عشق حضرت زینب (س) در گهواره به حضرت اباعبدالله الحسین (ع)
مکالمه #اباذر با #سلمان راجع به محبت حضرت اباعبدالله الحسین (ع)
.
.
مرحوم #منعم_اردبیلی
.
.
سلمانه اباذر دیدی ای معدن ایمان
بیر سری سوزوم وار دیورم من سنه پنهان
بیر سریدی سلب ایلیوب آرامی دیلیمنن
چوخ قورخورام آخر آلا ایمانی الیمدن
.
من چوخ سویرم پنج تن آل عبانی
پیغمبری زهرانی و بیر شیر خدانی
.
.
.
واردور هوسیم خالقه قرآن مبینه
صدیقه کبرایه رسول و ثقلینه
شهزاده حسن شیر خدا سرور دینه
واجبدی محبتلری هر فرد زمینه
اما ئورگیم باغلیدور بیر گل ورقینه
من اولموشام عاشق نه مدتدی حسینه
.
عمروم یتیشوب آخره دنیا منه لا دور
بیلمم بو نجه عشق و محبت نه بلادور
.
.
.
محض اینکی ائشیتدی بو سوزی حضرت سلمان
روحیم دئدی اولسون بو حسین آدینه قربان
آرامیمی الدن آلیب اول زلف پریشان
دریا تک ائدور عشق حسین سینه ده طغیان
.
عمروم یتیشیب آخره دلخسته و پیرم
بو سینّیله من عشق حسینیمده اسیرم
.
.
.
اولدون دئدی الان منیلن هم دل و اسرار
مدتدی بو سودا وئروری قلبیمه آزار
فکر ایلمه سنسن بو همین عشقه گرفتار
داغلار بویی قلبیمده منیم عشق حسین وار
.
عالم هامی جسم اولسا اگر،جان حسیندور
روحیم بدنیم شوقیله قربان حسیندور
.
.
.
گلدی او ایکی پیر جوانبخت دل آرام
عرض ایلدیلر صحبتی فخر ایلدی زهرا
باخ گور نه دئدی حضرت صدیقه کبری
اوغلومدی حسین ئوز بالاما عاشقم اما
.
عالم سنه عاشقدی حسین جان حسینیم
زهرا او گوزل گوزلره قربان حسینیم
.
.
.
من عاشق رخسار دل آرای حسینم
من واله سرو قد رعنای حسینم
عالم اونا عاشق اولا من تک اولا بیلمز
بلبل کیمی آلوده و شیدای حسینم
.
رخسارینه باخدوقجا دوتار قلبیمی رقت
بیلمم بو نجه عشقیدی بیلمم نه محبت
.
.
.
ایلوردی خانم حضرت سلمانیله صحبت
گلدی آتاسی حضرت سلطان ولایت
کشف ائتدی حسین عشقینی خاتون قیامت
باخ گور نه دئدی شیر خدا بحر فصاحت
.
سیزدن بتر عاشق منم الان حسینه
جاندا نه لیاقت اولا قربان حسینه
.
.
.
من واله و من عاشق دیدار حسینم
آواره و سرگشته بازار حسینم
شمعیدی حسینیم اونا پروانه منم من
من عاشق خوش لهجۀ گفتار حسینم
.
مومنلره گرچه ایکی دنیاده امیرم
اوغلومدی ولی زلف حسینیمده اسیرم
.
.
.
هر دُوردی گلوب محضر میر ثقلینه
عرض ایلدیلر صحبتی شاهنشه دینه
ای سید عالم بیزه کشف ایله بو سری
بیز اولموشوق آلوده و دلداده حسینه
.
باخ گور نه دئدی حضرت پیغمبر خاتم
نعلینوه قربان اولا بو عالم و آدم
.
.
.
من عاشقیم عشقیده مردانه حسیندور
عشاقی چکن قانلی بیابانه حسیندور
رونق ورن اسلامیله قرآنه حسیندور
دنیانی ائدن صحن عزاخانه حسیندور
کشتی سی دوشن ورطۀ طوفانه حسیندور
سر قافله یتمیش ایکی قربانه حسیندور
.
من عاشق گلچهره زیبای حسینم
من واله گفتار دل آرای حسینم
.
.
.
جبریل امین از طرف خالق اعلا
اندی یره عرض ایلدی ای سید والا
فرمایش ایدوب عاشقم الله تعالی
معشوقیم حسینیمدی حسینیمدی معلی
.
من عاشقیم هم منه عاشیقدی حسینیم
عالم اونا عاشق اولا لایقدی حسینیم
.
.
.
عاشقدی خداوند سماوات حسینه
عاشقدی نبی سید العرصات حسینه
زهرا و علی ضیغم غزوات حسینه
.
اما اونا زینب کیمی عاشق اولان اولماز
عشقینده حسینون ساری گل تک سولان اولماز
.
.
.
گهواره ده اوچ آیلیقیدی زینب علیا
بیر گون او قدر آغلادی تا قالمادی یارا
رام اولمادی هر قدر اونا لایلای دیدی زهرا
گزدیردی خانم فضه او خاتون دل آرا
.
رام اولمادی زینب گوزونون یاشی سوزولدی
آغ در کیمی صفحۀ رخساره دوزولدی
.
.
.
آلدی یوزون ئوپدی آتاسی سرور مردان
شهزاده خانم آغلاماقا وئرمدی پایان
بیردن ائو ایشیقلاندی حسین اولدی نمایان
فی الفور سسین قطع اتلدی زینب نالان
.
هر بیر طرفه گئتدی او سلطان شهیدان
زینب دولانوب حسرتیلن باخدی دالیجان
.
.
.
آز قالدی بشیکدن دوشه اول قدر اوجالاشدی
دیل یوخدی حسینیم چاغیرا قوللارین آشدی
دریای محبت ایکی دریا کیمی داشدی
گلزاره اوچان قوش تک حسین قوللارین آشدی
.
گلدی آلوب آغوشه قولون بوینونا سالدی
لایلای سسی گهواره کنارینده اوجالدی
.
.
.
ای قلبیمون ئوز پاره سی لایلای باجی لایلای
آخر وطن آواره سی لایلای باجی لایلای
بیر گونده سالان باشینه بیر قرمزی معجر
اون یدی جوان قاره سی لایلای باجی لایلای
.
باخما یوزومه آغلاما چوخ آغلیاجاقسان
سن باشیمون آخر یاراسین باغلیاجاقسان
.
.
.
بیر ایل ایکی ایل بش ایل اون ایل کئچدی به سرعت
زینبدن حسین آریلا بیلمور ایکی ساعت
تا اینکه گلین گئتدی او خاتون قیامت
اگلشدی حسین صبحه کیمی یاتمادی راحت
.
گون چخدی دوروب گلدی گوروب طوی اتاقیندا
زینب طوی اتاقیندا یاتوب گون قاباقیندا
.
.
.
چیگنیندن عباسین چخادوب دوتدی دایاندی
اول قدری دایاندی یوخودان زینب اویاندی
دولدی ایکی گوزلر ایکی قوللار اوجالاندی
گه بوینونا سالدی گهی باشینه دولاندی
.
عرض ایلدی ربی او قدر ویر منه مهلت
تا منده حسینه ائلیوم بیر بیله خدمت
.
.
#زینبیه_میلادیه #زینبیه_مدح
#حسینیه_مدح #زینبیه
#پیامبراسلام_صحابه
#صحابه
#سلمانه_اباذر_دیدی_ای_معدن_ایمان
#ترکی
#زبدةالاشعار
نظر دهید