دیر راهب
..
..
حاج اسماعیل زرین
..
..
خانۀ ایمانی اهل کوفه ویران ائیلدی
کربلاده شاه دینی قانه غلطان ائیلدی
..
داندیلاراللهی دینی حشرونشری برملا
حب دنیائیله دنیا اهلی طغیان ائیلدی
..
بیر جنایتلرائدوبلر کوفیان دین تباه
عالم اهلین بو جنایت لر پریشان ائیلدی
..
داغ بر دل ائتدی زهرانی گروه کینه جو
مصطفانین گوزلرین معناده گریان ائیلدی
..
نیم روز ایچره حسینون کسدیلر عطشان باشین
سو کنارینده سوسوز ترک سروجان ائیلدی
..
باشینی نوک جداده گزدیروبلر هر یری
گون کیمی باشی جداده نور باران ائیلدی
..
اهل بیتین ظلم الیله کوفیان بی حیا
دیده گریان چون اسیر روم و ایران ائیلدی
..
پردۀ عصمتده عزّتلر گورن خاتونیلر
تاپمادی معجر یوزون زلفیله کتمان ائیلدی
..
مصطفانین چکدیقی زحمتلرینون اجرینه
امّت بی آبرو ظلمیله جبران ائیلدی
..
حضرت زهرا چراغین اشقیاخاموش ائدوب
شهرلرده عیش و عشرتله چراغان ائیلدی
..
کوفه شهرینده ایشیق گون گوزلرینده تاراولوب
بسکه چوخ ظلم و تعدّی قوم عدوان ائیلدی
..
کوفه ایکه مرتضی بش ایل خلافت ایلیوب
لطف و احسان اهلینه هر وقت و هر آن ائیلدی
..
باخ وفای کوفیانه اهل بیت اطهرین
ظلم الیله كوفه ده محبوس زندان ائیلدی
..
زادۀ مرجانه ظلم و جوریده حدّن گیچوب
ائتدیقین ائتدی دیمه بیر ذرّه نقصان ائیلدی
..
اهل بیتین یولّادی شاماته عریان ناقه ده
ساربانلار سیریده سعی فراوان ائیلدی
..
دشمن بی رحم الینده دستگیر و دلغمین
آج سوسوز گوندوز گیجه سیر بیابان ائیلدی
..
شهرلردن بعضی سی پیشواز ائدوب عید ائتدیلر
بعضی نون اهلی بولوب فریادوافغان ائیلدی
..
گونده مین دفعه قیامت اولدى آل حیدره
هر قیامت چوخ قیامتلرنمایان ائیلدی
..
گه پیاده گه سواره یول گئدوبدور اهل بیت
نه تحمل بولمورم اطفال نالان ائیلدی
..
اهل بیتیندن حسینون یولدابعضی فوت اولوب
تیره توپراق هربیرین بیر پرده پنهان ائیلدی
..
بومراحل زینب کبرایه چوخ مشکل اولوب
سروتک قدّین مصیبت اگدی چوگان ائیلدی
..
چونکه درد و غم شریکیدی حسینه بوخانم
چون حسینون قلبی قلبین درد و غم قان ائیلدی
..
طیّ ائدوبلر یولّاری چوخ زحمتیله صبح و شام
تا گلوب بیریرده منزل آل سفیان ائیلدی
..
اوردا بیردیر نصارا واریدی معلوم اولان
استراحت اوردا قوم سست بنیان ائیلدی
..
شاه دینون نازنین باشین جدایه وئردیلار
دشتی روشن شه باشی چون ماه تابان ائیلدی
..
نازینین باشلاری گویا که حراست ائتماقا
شه باشین بی شرملرشمع شبستان ائیلدی
..
بیرده بومشهوردور صندوقیدیدی شه باشی
شه باشین گویا حراست اوردا دونان ائیلدی
..
عیش و نوشه اولدولار مشغول او قوم دین تباه
عقلینی زایل او جمعین حكم شیطان ائیلدی
..
تا او وقت اولدی آچیلدی سفره صرف اولسون طعام
بیر قضیه یوز ویروب حضّاری ترسان ائیلدی
..
گوردولربیر ال نمایان اولدی ناگه بوسوزی
قانیله دیواره یازدی بیله عنوان ائیلدی
..
وار امیدی دلده آیا امّتی که تشنه لب
ئولدوروب پیغمبر اغلون قانه غلطان ائیلدی
..
شافع روز جزا ائتسون شفاعت حشرده
آند اولا اللهه بونلار فکر بطلان ائیلدی
..
دوردولار فوراً ایاقه تاکه دوتسونلارالی
غایب اولدی اونلاری آرتوخ هراسان ائیلدی
..
حال یأسیله دوباره گلدیر اگلشدیلر
ظاهر اولدی تازه دن اول جمعی لرزان ائیلدی
..
یازدی یوخ اصلا شفاعت امّتی که حرصیله
جوره تابع اولدی اؤز ظلمونده طغیان ائیلدی
..
بو عمل اوچ دفعه تكرار اولدی قوم باطله
حجّتین بو نوع ظاهر حیّ سبحان ائیلدی
..
نصف شب اولدی دوشوب بو وحشتیله یاندیلار
سانما امّا اونلاری بیر ایش پشیمان ائیلدی
..
کوردل اشخاصه وئرمز فایده نور خدا
هاردا خفّاشه طلوع خورشید رخشان ائیلدی
..
پاک دل راهب گیجه بیر پاسی گئچمشدی گوروب
دلنشین سسلردی دیری بیت الاحزان ائیلدی
..
تا هنوز وقت اولمیوب ناقوس گلمیش نالیه
ناله سیله راهبین قلبین پریشان ائیلدی
..
دوردی تا ائتسون تفحص گوردی که یاللعجب
منظرینده اوزگه اوضالردی جولان ائیلدی
..
چوخلی لشگر وار ولی بیر باشدا واردی نیزه ده
راهبی باخدوقجا باش مبهوت و حیران ائیلدی
..
گوئیا عیسانی چکموش داره ظلمیله یهود
خاطرینده درد و غم دریاسی طوفان ائیلدی
..
دسته دسته هی ملائکدی نزول ائیلوب یره
رأس مذبوحین گلوب دورینده طیران ائیلدی
..
گوئیا موسادی عیسادی نبیّ ختم دور
بیر به بیرگلدی او باشه باخدی افغان ائیلدی
..
بیر نچه خاتونیده هودجده گلمیش نالیه
بوقضیه راهبی چوخ زارو پژمان ائیلدی
..
پرده لندی گوزلرینده قطره قطره اشک ناب
دیده گانین بیر زمان مستورو پنهان ائیلدی
..
گلدی دیره منتظر دوردی که تا اولسون سحر
نار غم قلبین اولونجا صبح سوزان ائبلدی
..
صبح اولوب گلدی رئیس لشگری آلدى خبر
راهبه لشگر او دم خولینی اعلان ائیلدی
..
خولی بی دینیدن راهب گلوب ائتدی سئوال
هاردا جنگ اولدی بو فتحی هانی سلطان ائیلدی
..
سویلدی لشگر یزیدیندی بو باشدور خارجی
چون خروج ائتدی اوزون بو خانه ویران ائیلدی
..
سویلدی بو خارجینون واردی اسم و شهرتی
کیمدی هاردا عمرونی بو مرد میدان ائیلدی
..
عرض ائدوب آدی حسیندور نور چشم مرتضا
شهر یثربده وطن بو شاه دوران ائیلدی
..
سویلدی کیمدور آتاسی یا آناسی شرح قیل
صحبتی دلدن بو شخصین صبری تالان ائیلدی
..
سبط طاهادور دیدی پور رشید مرتضا
بو شهی زهرا همیشه زیب دامان ائیلدی
تا ایشیتدی بوسوزی اول راهب نیکو سیَر
جلوه قلبینده او دمده نورایمان ائیلدی
..
سویلدی اولما پیمبراوغلونی ئولدورموسوز
تفّ اولا سیز قومه حکمون هانسی نادان ائیلدی
..
بو همان کسدور یازوبلارکه ئولندہ قان یاغار
بو خطانی نه یولیله اهل قرآن ائیلدی
..
بوعلامت یا وصی ده یا پیمبرده اولار
جاننی بو باشدی حتماً دینه قربان ائیلدی
..
بیرنچه ساعت بو باشی سیز منه تسلیم ائدون
بوباشین عشقی منیم قلبیمده اسکان ائیلدی
..
عرض ائدوب ویرّوخ یزیده آلوخ اوندان جایزه
حکمونی گورسون نجه اتباعى اذعان ائیلدی
..
گوردی اول بی دین او باشی پولدان اؤتری وئرمدی
بو تمنّاسین اونون تبدیل به حرمان ائیلدی
..
گئتدی گتدی مین قزل ویردی آلوبدورشه باشین
بعلی پول گلدی بو امر سختی آسان ائیلدی
..
شه باشین گتدی گلابیله ائدوبدور شستشو
قویدی اؤز سجّاده سی اؤستونده مهمان ائیلدی
..
عرض ائدوب کیمسن شها حالوندن ائت آگه منی
بو شقی لر صورتون قانیله الوان ائیلدی
..
قانلی لبلر ناگهان دگدی اودمده بیر بیره
اؤز آدین کامل عیان اول شاه ذی شان ائیلدی
..
ائتدی فرمایش منم مظلوم منم سبط رسول
من حسینم حق منی دنیایه برهان ائیلدی
..
عرض قیلدی شاهد اول ای سبط ختم المرسلین
نازنین باشون بو درد کفره درمان ائیلدی
..
جدّیوه ایمان گتوردوم دین احمد حقّدور
بو باشون حقّا منه ناری گلستان ائیلدی
..
نه سعادتدور منه یوز ویردی لطف حقّیدن
نعمتین کامل منه خلّاق منّان ائیلدی
..
صبریمی امّا بو مظلومیّتون دلدن آلور
حقّیوى زایل ندن بو اهل نیران ائیلدی
..
بو منه نسگلدی شاها کربلاده اولمادیم
تک قالوب جسمون عدو خاكیله یکسان ائیلدی
..
مرشد کاملدن اول پاکیزه گوهر آلدی دم
هر ایکی دنیاسینی بیر دمده عمران ائیلدی
..
آتدی زنّاری دوتوب آل محمّد دامنین
چرخ چارمده مسیحی شاد و خندان ائیلدی
..
واصل أولدی حقّه یوز دوندردی حق درگاهینه
شکریله ملک دهانین شکّرستان ائیلدی
..
باخ سعادت سیرینه بیرلحظه اولدی همنشین
جذبۀ عشق حسین موری سلیمان ائیلدی
..
یتمه میش کامه گلوب اعدا او باشی ایستدی
راهبین قلبین مكدّر دردهجران ائیلدی
..
چاره سیز گتدی اوباشی وئردی قوم باطله
دلده اما مشعل آهین فروزان ائیلدی
..
کؤچدی گئتدی اشقیا راهبده کؤچدی دیردن
مسکنین آشفته لر تک دشت وهامان ائیلدی
..
شه باشی هادی اولوب ترسایه حقّه یول تاپوب
دین اساسین پایمال اما مسلمان ائیلدی
..
یتدی شامه خولی بی دین باخوب درهم لره
گوردی نه درهم عجب سوداده خسران ائیلدی
..
کیسه ده اولموش تمام سکّه تبدیل سفال
بولدی دنیاسینده حق دوندردی خذلان ائیلدی
..
یاخشى عبرتدور بوسوز زرّین هامی مومنلره
خوش اوشخصه دینی دنیاسینده میزان ائیلدی
..
بوحسین دور دردمند دینه جان درمانیدور
چوخ مریضون چاره سیز دردینه درمان ائیلدی
..
..
..
#دیر_راهب #اسماعیل_زرین #ترکی #زبدةالاشعار
نظر دهید