر ائتدی دوشوب گاهی غمه
گه دئدی گل دادیمه یافاطمه
.
غربت ائلده غصه دن یاندیم آنا
یاوریم یوخدور الولاندیم آنا
.
گه دئدی گل هارداسان اوغلوم جواد
اولموشام من باغریقان اوغلوم جواد
.
انتظارم گؤزلریم یولدا قالوب
طاقت و آرامیمی غملر آلوب
.
گه دئدی معصومه جان امداده گل
باشیم اوسته ناله و فریاده گل
.
غصه دن دل داغلیان یوخدور منه
باجی ئولسم آغلیان یوخدور منه
.
الغرض اول سید محنت نسیب
منزله وارد اولوبدور بی شکیب
.
قاپلاری قیلدی اشاره باغلیون
بو غریبون حالینه دل داغلیون
.
بیرده حاضر ایلیون بیر تشت غم
اود دوشوبدور سینمه خونین دلم
.
حال زاریم غملی، قلبیم یاره دی
یانمیش اکبادیم منیم صدپاره دی
.
تشت اولوب آماده گلدی محضره
خلق اولوب اول دم اسفلی منظره
.
دست محنت روضه ی غم بسلدی
فاطمه ایوای بالام وای سسلدی
.
شیونه گلدی ملکلر عرشیده
عرشیده دولدوردی ناله فرشیده
.
تشته اگدی باشینی اول دیده تر
پاره پاره گلدی آغزیندان جگر
.
سوز و سازیندن الولاندی رضا
یاندی بو غمدن امام مجتبی
.
گؤزیاشی رخساره آخدی حضرتین
قلبیده گیزلتدی درد غربتین
.
گؤز دولاندیردی پریشان صاق صولا
باخدی حسرتلن غریبانه یولا
.
زیر لب اول سید زهرا نژاد
بیر دئدی گل جان دوداقیمده جواد
.
آز زمان کچدی خدای ذوالجلال
اول غریبه وئردی امکان وصال
.
بار وئردی نخل عشقین خوللاری
بیر قدم اولدی مدینه یوللاری
.
گؤز ویریم آندا او یوللار طی اولوب
ناب می دن ساغر وصلت دولوب
.
باشینون اوسته شهنشاه غریب
گؤردی مهریلن اولوب حاضر حبیب
.
مهربانانه جواد مهربان
باشی اوسته اگلشوب اشکی روان
.
وار یئری دنیا غمین باشدان آتا
گؤرسه اؤز اوغلون او حالدا هر آتا
.
پای تا سر ایلدی رؤیت بویون
نوجوان اوغلویلان اولدی قول بویون
.
ایگلدی ئوپدی دُرِ یک دانه سین
باغرینا باسدی گوزل جانانه سین
.
دیندیروب هر بیر سؤزونده جان دئدی
جانیم اولسون آدوه قربان دئدی
.
یاخشی گلدون آخرین دمده بالا
قویمادون غربت غمی دلده قالا
.
دردیمی جان اوسته درمان ایلدون
مرگیمی وصلونله آسان ایلدون
.
همدمیم اولدون منیم ای ماه رو
هر آتا ایلر بو وقتی آرزو
.
جان وئرن وقتده جوان اوغلی گله
قلبی دنیانین غمیندن دینجله
.
.
#گریز
#اکبریه_شهادت
.
باغریما بو غم وئروب اود الغرض
کربلاده اولدی بو جریان عوض
.
یعنی زهرانین یارالی دلبری
تاپدی جان اوسته علیّ اکبری
.
گؤرجاقین اول شبه ختم مرسلی
وای دئدی قلبیم الولاندی علی
.
چوخ چتیندور دردون آل یاسینه
غرق اولوبسان گؤر نه قان دریاسینه
.
دوغریوبدور جسموی شمشیر لر
صف چکوبدی سینون اوسته تیر لر
.
گؤزلرون قربانی ام آچ گؤزلرون
عشق سرگردانی ام آچ گؤزلرون
.
کوفیان پرکینه سودا ایلیوب
گل وجودین ارباً اربا ایلیوب
.
چشمه چشمه هر یئریندن قان جوشور
آیه آیه سوره ی قرآن جوشور
.
اوخلی سینون جنته اوخشار اولوب
تجریُ مِن تحتها الانهار اولوب
.
قیرمیزی قان ایلیوبلر جامه وی
باشداکی پیغمبری عمامه وی
.
سس وئرن یوخدور منه سس وئر علی
دولدوروب غملر بو قانلی مقتلی
.
هر قدر یالواردی مولای غریب
وئرمدی سس اول جوان غم نسیب
.
نوحه خوانیدی نواییلن حسین
شهقه چکدی ناگهان اول نور عین
.
باشینی آلدی دیز اوسته وای دئدی
آه چکدی اکبریم لای لای دئدی
.
ئوز گؤزوندن سیلدی لخته قانلارین
پاک قیلدی لبلرین دندانلارین
.
ئوز ئوزه قویدی دئدی یاندیم علی
گؤز ندن آچمورسان اودلاندیم علی
.
باشون اوسته گؤزیاشیم گؤزدن آخور
کوفه نون اشراری دورت یاندان باخور
.
دشمن ایچره قیل مراعات حالیمی
گل منه گولدورمه شمر ظالمی
.
.
#رضویه_مدح
#رضویه_شهادت
#حضرت_سلطان_علی_موسی_الرضا
#حضرتی_ناعمی
#ترکی
.
#زبدةالاشعار
.
: @nohe_torki