مجلس یزید
و شجاعت حضرت زینب (س)
..
..
سیفی اردبیلی
..
..
مقام عشقیده سرّ کمال لامکان زینب
کتاب الوِلاده نام نیک و جاودان زینب
..
..
اوچاندا طایر طبعیم یقیندور شهپریم سنسن
قلم سندن آلور قدرت صفای دفتریم سنسن
اوتوز بش ایلدی هر ساعت دیلیمده ازبریم سنسن
سنون لطفونله من تاپدیم بیله طبع روان زینب
..
..
گزر بلبل گله خاطر همیشه باغ و گلشنده
قویار جان نقدینی پروانه پای شمع روشنده
قسم آغ زلفوه تنها سنه پروانه ام منده
اورکده عشق پاکوندن واریم سوز نهان زینب
..
..
نه حلّاجم دیم خلقه انالحقده شعاریمدور
نه عطارم یازام طیّ طریقت اعتباریمدور
قاپوندا باش آغارتدوم من بو تنها افتخاریمدور
تانور مردم منی آری سنه نوحه یازان زینب
..
..
حدیث محنتون اولموش منه ورد زبان گونده
مسیریمده آچار دیو زمانه هفتخوان گونده
خانملق ایله بیر سنده الیمدن دوت یامان گونده
یخلسون نوکرون قویما سن ای الدن دوتان زینب
..
..
گرک غم زورقی پاکیزه بیر ساحلده اگلشسون
ترانه ایلسون بلبل عزای گلده اگلشسون
سوزوم دیلدن چخور ایله کمک قوی دیلده اگلشسون
سالور باخ گور نجه بو مجلسه شور و فغان زینب
..
..
نه زینب اسوۀ ایمان و حلم و عصمت و تقوا
نه زینب قدرت مالک رقابه آیت کبری
نه زینب خاکبوس مقدمى لعل لب حورا
دل عشّاق عرفان جاهه عین آرمان زینب
..
..
نه زینب میوۀ عمرون غم و غصه دادین سؤیدی
نه زینب خیل احرارون مذلّتدن یادین سؤیدی
نه زینب خالق یکتا اونا زینب آدین سؤیدی
على المرتضایه اولدی زیب دودمان زینب
..
..
نه زینب یازماق اولماز مین کتابه مدحت پاکین
نه زینب طایر عشقی بلا صحراسینه ساکن
نه زینب الّى بش ایل عمر ایدوب بو دهرده لکن
اونون الى ایلین شام و سحر قان آغلیان زینب
..
..
نه زینب بار وصفیندن قلملر قامتی خمدی
دییلسه شیرزن عنوانینه یوخ شبهه سی کمدی
شجاعت جوهرین زهرا کیمی علامه دن اَمدی
ویروب تأثیر پر معیارینی دهره نشان زینب
..
..
نه زینب کربلا سلطانینه هم عهد و هم سودا
نه زینب همّت مردانه سی چرخه سالان غوغا
نه زینب قتلگهده غیرتیندن عصر عاشورا
دوتوب شمشیر شمری موم تک الده سخان زینب
..
..
نه زینب عرصۀ نهضتده بیر رزمندۀ ماهر
نه زینب شعلۀ آتشده جان یاندرماقا شاکر
سنق محملده فتوای مواسات ایلین صادر
حسین بن علی عشقینده اوّل باش یاران زینب
..
..
نه زینب کاخ اجلالین یخوب ویران ایدن سئللر
نه زینب همدم آهی یاتان دیللر اسن یللر
توکن ئوز باشینه دست عداوت بامیدن کوللر
سر مذبوح مولاسی جداده داشلانان زینب
..
..
بو زینب که دیدیم عشق اهلینه زیبا آدی جاندی
بو زینب که دیدیم زلفی اونون تفسیر قرآندی
مبارک اللری زنجیر نامردیله باغلاندی
ویروب یا للعجب گور نه چتین بیر امتحان زینب
..
..
خدایا هانسی اللر فاطمه نازین چکن اللر؟
گلستان ولایه گوز یاشیلان سو سپن اللر؟
قویون واضح دیوم عباس نام آور ئوپن اللر
دیون واردور یری سیزده بو اعظم درده جان زینب
..
..
یانیدون ای فلک یاندی دلیم بو درد دشواره
حسین چوخ ایستین زینب قالوب ویلان و آواره
زمان اولدی گله بزم یزید پست و میخواره
ساچی آغ بختی قاره قامتی مثل کمان زینب
..
..
قوتارمشدی جدال دیو ظلمت آفتابیله
همالر شهپری سنمشدی منقار غرابیله
پیمبر عترتی باغلیدی یکسر بیر طنابیله
سر صفده امام و انتهاده باغریقان زینب
..
..
یزیدون حاکمیدی ظلم و جوره دست خونریزی
بنات عصمتون خونپاشیدی چشم دل انگیزی
یازوبلار قصر خضرانون واریدى یدّى دهلیزی
همان دهلیزلردن گتدی قصره کاروان زینب
..
..
ایدم شرح قضایا دیلده والله نه دوزوم واردی
توسل ایتمیشم زینب عطاسینده گوزوم واردی
گر اولسون مشتری بوردا یانقلی بیر سوزوم واردی
گورون نه چکدی بو معبرده بانوی جهان زینب
..
..
او دهلیزون بیرینده ظلم بی پایان اولوب احساس
شرار کینه سین عرشه اوجالدوب فرقۀ خنّاس
دوشوب بیر حالته زینب چاغوردی هارداسان عباس
اسوبدور دیزلری اگلشدی یرده ناگهان زینب
..
..
دوام دل بو محنتدن منه بیر ثانیه یوخدور
کلام حقه گوش آشنا آیا نیه یوخدور
دییللر بیر مثل مردم قلم دیوانیه یوخدور
من اولدوم ایندی دیوانه سنه خاطر اینان زینب
..
..
ائلیکه زینب اگلشدی قطار غم دوشوب لنگه
پوزولدی صف بیر آز فکر ایت فشار ناهماهنگه
بوغازدان باغلانان قزلار نفسدن دوشدیلر تنگه
دیدی زین العبا بیردن نه اولدی عمّه جان زینب
..
..
سنه دست اجل اولما هلاکت دامنی قوردی؟
ندور بو ماجرا عمّه دیلیمده صبری سندردی؟
دیدی نیلوم بالا دشمن باشیمدان بیر آغاج وردی
آغر ضربه ایدی آخر ایتمدی تاب و توان زینب
..
..
قلم یاغدرما چوخ نسگل بوقدری نسگل اوستوندن
گوتورمه پردۀ محنت داخی راز دل اوستوندن
دیمه اندی آغاج دگدی او زخم محمل اوستوندن
نه چکدی بارالها بیر او لحظه جانفشان زینب
..
..
غرض مقصودینه چاتدی سگان بیت سفیانی
حقارتلن چکوبلر مجلسه اولاد زهرانی
او بزمی دولدوروب آل علینون آه سوزانی
یزیدیلن دایاندی روبرو فخر زنان زینب
..
..
رجوعیم یوخ مفصّل سوز یازام بحران مجلسدن
اسیران غمه حاکم اولان طوفان مجلسدن
حدیثیم وار طلائی طشتیده مهمان مجلسدن
اونون سر گشته و آواره سیدی بیگمان زینب
..
..
او باش که جلوۀ مهتابی محو ایلردی نورینده
او باش که میهمان اولموشدی خولینون تنورینده
اونا هند اوغلی توهین ایلدی زینب حضورینده
نجه دوزدی گورون بو محنته بی خانمان زینب
..
..
ایلیکه اولدی اجرا دست ظلمون کینه ترفندی
رسول الله ئوپن شیرین دوداقه خیزران اندی
گوروب بو صحنه نی شریان زینب تئز گره لندی
یریندن شیر تک دوردی علیدن درس آلان زینب
..
..
اگرچه سینه داغلیدی ولی اژدر شکاریدی
کمان قدیدى لکن کوه سرسخت وقاریدی
زبان آتشینی سن دیردون ذوالفقاریدی
بنای دولت ظلمی یخاردی بی امان زینب
..
..
او بانوی وفا پرور حسینون یار و همدستی
گوزل خمخانهٔ عشقون کفیل و کهنه سرمستی
دیدی هند اوغلونا ای اسوۂ بیعاری و پستی
بیله فکر ایتمه یارادن دوشوب آتش زبان زینب
..
..
مباهات ایلمه ظالم بو اندازه زر و زوره
سنون جدون ئوزیلن بار لعنت حمل ایدوب گوره
بیزیم اجلاله شاملدور ولی چوخ آیه چوخ سوره
باش اگمز سن کیمی امّ الفساده قهرمان زینب
..
..
سنه گر ارذل النّاس آد قویا دؤر زمان کمدی
ولی من دخت پاک اشرف النّاسم مُسلّمدى
کتاب اللهه تأویل رسا بو داغلی سینمدی
ایدوب صندوق دیلده علم قرآنی نهان زینب
..
..
بو تخت و تاجیوی بیللم سنون بیر کاهدن کمتر
مزیّن قصریوی گوررم غبار راهدن کمتر
ولی ملک سلیماندور بیزیم درگاهدن کمتر
سنه بو ادّعانی شامیده ایلر عیان زینب
..
..
طلیق اوغلی او باش که طشتیده سن ایلوسن تحقیر
یازوب اونلان منه بیر عهدنامه منشی تقدیر
او کام آلدی شهادتدن من اولدوم بستۀ زنجیر
مرادیمدور مُرید اولموش اونا هر بیر زمان زینب
..
..
اراده ایلسم سیر زمانی من دولاندیررام
شرار آهیمی یایسام بوتون دنیانی یاندیررام
او قانلی باشه آند اولسون سنی بو یرده سندیررام
منه شهرت ویرر عالم یزیدى سندران زینب
..
..
جلال و جاهیوه تاریخده خونین رقم وورّام
کتاب فتحیمه دیباچه ده زرّین قلم وورّام
منه زینب دیللر قصریوه قاره علم وورّام
سنی آسوده قویماز آلمیینجا قانه قان زینب
..
..
می نخوتله سن مست و می وحدتله من مدهوش
اجل پیکین اگر گورسه آچار جان طایریم آغوش
من ئولسمده گنه اولماز زبان نهضتیم خاموش
یریمده جانشینیم وار هله بیر کاروان زینب
..
..
اولوبسان مست لا یعقل ریاست اشتیاقیندن
مسلمان پیشواز ایلر محبّتلن قوناقیندن
اوتان آز خیزران وور قانلی باشون گول دوداقیندن
اونون هجران عشقیندن اولوب بی آشیان زینب
..
..
ترحّم گرچه گورسنمز دل نامرد و راذلدن
اقلاً شرم ایله بیز یورقونوق طیّ منازلدن
داخی ال چک حسینیمدن اوشاقلار دوشدیلر دلدن
گرک سرمنزل عشقه چکه بار گران زینب
..
..
بو قیزلار که گورورسن بستۀ زنجیر محنتدور
بو آهولر که صیّادون الیندن غرق وحشتدور
منه سن ئولدورن مظلوم حسینیمدن امانتدور
رها قیل دامدن شاید تاپا راحت مکان زینب
..
..
او خونریز اللروندن قویما چوخ برق بلا شاخسون
گُلون سنسا بوداقی بلبلون اشکی گرگ آخسون
بو آهو گوز قیزیم قوی بیر او کول دولموش گوزوه باخسون
بو غملی صحنه دن یازسون دیله بر داستان زینب
..
..
الا ای زینب گردون خدم محبوبۀ عالم
لوای عشقووی قیلدون فراز حقّیده محکم
وورار «سیفی» قلم ایللردی مدحونده دیرهردم
قبول ایتسون اگر فخریمدی کلب آستان زینب
..
..
#مجلس_یزید #سیفی_اردبیلی #ترکی #زبدةالاشعار
نظر دهید