محبّت امام حسین (ع) در قلوب مومنین
اِنَّ لِلحُسَین مَحَبَّةً مَکنونَةً فی قُلوبِ المُؤمِنینَ
ماجرای #اباذر و #سلمان
#گریز #شام_غریبان
.
✍️ #زبدةالاشعار ✍️
.
🆔: @nohe_torki
.
مرحوم سعدی زمان
.
بلای عشقیله یارب دولوبدی بو رگ و پوست
اولیدی کاش منه بیر نفر حقیقی دوست
.
گوریدی اولموشام عالمده عشق بیماری
اولیدی غملی گونیمده شریک غم باری
.
ایدیدی فکریمی اشغال گردش زمنه
سیلیدی گوز یاشیمی تسلیت ویریدی منه
.
نه وار شریک غمیم نه وفالی غمخواریم
نه دردیمی بیلوری جان شکار دلداریم
.
هارا گیدیم کیمه اوز دردیمی ایدیم اظهار؟
یوخومدی چاره گرک گوزلریم اولا خونبار
.
گینه امام حسینه گرک پناه آپارام
اونون حضورینه اشک تریله آه آپارام
.
حسین گلشن عشقین شکفته بیر گلیدور
خدای قادر و سلطان عشقه سویگلیدور
.
دگل بو مسئله بی مدرک عین صحّتی وار
بو سوز که عرض ایدورم معتبر روایتی وار
.
یازولّا بیر گون ابی ذر او پیر پاک خصال
گلوبدی منزل سلمانه چوخ پریشانحال
.
دئدی سنی بولورم من جهاندا حافظ راز
اودور سنه ایدورم سرّ قلبیمی ابراز
.
بو دردی من نچه مدّتدی ایتمیشم پنهان
واریمدی خوف اولا بو درد صدمهء ایمان
.
ویروب جواب اونا سلمان که قیل غمون اظهار
قالار اورکده منه کشف اولونسا هر اسرار
.
دئدی ابی ذر او دمده بودور او گزلین راز
که اود ویروب دلیمه ایلنمورم ابراز
.
محمّد عربینی خدای عزّ و جلّ
تمام ما خلق اللهدن ایدوب افضل
.
اونون وصیّی بو امّت امامی حیدردور
ولیّ مطلق و پیغمبره برابردور
.
علاوه امر ایلیوب حق پیمبر امّتینه
حصار امن و امان مرتضی ولایتینه
.
پیمبرین قیزی زهرادی پاک و معصومه
محبّتی بیزه واجب جهانه مخدومه
.
امام مفترض الطّاعه دور حسین و حسن
که یوزلری اولارین گلدی زلفی رشک سمن
.
اگر چه هر بیرینه قلبمیمون محبّتی وار
حسینی چوخ سوورم بولمورم نه علّتی وار
.
حسینون علقۀ مخصوصی دلده مبهمدور
اوزیمده بولمورم آیا که بو نه عالمدور
.
حسینون آدینا دلده مدام مشقیم وار
حسینه آند اولا آللهه اوزگه عشقیم وار
.
حسینی چوخ سوؤرم بسکه من تهِ دلدن
بو حبّ قورخورام ایمانیمی آلا الدن
.
حسینون عشقی طناب قراریمی کسوری
آدی گلنده دلیم برگ بید تک اسوری
.
ایله محبّتی جاگیر اولوبدی جانیمده
که ایلیوبدی تصرّف بو آد روانیمده
.
ابی ذرین بو کلامین ایشتدی تا سلمان
گلوب تکلّمه اول پیر کامل الایمان
.
دئدی غم ایتمه که اولدوخ غریبه هم اسرار
حسینه سنده اولان شور عشق منده ده وار
.
نه تک مؤثر اولوبدی بو شور عشق سنه
مریض عشق حسینم حسیندن دئ منه
.
بولورسن اوزگه لریله من اولمارام تطبیق
منیم دیانتیمی مصطفی ایدوب تصدیق
.
درخت دین خدایه دلیمده ساقم وار
حسینه هامیدان آرتوخ منیم علاقم وار
.
او بش نفر که دیوللر اولاره آل عبا
محبّتین اولارین واجب ایلیوبدی خدا
.
بشینیده آئینۀ حق نمائیله گورورم
او بش نفرده ولیکن حسینی چوخ سوورم
.
دیوبله بیر بیره سلمان و بوذر او دمده
بیز اولدوق ایمدیکه هم درد بو بیوک غمده
.
پیمبرین قیزینا گل گیداخ دیاخ بو سوزی
ایدر بو مسئله نی حلّ اوغول آناسی اوزی
.
گلوبدی هر ایکیسی دودمان زهرایه
ایدوبله کشف قضیّه بتول عذرایه
.
جناب فاطمه مطلبدن اولدی تا حالی
گلوب محبّتی جوشه پوزولدی احوالی
.
بیوردی گوزلریمون نوری دور حسین و حسن
اولاره گر چه اورکدن علاقمندم من
.
آتامدی مصدر لولاک احمد محمود
ولیّ مطلق ایدوبدور عم اوغلومی معبود
.
بولار خلایق آرا برگزیده دور بولورم
سیزون کیمی ولی منده حسینی چوخ سوورم
.
حسین عزیز دلیم مایهء فتوحمیدی
حسین جسمده جانیم حسین روحیمدی
.
دلیم رضا دگی پای حسینه خار باتا
یوورار گوز یاشی گر زلفینه غبار باتا
.
سحر که باد صبا زلفینه گذر ایلر
پوزار نظامینی زهرانی بی قرار ایلر
.
بولار بو سوزده او دم قدرت جلی گلدی
اسیر عشق حسین مرتضی علی گلدی
.
اولوب قضیّه دن آگه او شاه دریا دل
بیوردی بوذر و سلمانه اولمیون غافل
.
سیزون کیمی منه ده سوز عشق ائدوب تأثیر
حسینون عُلقۀ مخصوصی ایلیوبدی اسیر
.
حسین کیمی هانی بیر کس که دلربا اولسون
حسینه کاش آتاسی علی فدا اولسون
.
او قلبلرده که مؤمندیلر ائدوب انفاق
قویوب ودیعه حسینون محبّتین خلّاق
.
بو روزگارده مؤمن لرین امیری منم
اودور هامیدان آرتوخ حسین اسیری منم
.
تمام خلق آرا منظور بیر حسینیمدی
حسین چکیدۀ روحیمدی نور عینیمدی
.
تمام خلق آرا منظور بیر حسینیمدی
حسین چکیدهء روحیمدی نور عینیمدی
.
گوروبله مسئله معضلدی حلّی چوخ مشکل
دیوبله ایلیه لازمدی حل ّ ختم رسل
.
حسینه دلده اولان گزلین اشتیاقیله
گلوبله محضر طاهایه اتّفاقیله
.
قضیّه کشف اولونوب ختم انبیا بولدی
بویوردی مسئله باریک حلّی مشکلدی
.
او مسئله که ایدوبسوز سؤاله سیز عنوان
وارام او مسئله ده منده سیز کیمی حیران
.
حسین قلبمیون آرامیدور عزیزیم دور
حسین مردمک چشم اشک ریزیمدور
او قدر کی سیزه حبّ حسین ایدوبدی اثر
حسین محبّتی قلبیمده وار یوز او قدر
.
حسینه جدّی فدا بو حسین روانیمدور
حسین جسمده جانیمدی قانی قانیمدور
.
گلوب او حالده پیک خدای ربّ جلیل
یتوردی وحی خدانی پیمبره جبریل
.
دئدی پیمبره وار خالقین سلامی سنه
سلامدن صورا وار بیله بیر پیامی سنه
.
حسین مشیّتیمه شاهد قرینیم دور
حسین ذاتیمه محبوب هم حبیبیم دور
.
حسینیمی سوؤَه هر پاک بنده چوخ سوورم
نه تک محبّتی وار سیزده منده چوخ سوورم
.
#گریز #شام_غریبان
.
حسین محبّتنون شرح و بسطی مشگلدور
حسین گلشن آل عباده بیر گلدور
.
همان حسین که اونی چوخ سوردی پیغمبر
اوزینه سویگلی ایتمیشدی خالق داور
.
همان حسین که علی گوزلرینده نوریدی او
بتول قلبینه سرمایۀ سروریدی او
.
سپاه کوفه باشین کسدی پیکرین سویدی
یارالی پیکرینی یرده بی کفن قویدی
.
نه چکدی آل عبا بولمورم بولر خالق
گورنده جسم حسین گل کیمی اولوب اوراق
.
گوروبله یاس دوتان یوخ امام ممتحنه
دوتوبلا شام غریبان او شاه بی کفنه
.
صدا صدایه ویروب وا حسین دویوبله تمام
قیامت ایلدی گودال قتلگهده قیام
.
دیوم نه شام غریبان نه شیون جانکاه
ووراردی باشه او مجلسده اولیاء الله
.
الینده ساچلاری دلده فغان واولدا
رسول اکرمه عرض ایتدی حضرت زهرا
.
حسین مصیبتی زهرانون اختیارین آلوب
بالامی گور بابا امّتلرون نه حاله سالوب؟
.
دئمه قیامته دین آه و ناله دن دویارام
اجازه ویرسن اگر قانه زلفیمی بویارام
.
ایشتدی تا بو سوزی چکدی آه آتشبار
بویوردی فاطمیه جدّی اختیارون وار
.
بو قانی زلفوه یاخسان دیمه دوروب باخارام
بو قان بهالیدی منده عذاریمه یاخارام
.
اجازه آلدی خانم اذن ویردی گوز یاشنا
ازلده دولاندی او باشسیز جنازه نین باشنا
.
شرار آهیله دنیانی یاندوروب یاخدی
باتوردی اللرینی قانه زلفینه یاخدی
.
اوزینی سالدی او نعش اوسته زار و دلخسته
دوشه دی ساچلارینی قانلی سینه سی اوسته
.
دئدی اوغول سنه قربان اولا آنان زهرا
ایاقه دور که گلوب قامتی کمان زهرا
.
بو نازنین بدنون سربسر اوغول یارادی
دئ بیر گوروم سنی کیم بیله قانوه بویادی
.
سنی تانومادی یوخسا بو فرقۀ عدوان
که کسدیلر سو یانندا باشون سوسوز دالیدان
.
مگر اوغول دئمدون گلستان دین گلییَم
پیمبرین بالاسی کردگاره سویگلیَم
.
مگر اوغول دیمدون من عزیز زهرایم
بدنده روح روان بتول عذرایم
.
اوغول گوزوم نجه گورسون بو دوغرانان بدنی
سالوبدی هانسی ستمگر دنی بو حاله سنی
.
.
بو دوغرانان بدنون دور اوغول سرون هانی بس؟
ندن بو حاله قالوبسان کومکلرون هانی بس؟
.
سنوبدی لشکر علمدار ئولوب یاتوب علمون
علی عزیزی علمدار لشکرون هانی بس؟
.
دوراردی صاق طرفونده همیشه اوغلون علی
سپهر حسن و وفا ماهی اکبرون هانی بس؟
.
بلا کشیده قیزیم زینبه اوغول نه گلوب
اسیر قوم جفاجو حرملرون هانی بس؟
.
دئمم نه ظلمیدی بیر سینه دورت مین اوخ یاراسی
نه سینه مخزن اسرار داورون هانی بس؟
.
اولیدی کاش اوغول ساربانون اللری شل
بیلک لرون بویانوب قانه اللرون هانی بس؟
.
دیوب بو سوزلری اولدی بتول دلخسته
دوروب اوتوردی او باشسیز بدن دیزی اوسته
.
رسول اکرمه تعظیم اوچون قیام ایلدی
کسوک بوغازیله اوز جدّینه سلام ایلدی
.
او مجلسیکه عزاخانۀ حقیقتیدی
او بزمه صاحب عزا خاتم رسالتیدی
.
حسین سسیله حجابات نُه فلک دولدی
اوزی اوزینه او مجلسده روضه خوان اولدی
.
مخاطب ایلدی اوز جدّینی بصوت صریح
بو دللریله مصیبت لرین ایدوب تشریح
.
خدایه آند اولا ئولدوردولر کومک لریمی (1)
ستمله دوغرادیلار پاره پاره اکبریمی
.
گوزوم باخا باخا قارداشلاریمی دوغرادیلار
الیمدن آلدیلا اعوان و یار و یاریمی
.
ایکی قولونی کسوب یخدیلار فرات اوسته
آتام برابری عبّاس امیر لشکریمی
.
بهار عمریمه اسدیردیله سموم خزان
نه قویدولار قالا بیر سرو نه صنوبریمی
.
کیچیک اوشاقلاریمز ظلم الیله ذبح اولدی
الیمده اوخلادیلار شیر خواره اصغریمی
.
ورولدی خیمیه اود قیزلاریم داغلدی چوله
آچیلدی غارت الی سویدولار حرملریمی
.
آنام بتولده سنده آتامدا حاضریدوز
کسنده باشیمی دشمن سو یانندا پیکریمی
.
کسوبله بارماقیمی بیر اوزوکدن اوتری بابا
بیان ایدوم سیزه هانسی ملال و غملریمی
.
یارالی سینمون اوستنده آت چاپوب اعدا
شکست ایدوبله گوزوندن ایراق سومکلریمی
.
گونوز اولوندی او که ظلمیدی تمام اولدی
گجه زمانی کسوب ساربانیم اللریمی (2)
.
گلوب «حسینی» منیم آستانمه نوکر
ذلیل ایستمرم من جهاندا نوکریمی
.
جزا گونی باشینا تاج سلطنت قویارام
نشان ویرنده منه الده نوحه دفتریمی
.
(1)و (2) یا جداه قتلوا و الله رجالنا، یا جداه سلبوا و الله نسائنا، یا جداه نهبوا و الله رحالنا، یا جداه ذبحوا و الله اطفالنا
.
.
#ورود_محرم
#حسینیه_سعدی_زمان
#حسینیه_مدح #حسینیه_شهادت #شام_غریبان
#بلای_عشقیله_یارب_دولوبدی_بو_رگ_و_پوست
#ترکی
#چهارده_معصوم_حسینی ص 173
.
.
✍️ #زبدةالاشعار ✍️
.
🆔: @nohe_torki
نظر دهید