حالات راه شام
..
..
مرحوم ذاکر اردبیلی
..
..
قلم گوتوردوم حسینون یازام مصیبتینی
گتوردی خاطریمه راه شام حکایتینی
..
نه راه شام نه صحرا نه لر نمایاندور
وئریلسه شرح بیلرسن نئجه بیاباندور
..
ولی نه دیللریله بیلمورم بیان ائلیوم
بنی امیه جفاسین نئجه عیان ائلیوم
..
قوى عرض ائدوم نچه کلمه توکل اللهه
جماد و خار مغیلان و کوه و بی راهه
..
جهاز سیز دوه لر، بی قطار، ئوزی عریان
سوار اولوب اسرا ساربانیلر عدوان
..
نه لقمه نان و نه بیر جرعه آب، آج وسوسوز
ہو حالتیله گیدورلر او یوللاری شب و روز
..
سوزوم او کورپه اوشاقلاردادور نه کورپه اوشاق
آنا باخور بالا آغلور بیری بیریندن اوزاق
..
سسین چیخاردانی سیلیله تازیانه ایله
نئجه ووروللا ووراندا بئله ووروللا ئوله
..
بیرین ووراندا دوشور ناقه دن اولور خسته
دوتور قولوندان آتور تازه دن دَوَه اوسته
..
سورورله ناقه لری شدّت و شتابیله چون
بلالی زینبه اولموردی سایماقی ممکن
..
یتنده منزله چون کاروان، ساخلاردى
گلوب یتیملری زینب أوندا یوخلاردی
..
یتیشدیلر گیجه نی بیر مکانه سوز چوخدور
سایوب أسیرلری گوردی بیر اوشاق یوخدور
..
قاچوب اویان بویانا آختاروب دولاندی حالی
نتیجه اولمادی ناله کنان قییتدی دالی
..
چاغوردی گل باجی کلثوم گوگلیمی غم آلوب
قویوبلا خورداجا بیر قیز اوشاقی چولده قالوب
..
دوشوب ایکی باجی آختارماقا بیابانه
او قدری قاچدیلا دوندی اورکلری قانه
..
گزوب دولاندیلا صحرانی با غم و محنت
کئچنده گوردیله یول اوسته بیر نفر عورت
..
اوتوروب اوخشیور آغلور باشین قویوب دیزینه
لباس قاره گیوب معجرین چکوب یوزونه
..
همان او خوردا بالانی آلوب قوجاقینه
باخاردی ناله ائدردی، قابار ایاقینه
..
ئوپور دیور بالا قورخما یتیم بالام قورخما
بالا باشووا دؤنوم آغلیوب ائویم یخما
..
آماندی آغلاما ائتمه بو قدری ناله و زار
بی بی لرون گلر ایندی قیزیم سنی آپارار
..
بالا اسیری وورارلار منی کباب ائلمه
یارالی قلبیمی گل غرق التهاب ائلمه
..
دیدی دئدی ائله دی آخر اول قیزی آرام
یتیشدی زینب ائدوب مهربان دیلیله سلام
..
دئدی خانم سوله کیمسن بو چولده نیلورسن
منیم بالاما بئله مهربانلوق ایلورسن
..
یتیم نوازلوق ائدوب ہو یتیمی یؤخلاموسان
منیم بو قورخولی چولده بالامی ساخلاموسان
..
دولاندیریب یوزین حسرتله زینبه باخدی
باخاندا آغلادی گوز یاشی سیل تک آخدی
..
بویوردی گل بالا زینب گل ای بلایه دچار
یامان گونونده آنانی مگر تانیمازلار
..
مگر منی تانیمورسان باشی بلالی بالا
منم قابورقالاری ظلمیله سینان زهرا
..
مدینه دن بوراجان سینه داغلارام سیزیله
سیز آغلیاندا قیزیم منده آغلارام سیزیله
..
ئولنده اوغلوم حسین کربلاده من واریدوم
اونون کسوک بوغازیندان ئوپردوم آغلاردوم
..
قلم صحیفیه «ذاکر» بس ائت دولاندیرما
ئوزون یانورسان، امام زمانی یاندیرما
..
..
#راه_شام #ذاکر_اردبیلی #ترکی #زبدةالاشعار
نظر دهید