زبانحال امام حسین (ع) در بالین حضرت علی اکبر (ع)
.
✍️ #زبدةالاشعار ✍️
.
🆔: @nohe_torki
.
حاج علی صراطی
.
على بو مه جمال و طلعت زیبایه حیف اولسون
قالان یرده صنوبر تک قدِ رعنایه حیف اولسون
.
.
اوغول بو پیکروندی یا که گُلدی پرپر و خندان
توکوب باد خزان گلزار عمرون ایلیوب ویران
بو خورشید امامتدی باشون اوسته دوروب گریان
توکر رخسارینه اشگین یازار سیمایه حیف اولسون
.
.
بهار عمروه بو عرصه ده باد خزان اسدی
خزان دیده پریشان بلبلون صبرین بو غم کسدی
ئوزون گئتدون دیمه دون هیچ بابام بو چولده بیکسدی
گونوم دؤندی اوغول سنسیز شب یلدایه حیف اولسون
.
.
گُلی گُل صاحبی بو رسمدی گُلخانه ده بسلر
گُله صدمه یتیشسه باغبان آه و فسوس ایلر
اولا سنسیز جهانون باشینه توپراق علی اکبر
گَله هیهات اوغول مثلون سنون دنیایه حیف اولسون
.
.
باخاندا من سنه ای خلقتاً ئوز جدّینه بنزر
سپهر قلبده هر آن اولاردی گون کیمی اظهر
دوشردی یادیمه جدّیم پیمبر ای ملک منظر
سنون تک مه جمال و مظهر طاهایه حیف اولسون
.
.
جهاندا سن منه ای نوجوان عمر نهالیدون
بابام پیغمبرین آئینۀ حسن و کمالیدون
آناون تیره شبلرده على شمع وصالیدون
اولار هجرون اوغول مشگل آنان لیلایه حیف اولسون
.
.
اوغول هئچ گلستاندا سن کیمی گل اولمیوب اولماز
چمنده گل گلر گل وقتی اما آچمامش سولماز
گوره بلبل گلون پژمرده اشگیله گوزی دولماز؟
دیمز سن تک گل سرخ چمن آرایه حیف اولسون
.
.
آخور سیل سرشگیم حسرتیله گور نه دامانه
اگرچه محتضر سنسن ولی من گلمیشم جانه
جبینوندن آخان قان دوندروبدی قلبیمی قانه
دولوبدی ظلمله بو دیدۀ شهلایه حیف اولسون
.
.
دوشه آیری گلوندن تاب ایدنمز بلبل شیدا
خیام طاهراتی دولدوروبدی صوت واویلا
توکور درّ سرشگین سسلوری وا اکبرا لیلا
عجب دوشدی باشی بو صحنه ده غوغایه حیف ارلون
.
.
ریاض قدسه روحون ایلدی پرواز دینجلدی
آناوون قلبینی لیکن على هجران اوخی دلدی
گلنده بو چوله گر چه اوغول سنلن آنان گلدی
گیدر سنسیز ولی دلده آدون بطحایه حیف اولسون
.
.
.
بو گلزار وفاده پیکرون گویا سولان گُلدی
اوغول انصاف مقامنده آنان لیلایه مشکلدی
نجه سویلر باجون صغرایه اکبر قارداشون ئولدی
نهایتسیز اولار نسگل باجون صغرایه حیف اولسون
.
.
دولوب پیمانۀ قلبیم اوغول غمدن لبالبدی
گوزومده گوندوزوم تاریک اولوب گویا علی شبدی
اوغول وای باشون اوستونده دییَن بیچاره زینبدی
توکور اشگین دیور حسرتله بو بُرنایه حیف اولسون
.
.
آناوی ظلمیله بو لشگر کینه اسیر ایلر
شرار ظلم قلبین یاندرار چون شعلۀ آذر
باخار نوک جدایه دائماً سسلر علی اکبر
گیدر صبری اوغول سندن صورا یغمایه حیف اولسون
.
.
اوغول کوی وفاده سن عجب بیر امتحان ویردون
ضمیرونده اولان عشقی بو صحراده نشان ویردون
قالوبدی توپراق اوسته پیکرون آخرده جان ویردون
آخوبدی جسموون قانی سو تک صحرایه حیف اولسون
.
.
نقدری واردی فرصت مغتنم سای فرصتی هر آن
حسین بن علی دربارینه قیل خدمت شایان
صراطی قورتولار عمر گرانمایه تاپار پایان
تأسف ایلسن بو نعمت عظمایه حیف اولسون
.
.
#اکبریه_علی_صراطی
#اکبریه_شهادت
#على_بو_مه_جمال_و_طلعت_زیبایه_حیف_اولسون
#ترکی
.
✍️ #زبدةالاشعار ✍️
.
🆔: @nohe_torki
نظر دهید