دختر ختم پیمبردی خانم معصومه #حضرت_معصومه_هدایت_تبریزی

در مدح حضرت معصومه (س)
.
.
.
محمد هدایتی تبریزی
.
دختر ختم پیمبردی خانم معصومه
ساقی کوثره دلبردی خانم معصومه

.
آتاسی موسی کاظم شرف موسویان
قارداشی افسر و تاج سر ابرار زمان
ئوزی الگوی برازندهٔ نسوان جهان
صدف خلقته گوهردی خانم معصومه

.
ئوزی پاکیزه و معصومه ، آدی فاطمه دی
فاطمه زاده دی ، اصل و نژادی ، فاطمه دی
بالا معصومه دی ، زهرا آنادی ، فاطمه دی
پاکیدی ، فاطمه مظهردی خانم معصومه

.
اولسا هر کیمسه بو والا نصبین زائری گر
احترام و ادبیله ضریح پاکین ئوپر
ذوق و شوقیله توکر گوزیاشینی نطقه گلر
ایرانا زینت و زیوردی خانم معصومه

.
بو کریمه خانمین عالمی دوتموش کرمی
ملجاء اهل نیاز و علمادور حرمی
فخریله خدمت ایدر خادمه سیله خدمی
صاحب مجد و ملک فردی خانم معصومه

.
بو حدیثی بویوروب صادق پاکیزه نهاد
بو جهاندا هریه بیر حرمین نسبتی وار
بیزه ده بیر حرمی قمدا خدا ویردی قرار
اودا مدفون منه دختردی خانم معصومه

.
کیم زیارت ایلسه قمدا قزیم فاطمه نی
حقّنه عارف اولا حشرده اولماز محنی
اونا واجبدی بهشت ، ایلیوب اظهار علنی
حامی شیعه حیدردی خانم معصومه

.
دخت موسی شجر طیّبه نون میوه سیدی
حرمه داخل اولان بو خانمون بیمه سیدی
ئوزی بیکسدی ، هامی بیکس و زارون کسیدی
حامیِ زائر مضطردی خانم معصومه

.
بیر گونی سیمره رودخانه سی طغیان ایلدی
قاباقندا اولان آباد ایوی ویران ایلدی
تا یتشدی حرمه اگدی یولون یان ایلدی
هامی بیلدی سیلی دوندردی خانم معصومه

.
دارالعلم علماء بو خانمین خانه سیدی
علماء بو خانمین ریزه خور سفره سیدی
حجة ابن الحسن عسکرینین عمه سیدی
فرج قائمی گوزلردی خانم معصومه

.
اولار هردن اونا قائم بالاسی قمدا قوناق
دولار عطریله ضریح و حرم و صحن و رواق
هالهٔ رحمت آلار دوره سینی مثل محاق
ماه تابان و منوّردی خانم معصومه

.
دارالایمن که دیرلر حرم فاطمه دی
زمزم و کوثر و تسنیم ، کرم فاطمه دی
شیعهٔ خالص حیدر امم فاطمه دی
زمره شیعیه رهبردی خانم معصومه

.
گوشۀ چشمیله معصومه اگر ایتسه نظر
خس و خاشاکی ایدر لؤلؤ و مرجان و گوهر
بو خانمدان گورونوبدور گورونر معجزه لر
دردمندانه شفاگردی خانم معصومه

.
ای «هدایت» ئوزووی بو قاپیا سالسان اگر
حلّ ایدر مشکلوی سالسا ئطوفتله نظر
نا امید ایتمیوب ایتمز بیرین اول پاک سیر
سرور عالمه سروردی خانم معصومه

.
#حضرت_معصومه_مدح
#دختر_ختم_پیمبردی_خانم_معصومه
#هدایت_تبریزی
#ترکی #حضرت_معصومه
#زبدةالاشعار