زبدةالاشعار

خامه الیمده یازماقا عنوان تاپانمادی #حسینیه_انور_اردبیلی

تنهایی حضرت ابا عبدالله الحسین علیه السلام در روز عاشورا
.
.
.
مرحوم انور اردبیلی
.
.
.
/// اشاره به درد دل شاعر///
.
خامه الیمده یازماقا عنوان تاپانمادی
مرغ خیال سیر گلستان تاپانمادی
.
امواج غصه لنگه سالوب دل سفینه سین
گرداب غمده ساحله امکان تاپانمادی
.
دل آرزو ایدر اوزونه دلبرین سوزون
جان تنگه دوشدی جلوه جانان تاپانمادی
.
آیری هدف یوخومدی هدف بیر حسینیدور
هرکیم حسینچی اولمادی امکان تاپانمادی
.
هر مرده جسمیدن اوجالا عطری زنده دور
کیمدور حسینه آغلادی رضوان تاپانمادی
.
ایتدی ایله تعهدینه مو به مو عمل
معبودی مرحبا دیدی نقصان تاپانمادی
.
قرآنه صودامر بالاسین ایلدی سپر
کرب و بلاده قائل قرآن تاپانمادی
.
تک قالدی عرصه ده دیدی وار سس ویرن منه
دشمن ایچینده رحمیلی انسان تاپانمادی
.
ئولموشدی لشگرون نجه من روحی بولمورم
عیسی نفس دانیشدی اولار جان تاپانمادی
.
هر دردمنده تربتی درمان اولان حسین
درد دل ایتدی دردینه درمان تاپانمادی
.
.
///ندای ” هَل مِن ناصِر ” حضرت اباعبدالله الحسین علیه السلام///
.
هر دردمنده تربتی درمان اولان حسین
درد دل ایتدی دردینه درمان تاپانمادی
.
اطرافه باخدی گورمدی پیر و جوانلارین
گلدی مخاطب ایتدی قوم اوسته یاتانلارین
.
ای قانه غرق اولان شهدا سس ویرون منه
یالقوزلیوب حسینی بلا سس ویرون منه
.
سیز که عیالوزه منه خاطر دیدوز طلاق
اولدی ایویز یولومدا فنا سس ویرون منه
.
ای با وفا ظهیر و یا مسلم و حبیب
مردان عشقباز خدا سس ویرون منه
.
چوخ لشگریم واریدی داغیلدی کیچن گیجه
سیز گیتمدوز ای اهل وفا سس ویرون منه
.
قیزلاریمون ایشیدمیوسوز آغلاماقینی
روحوز سیزون گیدوبدی هارا سس ویرون منه
.
اولمازدی من سیزی چاغورام بی جواب اولام
حتما سیزی یوروبدی یارا سس ویرون منه
.
سعد اوغلی تک گوروبدی حسینی نه یاتمیسوز
ایستور قوشون خیامه دولا سس ویرون منه
.
بو قدری لشگری دیوری کیمدی قیترن
غش ایلیوبدی زین العبا سس ویرون منه
.
.
///اظهار شکایت حضرت اباعبدالله الحسین از فرقه شریر به شهدای کربلا///
.
.
بو قدری لشگری دیوری کیمدی قیترن
غش ایلیوبدی زین العبا سس ویرون منه
.
رسم عربله جنگ ایلمور فرقه شریر
نا اهل لشگره نجه گور اولموشام اسیر
.
سالمون منی فشاره دیدیم ویردیلار منی
حق سوز بو اهل ناره دیدیم ویردیلار منی
.
گل لر سولوب ایوی یخیلان باغبان کیمی
قلبیم سوزینی خاره دیدیم ویردیلار منی
.
زهرا آنامدی خاتم پیغمبر اوغلیام
بو قوم حیله کاره دیدیم ویردیلار منی
.
قرآنیدن دلیل گتوردوم بو لشگره
آیه دیدیم اشاره دیدیم ویردیلار منی
.
روم و فرنگه یول ویرون اولسون سیزون عراق
من گلمرم دوباره دیدیم ویردیلار منی
.
گتدوم خیامه قیزلاریم آغلاتدیلار منی
گلدوم بو قومه چاره دیدیم ویردیلار منی
.
سیزدن صورا من اصغری گتدیم سو آلماقا
یاندی بو شیرخواره دیدیم ویردیلار منی
.
بیر اوخ گلوب ایکی میزیده ایلدی هدف
حلقومی اولدی پاره دیدیم ویردیلار منی
.
آچدوم قماطنی یره قویدم چالیخلادی
وای تز باتان ستاره دیدیم ویردیلار منی
.
ایتدوم جدایه تکیه بر آز بلکه دینجلم
درد دلیمی یاره دیدیم وردیلار منی
.

متن پیشنهادی:  یازاندا خامه غم بی شمار زهرادن #فاطمیه_خوندل_تبریزی

.
///لبیک گفتن شهداء کربلا به ندای ” هَل مِن ناصِر ” حضرت اباعبدالله الحسین///
.
ایتدوم جدایه تکیه بر آز بلکه دینجلم
درد دلیمی یاره دیدیم وردیلار منی
.
ترپندی ناگهان شهدانون جنازه سی
نیم خیز اولوبلا ایستدیلر جنگ اجازه سی
.
فخر ایلوروق یولوندا سوسوز چیخدی جانیمیز
اولدی نثار مقدمیوه آخدی قانیمیز
.
لبیک یا بن فاطمه ایسته اللهیدن
بو دوغرانان بدنلره گلسون روانیمیز
.
دورونده صف چکوب قاباقوندا قلج ووراق
ذره غم ایتمه سن سن امام زمانیمیز
.
اول بلی دیوبدی بیزیم روحیمیز سنه
عشقون اولوب بیزیم شرف جاودانیمیز
.
هر قطره قانیمیز گینه ده یا حسین دیر
مین یول اگر کسیلسه رگ و استخوانیمیز
.
حضرت بویوردی خوشدی یروز خواب ناز ایدون
آز قالدی مقصده یتیشه کاروانیمیز
.
صبر ایلیون قوناقلیقا با هم گلوم گیداخ
جنتده سفره سین دوشیوب میزبانیمیز
.
طوبایه بیز گرکدی گیدوب سایه بخش اولاق
گرچه بو چولده اولمیاجاق سایه بانیمیز
.
بیر آیری میزباندا منیم واردی کوفه ده
زهرا آناملا اوردادی غم آشیانیمیز
.
کچدی بیر آز یخیلدی حسین وعده گاهینه
گوزدن گرک آخا یوزه اشک روانیمیز
.
.
///نزول حضرت قابض الارواح به زمین کربلا///
.
چوخلار گلوب قیتدی دوشوب عرشه ولوله
ایتدی نزول قابض الارواح مقتله
.
باخدی شهید عشقه دوشوب اختیاریدن
عذر ایستیوبدی حضرت پروردگاریدن
.
من عاجزم دیدی بو شهون قبض روحنه
اعضاسی گل کیمی داغیلوب نیش خاریدن
.
آنی یارا بوغازی یارا سینه سی یارا
مشگلدی جان آلام بیله بیر زخمداریدن
.
دل خشک اولوب دوداق قوریوب نطقدن دوشوب
پرده سالوب محاسنه گرد و غباریدن
.
قلبندن اوخ دیوب کورگیندن کنار اولوب
قانلو گوزون یوموب آچا بیلمور فشاریدن
.
چوخ جانلار آلموشام بو قدر ایتمیوب اثر
چوخلار ئولوبدی الده گیدوب روزگاریدن
.
گورموبدی گوزلریم بیله بیر دوغرانان بدن
اعضاسی بیر بیره قاریشوب سنگساریدن
.
هی دقت ایلورم بونا صاف یر تاپانمورام
دشمنلری گینه اوخ آتولار کناریدن
.
من جان آلانمارام آناسی جان دیور باخور
معجر آچوبدی منظره احتضاریدن
.
ناگه خطاب اولدی چکیل دور کناریده
محبوبیمی اوزوم قوتاروم انتظاریدن
.
اوز سویگولومدی حسین من بیلورم قدر و قیمتین
قیمتلی دور قانی منه ویرسونله نسبتین
.
.
.
#حسینیه #انور_اردبیلی
#حسینیه_شهادت #ای_قانه_غرق_اولان_شهدا_سس_ویرون_منه
#خامه_الیمده_یازماقا_عنوان_تاپانمادی
#ترکی
#زبدةالاشعار

متن پیشنهادی:  او گونکه اهل حرم ایتدی قتلگاهه گذار #کوچ_کربلا #خوندل_تبریزی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی