زبانحال حضرت ام البنین ( س ) با عبداله العباس (ع)
.
.
فکری اردبیلی
.
.
صبر ایله اوغول قوی شب هجران سحر اولسون
شاید بو گیجه بیکس آتوننان خبر اولسون
.
.
ای باغ وفاده گل و ریحانه داریخما
گلمه بو قدر ناله و افغانه داریخما
قوی باشوی بو سینۀ سوزانه داریخما
یات قوی شب طولانی سنه مختصر اولسون
.
.
سالمیش نه یامان حاله سنی محنت هجران
مندن ایدوسن دیدۀ گریانوی پنهان
تز تز باخوسان یولّارا جانیم سنه قربان
شاید که گلن یا آتا یا عمه لر اولسون
.
.
کچمیش گیجه نون نصفی اولوبسان بالا خسته
یولّاردا قالوب گوزلرون ای قلبی شکسته
باغلا قاپونی گل گوزلیم یات سینم اوسته
صبحه کیمی قوی همدمیمیز اشک تر اولسون
.
.
یا گل اوتوراق دیده سی تر قبلیه ساری
زهرایه توسّل ایلیک بو گیجه یاری
شاید سنه خاطر نظر ایتسون بیزه تاری
باشینده خطر وارسادا دفع خطر اولسون
.
.
من اوغلومی یاخشی تانورام مهر و وفاده
قویماز بالاسی تک قالا اندوه و بلاده
فوراً یتورردی ئوزینی پای پیاده
قویمازدی سنه لشکر غم حمله ور اولسون
.
.
سنسیز گیجه آسوده یقین یاتماز ابوالفضل
گر چاره سی اولسا سنی آغلاتماز ابوالفضل
گوزدن بالاسین من بیلورم آتماز ابوالفضل
بو آیریلیقا راضی کیم ایستر مگر اولسون
.
.
من بسلدیم عباسیمی قربان اولا دینه
چاتسا الی ایلر بیلورم عزم مدینه
چون قول ویروبدی ننه سی ام البنینه
بو امره اگر راضی قضا و قدر اولسون
.
.
چوخ چوخ سنی ایستردی او دریای کرامت
تأخیرینه وار حتماً اونون عمده بیر علّت
گر گلمسه بیل که اولوب عباسی خجالت
اوندا یری واردی بالا سن خون جگر اولسون
.
.
از بسکه رئوفیدی ابوالفضل جوانمرد
گورسیدی یتیم بیر بالانون رنگی اولوب زرد
آغلاردی یانا یانه اولاردی دل پر درد
سسلردی اوغول غملره سینون سپر اولسون
.
.
آغوشه آلاردی اونا اکرام ایلیردی
بیلسیدی اگر آجدی تز اطعام ایلیردی
حقینده اونون حرمتی اتمام ایلیردی
قویمازدی او غمدیده نی بیر آن ملر اولسون
.
.
سن تک بیلوسن منده بالا زار و غمینم
یوخ چاره گرک صبر ایلیم گر چه حزینم
عباسیم ئولوب قلبی سنان ام بنینم
اوننان صورا عمر ایلسم اوغلوم هدر اولسون
.
.
.
.
#حضرت_ام_البنین #فکری_اردبیلی #ترکی #عبداله_العباس #زبدةالاشعار #سبک_ای_باد_صبا
نظر دهید