دیللر صفاسی سان قاپیوا گلمیشم حسین #حسینیه_مصیبی_تبریزی

« قاپیوا گلمیشم حسین »
.
.
مصیبی تبریزی
.
.
دیللر صفاسی سان قاپیوا گلمیشم حسین
گوزلر ضیاسی سان قاپیوا گلمیشم حسین
.
درده دوشنده آیری قاپی دؤیمرم آقا
دردلر دواسی سان قاپیوا گلمیشم حسین
.
زهرایه چوخ عریضه یازار مشکله دوشن
زهرا بالاسی سان قاپیوا گلمیشم حسین
.
باب الحوائج ، اصغریوین واردی شهرتی
سن کی آتاسی سان قاپیوا گلمیشم حسین
.
قلبیم سیخیلسا یانمارام اصلا، کی قلبیمین
مشکل گشاسی سان قاپیوا گلمیشم حسین
.
هریاندا نوکرین اولا من نوکرم اونا
سنده آقاسی سان قاپیوا گلمیشم حسین
.
هر یئرده آتمیشام قدم آدون دیلیمده دی
دیزلر قواسی سان قاپیوا گلمیشم حسین
.
کیم درده آشنا اولوری سسلور آدیوی
درد آشناسی سان قاپیوا گلمیشم حسین
.
پیغمبرین وجاهتی نی حق وئروب سنه
طاها نماسی سان قاپیوا گلمیشم حسین
.
چوخلار اولوبلا فاطمه دلداده سی ولی
سن دلرباسی سان قاپیوا گلمیشم حسین
.
صیاد بی پناه منم دامه دوشموشم
رحمت هُماسی سان قاپیوا گلمیشم حسین
.
دنیاده هر نه قدر اولا سلطان خلایقه
سن پیشواسی سان قاپیوا گلمیشم حسین
.
ذبحٌ عَظیم آیه سی شأنینده دور سنون
قرآن فداسی سان قاپیوا گلمیشم حسین
.
شیواترین غزلدی آدون شعر نابیمه
شعرین صفاسی سان قاپیواگلمیشم حسین
.
شرک اولماسیدی حقّه؛یازاردیم«مُصَـیّبین»
سنده خداسی سان قاپیوا گلمیشم حسین
.
.
#حسینیه #مصیبی_تبریزی #حسینیه_مدح #ترکی #زبدةالاشعار