صاحبین یرده گوروب اولدی مکدر ذوالجناح #حسینیه_عینی_فرد

افتادن امام حسین (ع) از ذوالجناح
..
..
حاج غلامرضا عینی فرد زنجانی
..
..
صاحبین یرده گوروب اولدی مکدّر ذوالجناح
اَلظَّلیمه گوردیلر میداندا سسلر ذوالجناح
..
..
مقتله سالدی امامی کوفیان کین شعار
آنّنی تپراقلار اؤسته قویدی عبد کردگار
سجده ده گوردی حسینی بی حیا لشگر ورار
باشینه شاهین دولاندى دل مکدّر ذوالجناح
..
..
تار و مار ایلردی گاهی پنجه سیلن دشمنی
گوردی یوخ سبط رسولین تپراق اؤسته مأمنی
گوییا سسلردی لشکر ئولدورون الان منى
اولمیون راضی گوره شاهینی مضطر ذوالجناح
..
..
مرتضیٰ اوغلی او حیوانین وفاسین بلجاقین
گوزلرین آچدی بویوردی اول امام المتقین
دورما بوردا ئولدورر یوخسا سنی لشگر یقین
گیت بو لشگرگاهیدن ای شیره بنزر ذوالجناح
..
..
یوخ ابوالفضلیم گورورسن یوخدی بیرکس یاوریم
پرچمیم یاتدی یخلدی باوفا سرلشگریم
خیمه گهده گیت یولون گوزلور عباده اکبریم
ویر خبر گلسون باجیم زینب دلاور ذوالجناح
..
..
عرشۀ زینوندن عرشی اندیروبسن تپراقا
مقتله قانیم آخور آز قالدی جانیم چخماقا
هریره قاچسان چاغورایوای سوسوز ئولدى آقا
ایستورم احوالیمی بُلسون حرملر ذوالجناح
..
..
من نقدری بو بیاباندا مصیبت گورموشم
گورموشم باهم سنیله رنج و محنت گورموشم
اصغریمی اوخلیاندا من قیامت گورموشم
آغلادون سن اوخلانان وقتنده اصغر ذوالجناح
..
..
سن منیم سنّیمدن آرتق گورموسن جنگ و جدل
غزوه لرده جدّیم احمدله گزوبسن ال به ال
اولموسان مرکوب حسینه آخر عمریمده، گل
بیرده بیر خدمت ایله اولسا میسّر ذوالجناح
..
..
لشگری ردّ ایله یولدان خیمه گاهه قاچگلان
کاکلون قانه بویا یالوندا گل تک ساچگلان
مقتله قزلار گلنده اوللارا یول آچگلان
چوخ توکولموش بو یول اؤسته تیر و خنجر ذوالجناح
..
..
سن بلورسن هاردا عبّاسین دوشوبدور پیکری
حمل ایدوم گوردون خیامه قویمادی سرلشگری
پیکری یرده قالوب زهرا آنامدا اللری
ایتسون اسباب شفاعت روز محشر ذوالجناح
..
..
سن بلورسن آلتی آیلق اصغر هاردا دفن اولوب
ریشۀ صبری ربابون خشک اولوب گل تک صولوب
شاید الان قازدیقیم خردا مزاره قان دولوب
قانیم آخدوقجا دؤنور قانه بو یرلر ذوالجناح
..
..
گیت خبر ویر خیمه گاهیمده وفالی باجیما
تا گلوب زینب تماشا ایلسون قان تاجیما
انبیا صف چکدی باخسون نیزه ده معراجیما
چرخ چارمدن باخار عیسی پیمبر ذوالجناح
..
..
آز قالوبدور قاره یل لر بو بیاباندا اسه
منتظر دور قاتلیم خنجر الینده باش کسه
بو بلادن اولمیوب اولماز مقدّر بیر کسه
بارور قانیمله اولدی باغ داور ذوالجناح
..
..
گوز یاشینی قانه قاتدی قاچدی میداندان فرس
تلّیدن قاچدی خیامه داد ایدوبدور یک نفس
اَلظّلیمه اَلظّلیمه سسلنور یوخ دادرس
توز آراسندا گلور مجروح پیکر ذوالجناح
..
..
آه او ساعتدن حرملر بُلدیلر مرکب گلور
گلدی بی صاحب گلور قلبنده تاب و تب گلور
پیشوازه اللری باشدا اَوَل زینب گلور
سسلدی بس قارداشیم هانی مکرّر ذوالجناح
..
..
بو درنده خو قوشون ئولدوردولر قارداشیمی؟
قانه دؤندردی نقدری وار جهان گوز یاشیمی
سالدیلار آخر بلایه بو بلالی باشیمی
هاردادور تز گورست الان شاهه یاور ذوالجناح
..
..
آلدیلار اطرافنی قزلار چکوب فریاد و داد
محشر اولدی خیمه لرده اودلانوب غمگین فؤاد
الله عالمدی فقط شرحینده عاجز دور عباد
نیلدی گلدی خیامه دیده سی تر ذوالجناح
..
..
بعضی سسلور هاردا باتدی قانه خورشید شرف
بعضی سسلور هاردا اولدی اوخلارا بابا هدف
بعضی سسلور گل بالان باشسیز قالوب شاه نجف
واحسینا ایلیوب آغزیندا ازبر ذوالجناح
..
..
ذوالجناحون شیحه سیندن خیمه گاهه دوشدی شور
قتلگاهه ساری قزلار تلّی سرعتلن آشور
بیر صلابتلن قاچور زینب جماعت قورخوشور
بلمورم گلدی و یا گلموبدی مضطر ذوالجناح
..
..
ذوالجناحین بوردا «عینی فرد» قورتار سوزلرین
آز قالوب ئولدورسون آل الله بو غمده ئوزلرین
دولدورار اشگیله مهدی ذکر ایدنده گوزلرین
آغلار حضرت قلبنى ایلر مکدّر ذوالجناح
..
#حسینیه #عینی_فرد #ذوالجناح #حسینیه_شهادت #ترکی #زبدةالاشعار