حالات مجلس یزید
قرآن خواندن رأس حضرت سیدالشهدا
..
..
مرحوم ذهنی تبریزی
..
..
بیر یزیدی که اونون ظلمینده نقصان اولماسون
ایلیوب هر جور و ظلمی بیر پریشان اولماسون
..
..
نه روادور چرخ دون ایتسون او دونی کامیاب
ئولدوروب پیغمبر اوغلون ایتمسون بیر اجتناب
بزم خاصه چکسون اوُل آل اللهى قولدا طناب
بیله ظلمی یاد ایدن دللر نجه قان اولماسون
..
..
عترت اطهاری ساخلوب مجلسینده بی حجاب
بعضینون یِنگی اَلی یوزده اؤرکده اضطراب
بعضی توکموش گول کیمی رخساره زلف مِشگناب
تا یوزی نامحرم انظاره نمایان اولماسون
..
..
بیر طرفده آغلاشوردی عترت عصمت نصاب
بیر طرفده سسلنوردی دمبدم چنگ و رَباب
بیر طرفده آلت شطرنج بیر یاندا شراب
ایله بیر مجلسده یارب بیر مسلمان اولماسون
..
..
اوینیوب نَردی یزید ایتمزدی هرگز اجتناب
اوچ امامینی محضرینده ایتدی شُربه ارتکاب
گاه طعن ایلوب گولوب گاهی دانشدی بی حساب
گه دیدی کیمدور منیم عیشیمده شادان اولماسون
..
..
چون او مطلق کافر اولدی باده دن مست و خراب
ایستدی قانه دونن دللر گنه اولسون کباب
سویلدی زینب دانش منله سوزیمه ویر جواب
حق دانیش اما سوزونده باطل عنوان اولماسون
..
..
ایمدی حق آل ابوسفیانیمیش یا بوتراب
حمد لله شاهد مقصود آتوب یوزدن نقاب
باطل اهلین ایلدی رسوا خدای مستطاب
ایله مخذول اولدوز عالمده بو خِذلان اولماسون
..
..
سوز یتیشدى بیر یره آخر یزید ایتدی خطاب
امر ایدوب جلاد زینب قتلینه ایتسون شتاب
سس چکوب فریاده گلدی عترت ختم مآب
اولمادی بیرکس او جمعیتده گریان اولماسون
..
..
جلوه لندی ناگهان رأس حسین چون آفتاب
ایتدی بیر آیه تلاوت اول شه والاجناب
حال مجلس ایلدی بیر اوزگه حالت اکتساب
قالمادی بیر کیمسه بو اعجازه حیران اولماسون
..
..
اهل مجلس بیر بیره دگدی تماماً شیخ و شاب
بو پیمبر باشیدور یوخسا اونا نایب مناب
هرگز اولماز اوزگه باشلاردا بو قدرت انتخاب
باش دانشماز اوندا گر آیات سبحان اولماسون
..
..
تا یزید احساس ایدوب وار مجلسینده انقلاب
خیزران الده او باشه گوئیا ایتدى خطاب
یا حسین قرآن اوخورسان تا یزید اولسون مُجاب
من شهید ایتدیم سنی عالمده قرآن اولماسون
..
..
من دیدیم گل بیعت ایله بول منی مالک رقاب
ایلرم منده سنی عالی مقامه انتصاب
سن دیدون اولا منم شأنیمده نازلدور کتاب
مندن اوزگه ملّت اسلامه سلطان اولماسون
..
..
اگمدون باش گور خطا گیتدون بو یولدا یا صواب
حق کیمی مغلوب ایدوب کیمدور بوگون مالک رقاب
بو باشون بو اهل بیتوندور گرفتار عقاب
بیله مغلوب اولدوز هرگز بیرده جبران اولماسون
..
..
«ذهنی» یاز اشعاریوی توک اشک چشمون چون سحاب
قوی حرام اولسون سنه دنیا یوزونده خورد و خواب
آغلاسا هرکس حسینه حشرده گورمز عذاب
هانسی خدمتدور حسینه اجری رضوان اولماسون
..
..
#مجلس_یزید #ذهنی_تبریزی #ترکی #زبدةالاشعار
نظر دهید