شهادت سرباز شیرخواره امام(ع)
..
..
رضوی زنجانی
..
..
صحرای کربلاده اوخلاندی دلسیز اصغر
شش ماهه شاهزاده اوخلاندی دلسیز اصغر
..
..
آلدی حسین اودم که شش ماهه نی قوجاقه
اوپدی یوزوندن اوّل قویدی دوداق دوداقه
آغلاتدی کائناتی عطشان قالان قوناقه
غملر اولوب زیاده اوخلاندی دلسیز اصغر
..
..
گون تک عیان اولوبدی لشگر برابرینده
دشمن گوزی قالوبدور قیمتلی گوهرینده
رنگی صولان عطشدن بیر غنچه اللرینده
غوغا دوشوب مناده اوخلاندی دلسیز اصغر
..
..
سعد اوغلى حیله ایتدی قطع ایله سین کلامین
اتمام حجت ایلوب ایتدی بیان پیامین
آغزندا قویدی پیکان اوندا سوزین امامین
اول دشت غمفزاده اوخلاندی دلسیز اصغر
..
..
صرّاف الینده دشمن دُرّی شکست ایدوبدور
بیرگل کیمین بوغازه پیکان نشست ایدوبدور
زهرانی دیده گریان اول ضرب شست ایدوبدور
گوز یاشلی گلدی داده اوخلاندی دلسیز اصغر
..
..
آتدی بیر اوخ او طفله بیر بی حیا ستمگر
فوّاره ویردی قانی فوراً یومولدی گوزلر
آغزی قانیلا دولدی دال سمتنه آخوب سر
قالدی رباب عزاده اوخلاندی دلسیز اصغر
..
..
اصغر گیندی قاندان قرمز لباس تازه
ناز ایتدی شاهزاده شاهنشه حجازه
یاندی حسین جگردن باخدی او گول بوغازه
عبّاسی دوشدی یاده اوخلاندی دلسیز اصغر
..
..
گوز گوشه سیله ایتدی نهر اوسته بیر اشاره
دلدن سوزون بویوردی عبّاس نامداره
قارداش هایانداسان بس ئولدی بو شیر خواره
گل دشت نینواده اوخلاندی دلسیز اصغر
..
..
روز تولدیندن اولدی غمیله یولداش
آلتی آی قوجاقدا گزدی اولدی بالام یارم یاش
إتمام اولونجا آلتی آی گلدی منایه بیر باش
قربان اولوب مناده اوخلاندی دلسیز اصغر
..
..
..
گل آچمامش چمنده گلناری اوخلامازلار
شش ماهه نازدانه دلداری اوخلامازلار
ظلمیله طفل آل اطهاری اوخلامازلار
أف قوم بد نهاده اوخلاندی دلسیز اصغر
..
..
روحی غرض پر آچدی خالی قالوبدی پیکر
ایلردی چون شماتت بیکس امامه لشگر
ایستیر گله خیامه اما ال اوسته اصغر
آغوش مقتداده اوخلاندی دلسیز اصغر
..
..
طومار انقلابی تکمیل ایدیبدی اصغر
کرب و بلا کتابون تفصیل ایدیبدی اصغر
حقّین طریقتنده تعجیل ایدیبدی اصغر
شهپر ویروب هواده اوخلاندی دلسیز اصغر
..
..
#اصغریه #رضوی_زنجانی #اصغریه_شهادت #ترکی #زبدةالاشعار
نظر دهید