حالات حضرت علی اصغر (ع)
.
.
علومی تبریزی
.
.
هر کیمسه نین حسین جان سن تک امامی واردی
دنیا و آخرت ده بیر احترامی واردی
.
صدقیله اولساهر کس سیز خاندانه نوکر
هر یرده هر مکاندا عالی مقامی واردی
.
تا وار آدین جهاندا گلزار دین پوزولماز
دنیا صحیفه سنده دینون قوامی واردی
.
امّیدیله قویار یوز درباریوه خلایق
درباریوین ازلدن چوخ ازدهامی واردی
.
هر باشدا اولسا شورین دلدن آدون کسیلمز
هر دلده آدون اولسا شیرین کلامی واردی
.
ایلر اگر چه چوخلار احبابیوه شمادت
احبابوین سنون تک ظلمه دوامی واردی
.
سنده حمایت ایله بو جمع نوکروندن
بو رسمدور که مولا دائم غلامی واردی
.
سنسن جهاندا شاها بی کسلرین امیدی
معمورۀ حیاتین سنله قیامی واردی
.
مدّتدی بارگاهون زوّاره باغلانوبدی
زوّاریوین اوزاخدان عرض و سلامی واردی
.
بیزدن سلام او یرده ششگوشه بیر مزاره
نچّه بزرگوارین اوردا مقامی واردی
.
پائین پاده اکبر یاتمش شبیه طاها
اصغرده سینون اوسته ایندی خرامی واردی
.
ششماهه دور ولیکن عالی مقامه یتدی
واضحدی حق یانندا شأن عظامی واردی
.
گلزار دینه قانی سو ویردی کربلاده
آغلار اونا او کس که الده سو جامی واردی
.
گور قاتلی نه نوعی ظلمنده ایتدی طغیان
فکر ائتمدی او ظلمون بیر انتقامی واردی
.
.
بیر شمّه ای ایشتدون شان وجلالتندن
قوی گوز یاشین توکلسون ذکر مصیبتدن
.
.
صحرای کربلاده بیر اوزگه عالم اولدی
هنگامۀ قیامت ماه محرّم اولدی
.
سو یولّاری او گونکه باغلاندی اهلبیته
باران غم بنات دینه دمادم اولدی
.
گلدی او چولده موجه دریای غم الهی
قرآن ناطق اوغلی گنجینۀ غم اولدی
.
گل یوزلی لر سارالدى سولدی سوسوزلقوندان
ظلمیله سرو قدلر غمدن او گون خم اولدی
.
سو تک توکولدی قانلار توپراقلارا سو اوسته
خاتون روز محشر تاغرق ماتم اولدی
.
دریا کیمی آخاردی بویاندا سو او چولده
بیر سمتده سوسوزلار چوخ نامنظم اولدی
.
سقا سو اوسته گتدی دوغراندی قطعه قطعه
قاسم آناسی غمده لیلایه همدم اولدی
.
گلدی دیله بیوک لر قان آغلادی عطشدن
فکر ایله حالی اصغر یارب نه عالم اولدی
.
گهواره ده امامین دلدن سسین ایشتدی
ابراز عشقه بیردن اصغر مصمّم اولدی
.
چوخ سعی ایدوب آناسی ایتسون بالانی آرام
نه شورشی آزالدی نه شیونی کم اولدی
.
ناگه صداسین آلدى شهزاده نین آتاسی
دوندردی یوز خیامه احوالی برهم اولدی
.
.
گلدی حرمده گوردی بیر اوزگه ماجرا وار
اصغر باشندا شوق دیدار آشنا وار
.
.
بیر غنچه گلدی اصغر گلزار مصطفادن
اما سالوب سوسوزلوق بو غنچه نی صفادن
.
میدانه گلدی گتدی اول سود امر بالانی
بلکه او تشنه کامه سو آلسون اشقیادن
.
ویردی نشان او قومه ذریّۀ بتولی
فرمایش ایتدی لشگر شرم ایلیون خدادن
.
بو سود امر سوسوزدان چوخ آز قالور ویره جان
سیراب ایدون چکون ال بو کینه و جفادن
.
ایستر سوسوزلقوندان بو غنچه پر پر اولسون
اوچ گوندی ایچمیوب سو جسمی دوشوب قوادن
.
آیا روادی اولسون آب فرات جاری
قالسون سوسوز بیر عدّه اولاد مرتضادن
.
راوی دیر بو سوزدن ناگه پوزولدی لشگر
گورسندی حال نفرت اشرار بی حیادن
.
سعداوغلی گوردی لشگر آز قالدی شورش ایتسون
اوج ایلوری هیاهو افلاکه نینوادن
.
فوراً ایدوب شریحین فتواسینه اشاره
سالدی او بی لیاقت اشراری هوی هادن
.
گل حرمله چاغوردی ویر بو شهین جوابین
بو شام و کوفه اهلین قورتار بو ماجرادن
.
.
تا حرمله ایشتدی فرمان سر سپاهی
فوراً اله گوتوردی تیر و کمان الهی
.
.
نه حشری سالدی یاده نه قهر کبریانی
نه حرمت امامی نه حقّ مصطفانی
.
نه سود امر اوشاقین حالین ایدوب مراعات
بیر اوخ قویوب کمانه یاندوردی ماسوانی
.
اوخ ردّ اولوب کماندان سسلندی بیر هواده
یعنی گلوب قوتارّام ایندی بو ماجرانی
.
اوخ گلدی دگدی کسدی خنجر کیمی بوغازین
اوز قانینه بؤیاندی پیغمبرین نشانی
.
اوخ گچدی اصغریندن دگدی حسین قولوندان
قاتدی او بیر اوخیله اول شوم قانه قانی
.
گوردی امام او حالی بلمم قالوب نحاله
چکدی چخارتدی آتدی اوج ایلدی فغانی
.
اوجوندا قانی دوتدی رخسارین ایتدی الوان
سپدی گویه او قاندان آغلاتدی قدسیانی
.
عرض ایتدی شیر خوارم یا رب بویاندی قانه
بیر شربه سودان اوتری سینمده چخدی جانی
.
بیر سس یتوب امامه درگاه کبریادن
غم ایلمه حبیبی قورتار بو امتحانی
.
زهرا بو شیرخواره جنّتده منتظردی
حیرتده قویدی صبرون سکّان آسمانی
.
اولدی امامه مطلق بیر تسلیت بو پیغام
قرباننى ایلندن یوخ لیک بیر آلانی
.
ناچار امام بیکس یوز قویدی خیمه گاهه
تا منتظر یولوندا چوخ قویماسین آنانی
.
.
پیغمبر اوغلی گوردی یوخ آیری بیر علاجی
سسلندی خیمه دن بیر گل ای وفالی باجی
.
.
گل باجی گل که خندان اولدی گل تریم گل
میداندا ظلم الیله اوخلاندی اصغریم گل
.
سرباز شیرخواره جان ویردی اللریمده
سندن صورا بیر اوزگه یوخ یار و یاوریم گل
.
گل آل آپار خیم ده تیز باغلیون یاراسین
مشگلدی چوخ بو نوعی گورسین حرملریم گل
.
سو ایستدیم بو لشگر سو ویرمدی بو طفله
قانیله اولدی سیراب بو ماه منظریم گل
.
سو ایستمز دوباره قورتولدی راحت اولدی
سندی منیم بو چولده ظلمیله شهپریم گل
.
سپدیم قانین بو طفلین گوی سمتنه که اولسون
شاهد بو ماجرایه معناده داوریم گل
.
بوقان شفاعت ایلر محشرده اهل حقه
غافلدی بو عملدن خصم بد اختریم گل
.
.
زینب ایشیتدی ناگه قارداشینون صداسین
چخدی حرمدن آلدى آغوشینه بالاسین
.
.
سسلندی گل رباب ای غمدیدۀ زمانه
اصغر یاتوبدی راحت آز آغلا یانه یانه
.
اکبر هواسی باشدا بو بلبل خوش الحان
پرواز ایدوب تاپوبدی جنّتده آشیانه
.
آلدی آنا او طفلی آغوشه باسدی جان تک
گوردی اولوبدی همره اصغرده کاروانه
.
امّا آنایدی ایتدی شیون بو دللریلها
ای گلشن ولاده بیر غنچۀ یگانه
.
هانسی شل اولموش اللر سالدی سنی بو حاله
هانسی ستمگر ایتدی تیره سنی نشانه
.
ایوای سوسوز بوغازین خندان اولوبدی گل تک
زلفون او گل جمالین یکسر باتوبدی قانه
.
بو قومیده یوخیدی بیر ذرّه رحم و انصاف
بر شربه سو ویریدی بیر طفل ناتوانه
.
آلدى بابان آپاردی سیراب ایده الینده
رحم ایلمز بو لشگر گلمزدی بو گمانه
.
بولّم سنون بو قانین دین باغین ایتدی سیراب
ساخلار حقیقتیله اسلامی جاودانه
.
یارب توجه ایله بوجمعیله علومی
بیر وقفه زائر اولسون اول باغ و بوستانه
.
.
.
#اصغریه #علومی_تبریزی #ترکی #زبدةالاشعار #اصغریه_شهادت
نظر دهید