ورود اهل بیت به شام شوم
توسل به حضرت امام عصر
..
..
مرحوم صحاف تبریزی
..
..
نجه انصاف دور هر بیر دنی نایل بکام اولسون
ولی آزاده لر زهر ستمله تلخکام اولسون
..
توکندی صبریمز فریاده یت یا صاحب الاسلام
که ارکان شریعتده یاخوندور انهدام اولسون
..
اوزون یاحجة الله تئز یتیش فریاد اسلامه
که جاء الحق صداسیله گوگل لر شادکام اولسون
..
قالوب مین اوچ یوز ایلدی یرده جدّون شاه دین قانی
شها چک ذوالفقارون تا او قانه انتقام اولسون
..
گوروب کرب و بلاده آز قالور دین مبین گیتسون
رضا اولموب حسین شرع نبی ده اختتام اولسون
..
ایدوب تدبیر ویردی تشنه لب یتمیش ایکی قربان
بنا قانیله قویدی شرع تا محکم قوام اولسون
..
توکنده شمر او قانی گون دوتولدی تیتردی یرلر
که آز قالدی او دم زیر و زبر دارالسّلام اولسون
..
اسوب ناگه قرا یللر اولوب کرب و بلا طوفان
یاغوب قان عنقریب اولدى قیامتده قیام اولسون
..
نه شرم ایتدی خدادن نه پیمبردن نه زهرادن
گوروم بو شمر تک بیر سنگدل نسلی حرام اولسون
..
قفادن اون ایکی ضربتله کسدی جدّیوون باشین
ویروب نوک جدایه تا که تحصیل مرام اولسون
..
دوروب گون تک جدا باشندا باشی سسلدی تکبیر
که گون آز قالدى آل الله گوزینده تیره شام اولسون
..
ویروب سعد اوغلی فرمان اشقیای کوفه و شام ه
گرک غارت جلال پادشاه تشنه کام اولسون
..
قویوب بو حکمله یوز خیمگاهه فرقۀ کافر
روادور کلّه روباهدو بو اقتنام اولسون
..
بساط سلطنت تاراج اولوب اودلاندی خرگاهی
بو فکریله باتان خرگاهده اهل خیام اولسون
..
اسیر اولدی پیمبر قزلاری کفّاره قول باغلى
گورونموب بیر غزال آخر بئله صیّاده رام اولسون
..
دیدی وقّاص زاده غم قطاری شامه یولّانسون
کسوک باشلار جداده عازم بازار شام اولسون
..
او باشکه سینه سینده بسلیوب صدّیقۀ کبری
او باشه گه تنوره گه کلیساده مقام اولسون
..
دیمم قرخ منزلی طیّ ایتدیلر نه نوعله اعداء
خلاصه ایسترم مقصود عرضیم استلام اولسون
..
دایاندی قلعۀ شامه همین که آل پیغمبر
یزید امر ایلدی شام اهلینه مندن پیام اولسون
..
گیولسون جامه زینت ایلسون شام اهلی هر یانی
دمشق ایچره بو گون لازمدی بیر جشن عظام اولسون
..
بوگون بو شهره قول باغلی گلور زهرا قیزی زینب
گرکدور پیشواز عترت خیرالانام اولسون
..
رعیت جمع اولوب دروازیه بازار باغلانسون
خواتین حریم نازه طرفه صف سلام اولسون
..
چخوب شام اهلی صف صف باخماقا تعجیل
تصوّر ایت او حالتده گرکدی ازدحام اولسون
..
اولاندا شام شومه فوج غم دروازه دن داخل
خیاله کیمسه سالمازدی بیله بر انتظام اولسون
..
جداده هر کسوک باش بیر سنیق محمل قباقنده
او ظلمین شرحینه یارب نجه دلده دوام اولسون
..
اوخوردی نیزه ده کهف آیه سین رأس شه عطشان
که حقّانیّتندن باخبر هر خاص و عام اولسون
..
عجوزه غرفه ده گوردی کسیلمیش باش اوخور قرآن
دیدی من قویمارام بو دلده یارای کلام اولسون
..
آلوب بیر داش اله سرعتله وروبدی سجده گاهندن
گوروم الدن الهی شل ایله بی ننگ و نام اولسون
..
گوروب بوحالی زینب عرض ایدوب قارداش باجون ئولسون
که گورموب دیدۀ گردون بیله بیداد تام اولسون
..
دیمه زینب عبث همرنگ اولوب شاه جهانیله
نجه صابر بو ظلمه بس او بانوی کرام اولسون
..
دییر راوی امام عصری گوردوم ناقه ده مغلول
دیدیم یارب روادور بستۀ زنجیرامام اولسون
..
آخوردی قان ز بس کسمیشدی بوینین حلقۀ زنجیر
خیال ایت گور نه حالتده شه والا مقام اولسون
..
منی گورجک بویوردی حجّت باری اودم یا سهل
جزاده ایسته سن گر مزدو اجرون مستدام اولسون
..
گورورسن دشمن ایچره عترت اطهاری بی معجر
گمانون ساتره اولسا گتور اجرون مدام اولسون
..
دیر عمّامه ای ویردیم آلوب تقسیم ایدوب اول شاه
ایده حایل او گول یوزلرده مانند غَمام اولسون
..
قالوب بیر حصّه سی بوینوندا رنجیر آلتنا قویدی
فشار قید دشمندن خلاص اول مُستظام اولسون
..
دوتوبسان دامن شاهنشهی «صحاف» ال چکمه
خلوصون محکم ایت تا اعتصامون اعتصام اولسون
..
ویرور اجرون محقّقدن جزاده شافع محشر
خیالون پخته دور قویماز حسین بو فکر خام اولسون
..
..
..
#ورود_شام #صحاف_تبریزی #ترکی #زبدةالاشعار
نظر دهید