اتمام حجت امام حسین (ع)
..
..
مرحوم دخیل و مرحوم ذهنی زاده (1)
.
.
من هیچ کیمین اعانتینه تکیه ایتمرم
بسدور توکل ایلماقا بیر خدا منه
..
من چکرم زمانه ده نامرد منّتین
مردانه قارداشیم اوزین ایلر فدا منه
..
هرچند اولماسا قاباقمدا قلج ووران
بسدور بو ذوالفقار شه لافتى منه
..
هر قدر مشکلیم اولا مشکلده قالمارام
بسدور نجف چولونده کی مشکل گشا منه
..
دشمن ایچینده گرچه کمک سیز گورر منی
ایلر رقیه زلفى الینده دعا منه
..
قرآن اکر بس اولماسا اتمام حجّته
اکبر کیمی وار آینۀ مصطفی منه
..
سندیرسالار بو آینه نی قطعه قطعه گر
هر ذره سی بیر آینه دور حق نما منه
..
من که شهادتین گویونون آفتابیم
زیبنده دور الیمده ایشقلى سُها منه
..
اصغر کیمى ایشیقلی گوزل بیر ستاره نی
بو گوندن أؤترى مرحمت ایلوب خدا منه
..
آق رنگینی ساراتسا عطش شیرخواره مین
قرمز بویار قانیله خدنگ جفا منه
..
من که نجات عالم امکانه باعثم
لازمدى اهل عالمه اولسون فدا منه
..
ظاهرده چوخدی دشمنیم آزدی کمک لریم
لشگردی باطناً هامی ارض و سما منه
..
امر ایلَسَم بو لشگری یر خَسف ایدر تمام
ایلر تمام گوگلری کلاً هِبا منه
..
من ایستمم بو قدرتیمین استفاده سین
منظوردور مشیت أمر قضا منه
..
حتی که اذن جنگ ابوالفضله ویرمرم
قربان گرک اولا او قتیل العدا منه
..
باش قویمارام نقدر وارام ناز بالشه
خاکستر تنور اولاجاق متکا منه
..
کوه منا فدالریمه لایق اولمادی
گتدیم بو کربلا چولی اولسون منا منه
..
قالو بلا صحیفه سینه یازمیشام اوزوم
من کربلایه منتظرم کربلا منه
..
من یاتماسام بو دشت غم افزاده کیم یاتار
مدفن یازیلمیوبدی بو یردن سوا منه
..
بوردا قرار اولوب تاپالار شیعه لر منی
باهم بیر آغلاشاق اولالار همصدا منه
..
رشگ بهشت عدن اولاجاق کربلا چولی
گر اولسا کربلا هامی کرب و بلا منه
..
اولّام فدای حقّ و حقیقت بو دشتده
باجادی حقّ اوزی اوخوسون بیر دعا منه
..
«سائل» که صدقیله قویوب اوز آستانیمه
امّید عفوی وار ایدوری التجا منه
..
..
..
(1) پنج بیت اول از مرحوم #دخیل
.
#حسینیه_شهادت #عاشورا #حسینیه_دخیل #ذهنی_زاده
#من_هیچ_کیمین_اعانتینه_تکیه_ایتمرم #دخیل
#ترکی #زبدةالاشعار
نظر دهید