راه شام
..
..
محیر اردبیلی
..
..
ندندی چرخ همیشه عزیزی خوار ایلیور
دنی صفتلری عالمده کامکار ایلیور
..
سالور دمیر قفسه عندلیب شیدانی
ولی چمنده گولی همنشین خار ایلیور
..
دچار ایدر گوزل آهونی دام صیّاده
ولیک روبه مکّاری هوشیار ایلیور
..
تعجبّم نیه باغلور قولینی مظلومین
ندندی ظالمی بس صاحب اقتدار ایلیور
..
ایدر شقاوت ایچون پروریده نمرودی
خلیل حقّی ولی همجوار نار ایلیور
..
جهاندا قدرت بازو ویرور یهود لره
دوتوب مسیحی جفائیله سربدار ایلیور
..
حمایت ایلور همیشه ابولهب لردن
رسول اکرمی محتاج کوه و غار ایلیور
..
امیر امت اسلام ایدر معاویه نی
على قالور اونی خلقه زمامدارایلیور
..
حسین فاطمه نی ایلیور جلای وطن
یزیدی تخت حکومتده برقرار ایلیور
..
یارالی باشین اونون تاج ایدور جدا باشینا
منای عشقه آخور قانی لاله زار ایلیور
..
گوروم بو چرخی دایانسون مدار و سیریندن
کیمیله دشمن اولور کیمله سازگار ایلیور
..
خانملیقینی الیندن آلور على قزینون
دولاندیرور باش آچوق تیره روزگار ایلیور
..
سنق کجاوده اگلشدیرور او مظلومی
دیار شامه قولی باغلی رهسپار ایلیور
..
گیدنده شاهه شیرین دل رقیّه چولده قالور
بلالی عمّه لرین زار و دلفکار ایلیور
..
فلک او خورداقزون باشینه نه لر گتورور
خیال ایدنده منی حیرته دچار ایلیور
..
قرانقلوق گیجه بیراهه یول اوزی داغ داش
او حالدا هر کیم اولا فکر غمگسارایلیور
..
یاتوبدی یولدا قرانلوندا بیر چوخور یرده
نه وقت خوابیدی بلمم او گلعذار ایلیور
..
باشینون آلتدا قرا معجرین ایدوب بالش
نه فکر معجر و نه فکر گوشوار ایلیور
..
تیکاندی داشدی او وسعتلو دشت پر وحشت
پیاده نون ایاقین یاره یا قبار ایلیور
..
نه سس گلور نه صدا اول بلالی صحرادن
نه بیر نفر او بیابانیدن گزار ایلیور
..
سس اولسادا او قزون اوز نَفَسینین سسیدور
اسنده یل حرکت زلف مشکبار ایلیور
..
او آز یوخونیدا قویمور فلک یاتا راحت
تیکان کولی اونیچون خوابی ناگوار ایلیور
..
ضعیف جسمینه تئزتئز باتوب اذیت ایدر
یاتور گنه آیلور هردم آه و زار ایلیور
..
بیر آز گئچوب گوزین آشدی او مه لقا یوخودان
خیال ایله نه خیالات او گیر و دار ایلیور
..
دوروب ایاقه اول بیر صافا صولا قاشدی
دیدی فلک منه هر جور و ظلمی وار ایلیور
..
الهی گیتدی منیم هانسی سمته عمّه لریم
کیمیم گلوب منی بو ورطه دن کنار ایلیور
..
اوزیمده بیلمورم آخر ایشیم هارا یته جک
نیه بو ظلمی منه قوم نابکار ایلیور
..
نیه گیدنده منی خوابیدن اویاتمادیلار
بیلورم ایندی بی بیم فکر بیشمار ایلیور
..
بو بی پناهون اؤزون دادینه یتیش الله
منی سنون گینه رحمون امیدوار ایلیور
دیور بو سوزلری گاه آغلیوب گھی دولانور
گھی یولین صاقینی که صولین عیار ایلیور
..
نه گوردی اوندا ایکی آتلو سرعتیله گلور
اولار گلن یولی مرکبلری غبار ایلیور
..
ولی اونون بیرینون الده تازیانه سی وار
که قهراً هر گوره نی وحشته دچار ایلیور
..
تانیدی زجریدی یولّاردا بسکه گورمیشدی
نه ظلم گلسه الیندن او ظلم کار ایلیور
..
اودور قویوبدی الین سینیه سلام ایله دی
بو فکرلن که اودا رحمین آشکار ایلیور
..
هزار حیف اونون ویردیگی سلامیندن
مقابلنده کی رفتار ناگوار ایلیور
..
الینده قمچی سینی بیر هوایه قالخزدی
گوروبدی دگسه اگر حکم مرگبار ایلیور
..
اوجا سسیله گلوب نطقه یولداشی زجرون
دیدی او ظالمه ظلمون جهانی تار ایلیور
..
الوی ساخلا بونی وورما اللرون سنسون
بونون اورگینی قان ویردیگون فشار ایلیور
..
گناه سیزده دی آخر بونون نه تقصیری
جزای بد سیزه واللهی کردگار ایلیور
..
بو تازیانیلن سن اگر بونی وورسون
ئولر الونده و یا تازه دن فرار ایلیور
..
گلوبه منیم آتیمون سینه سینده گیزلنمش
سسین چیخاتموری اشکین ولی نثار ایلیور
..
بیر آزجا حوصله ایت غم قطارینه یتورک
هلاک عمّه لرین یوخسا انتظار ایلیور
..
محبت ایله سنق قلبی قوی اله گلسون
گورک منیم سوزیمون هانسین اختیار ایلیور
..
اگر قبول ایلسه ترکیمه سوار اولسون
پیاده گیتسه ایاقین تیکان قابار ایلیور
..
اونون محبتنی گوردی تئز گلوب قاباقا
دیدی بو حقّون ادا حیّ کردگار ایلیور
..
منیم دلیمجه بو زجر لعینه دئ یا شیخ
مگر شکار ایلین لر بیله شکار ایلیور
..
یوخوندی دینون اقلاً مروّتون اولسون
جزاگونی سنی بو فعلون اهل نار ایلیور
..
منی بو چولده ووروب ای ستمگر ئولدورمه
اگر ئولم منی کیم داخل مزار ایلیور
..
سیزیله بیر آتا مینمکدن ئولمه گیم خوشدی
مگر بو امری قبول هانسی با وقار ایلیور
..
سیزیله بیر آتا مینسم گناهدور منیچون
جداده اکبریمی حتماً اشکبار ایلیور
..
سورون آتوزی دالوزجان پیاده من قاچارام
ایاقلاریمی یارا گر چه نیش خار ایلیور
..
خلاصه بیز آتی سوردوک او قز پیاده قاچوب
پیاده قاچماقا عصمتله افتخار ایلیور
..
بیر آز کی گیتدوک او قز گوردوک اگلشوب یرده
آچوبدی معجرینی باشدان آه و زار ایلیور
..
ایکی بولوب اونی نصفین ایاقینه باغلور
یوزینه نصفینیده گوردوم استتار ایلیور
..
دیدیم خانم نیه سن باغلوسان ایاقلاروی
دیدی تیکانلار ایاقیمی زخمدار ایلیور
..
غرض یتوردوک اونی زحمتیله قافلیه
همین روایتی بیر شخص نیزه دار ایلیور
..
گلوب جداده باباسیلا روبرو دوردی
دیدی خدایه قزون شکر بیشمار ایلیور
..
بوکاروانه بابا ئولمه دیم گنه گلدیم
رقیّه نی سنون عشقوندی بردبار ایلیور
..
جداده قانلو گوزون باخسا گاهگاه منه
خرابه شامه گبدینجه منی خمار ایلیور
..
و بیرده وار قزیون بیر گلایه سی سندن
یارالى قلبیمی بو غصّه داغدار ایلیور
..
دوشرگه ده منِ زاری شکسته محملدن
کیم اندیرور خبرون یوخدی کم سوار ایلیور
..
گینه ده عمّه مه پروردگار یار اولسون
محبّتی منی هر یرده شرمسار ایلیور
..
او اولماسیدی بیزی یولدا ئولدورردی قشون
اونون وجودینه بو قزلار افتخار ایلیور
..
امان بو زجرین الیندن گوتورمز ال مندن
نه رحمی وار اؤره گینده نه شرم و عار ایلیور
..
یوخونلوقندا اولاندا منه وورار سیلی
گورور اوزاقدا گینه قصدین آشکار ایلیور
..
..
#راه_شام #محیر_اردبیلی #ترکی #زبدةالاشعار
نظر دهید