کوچ از قتلگاه
..
..
مرحوم اعظمی تبریزی
..
..
ساربانلار من اسیره
بیر ویرون رخصت سیز الله
تا اؤپوم بو گل بدندن
وار هله فرصت سیز الله
..
..
صبریمی الدن آلوبدور
بو یارالی گل جنازه
بو داغیلمیش پیکر اوسته
دل آچوم راز و نیازه
بیر قویوم بو داغلی قلبی
سینۀ شاه حجازه
تا یتوم وصله اورکده
قالماسون حسرت سیز الله
..
..
دلشکسته بیر یتیمم
قید ظلمه باغلیم من
وورمیون قمچی باشیمدان
گورموسوز دل داغلیم من
قویموسوز من بینوانی
بیر دویونجا آغلیم من
چوخ دییردیم آغلامام من
ایتمیون تهمت سیز الله
..
..
رسم دور گلزاره گتسه
سینه سین داغلار یتیمه
گورسه بیر گل اشک چشمین
عارضه باغلار یتیمه
آغلاسا اولمازلا مانع
چون مدام آغلار یتیمه
آغلیاندا من وورورسوز
واردی نه علت سیز الله
..
..
من کمکسیز بیر یتیمم
بیر کسیم یوخ داده گلسون
نه سلامتدور هرایه
اکبر شهزاده گلسون
نه رشید عبّاس عموم وار
سسلیم امداده گلسون
من یتیم بی نوادن
آلمیون طاقت سیز الله
..
..
رحمسیز صیاد الینده
قولاری باغلی غزالم
اودلانوبدور آشیانم
بیر قوشام بی پرّ و بالم
رحم ایدون بیر عندلیبم
تشنۀ باغ وصالم
گول بوداقینده آچوب دل
شرح ائدیم محنت سیز الله
..
..
من دئمم گوگلومده فکر
درد و غمدن یولداشیم وار
سرّی وار سولموش یوزیم ده
بیله قانلو گوز یاشیم وار
قوملار اوستونده بو چولده
سود امر بیر قارداشیم وار
تا گوروم اول شیر خواری
بیر ویرون رخصت سیز الله
..
..
نازلی قارداشیم یانندا
من دیمم دائم قالوم من
اوخلایوبلار ظلم الیله
بیر گیدیم گوگلون آلوم من
بیر اونون گوز یاشیمیله
زخمینه مرهم سالوم من
بیرده آغوشه آلوم من
بیر ویرون مهلت سیز الله
..
..
اصغر شیرین ثمردی
بو چولین ناکامی دور بو
ماهپاره قارداشیمدور
قلبیمون آرامیدور بو
رحم ایدون مهلت ویرون بیر
آیرلیق هنگامیدور بو
سود امر قارداشیمیله
بیر ائدیم صحبت سیز الله
..
..
باغبان نیلر چمنده
ظلم الیله یانسا باغی
یاندیروب خرگاه دینی
اولموسوز اسلامه یاغی
بیر ستم ایتدوز بو چولده
سوندی پیغمبر چراغی
قویدوز هیچ عالمده آیا
دینه بیر حرمت سیز الله
..
..
«اعظمی» بوشرح محنت
حالوی پوزسا سزادی
ایتدیلر آل عبایه
هر نه که جور و جفادی
بو بالا سسلردی آیا
بیر قیزا بو غم روادی
بیر دویونجا آغلیام من
ویرموسوز رخصت سیز الله
..
..
#کوچ_کربلا #اعظمی_تبریزی #ترکی #زبدةالاشعار
نظر دهید