داده گل حسینیم اوخلانوب سو مشگیم #عباسیه_تابع_تبریزی

استمداد حضرت ابوالفضل (ع)
..
..
#سبک_دولدوروب_جهانی
..
..
مرحوم تابع دین
..
..
داده گل حسینیم اوخلانوب سو مشگیم
دوشدی قول بدندن قانه دوندى أشگیم
دوره می آلوب لشگر
الده نیزه و خنجر
ای وفالی قارداش
..
..
اوخ اوخ اوسته ووردی لشگر ضلالت
پیکریم اولوبدی سربسر جراحت
دوشموشم یارالی یوخ ایدن حمایت
رحم ایدن منه یوخدی
سیّدی یارام چوخدی
ای وفالی قارداش
..
..
عجز ایتمرم من، لشگر جفایه
اگمرم باش اصلا قوم بی حیایه
خوشدی دین یولوندا گچسه باش جدایه
سندی ظلمیله باشیم
قانه دوندی گوز یاشیم
ای وفالی قارداش
..
..
خیمه ده سو مشگین گوزلوری سکینه
حیف اولا خجالت ایتدى اهل کینه
ویر نشان بو مشگی سن او دل حزینه
گورسون اوخ ایدوب پاره
سینه می ایدوب یاره
ای وفالی قارداش
..
..
پرچمیم یخیلدی ظلمیله الیمدن
ال اوزولدی قارداش خویش و هم ایلیمدن
لیک دوشمیوبدی گول آدون دایمدن
ای امیدگاهیم گل
یوخ منیم پناهیم گل
ای وفالی قارداش
..
..
جسمیمه ویروبلار یاره یاره اوسته
یاره لر ایدوبدی پیکریمی خسته
هر طرفدن اولدی راه چاره بسته
سیّدی یتیش داده
سال منی بودم یاده
ای وفالی قارداش
..
..
بحر غمده سنسن کشتی نجاتیم
بسته دور حسینیم بیر سنه نجاتیم
گل یاخونلاشوبدی سیّدی مماتیم
گل تلاوت ایت قرآن
ای امام انس و جان
ای وفالی قارداش
..
..
عفو قیل کی یتموب خدمتیم تمامه
افتخار ایدوم من لشگر ظلامه
لطف اوزیله ایله بیر نظر غلامه
خدمتیمده وارنقصان
عفو ایله سنه قربان
ای وفالی قارداش
..
..
تابع دین اولموش، فقردن یارالی
باد محنتیله گل کیمی سارالی
ایت دعا آزالسون محنت و ملالی
سندن ایستیری وسعت
ایلسون گوزل خدمت
ای وفالی قارداش
..
..
#عباسیه #تابع_تبریزی #عباسیه_شهادت #ترکی #زبدةالاشعار