میدان کارزاریده فرزند بو تراب – ای نونهال باغ حسن یاتما دور گیداخ #قاسمیه_وافی_تبریزی

شهادت حضرت قاسم (ع)
.
.
مرحوم میرزا محمدتقی ولادی (وافی تبریزی)
.
.
میدان کارزاریده فرزند بو تراب
نعش جناب قاسمه قیلدی بیله خطاب
.
ای نونهال باغ حسن یاتما دور گیداخ
ای سرو ناز صحن چمن یاتما دور گیداخ
.
ای قارداشیم حسن تک اولان مهربان منه
قویما منی بو حسرتیلن یاتما دور گیداخ
.
از بسکه قان آخوبدی اوغول سنده قویمیوب
تاب ادای طرز سخن یاتما دور گیداخ
.
سن تک کمند ظلمه شکار اولمیوب یقین
آهوی خوش خرام ختن یاتما دور گیداخ
.
گورمز سنون کیمی داخی گلزار بو تراب
نه یاسمن نه سرو سمن یاتما دور گیداخ
.
باش یاره، سینه یاره، بدن یاره، یاره سیز
بیر عضو یوخ گمانه گلن یاتما دور گیداخ
.
قارداش اوغول مصیبتنی باشدان آتموشام
تا یوز ویروب بو تازه محن یاتما دور گیداخ
.
گوزلور یولون سریه آنان قویما منتظر
بسدور اولوب جلای وطن یاتما دور گیداخ
.
دل خسته قوملار اوسته بدن سربسر یارا
کیمدور بو قدری ظلمه دوزن یاتما دور گیداخ
.
طوی حجله گاهون اولدی سنون گوشۀ لحد
عشرت لباسی قانلی کفن یاتما دور گیداخ
.
تپراقلار اوستی گونلر ایوی کیم گوروب اوغول
آت دیرناقی یارالی بدن یاتما دور گیداخ
.
سن سسلَمیردون ایمدی منی داده بس نولوب
دیندیرمیسن داخی منی سن یاتما دور گیداخ
.
ناز ایلیسَن اوغول منه یا حسّ ایدنمیسن
کیمدور بو باشون اوسته گلن یاتما دور گیداخ
.
چوخ نسگل اولدی من سنه امداد ایدنمدیم
هر قدر سسلدون منی سن، یاتما دور گیداخ
.
ماتم دوتوبلا خیمه ده ایمدی حرملریم
ایلوبله شور حشری عَلَن یاتما دور گیداخ
.
بولّم آپارماسام گله جک باشون اوستونه
بیر سلسله جوانی ئولن یاتما دور گیداخ
.
«وافی» سنون مصیبتوی خوش بیان ایدر
ایستر جزا گونونده ثمن یاتما دور گیداخ
.
.
.
#قاسمیه #وافی_تبریزی #قاسمیه_شهادت #ترکی #زبدةالاشعار