وداع و شهادت حضرت علی اکبر (ع)
.
#زبدةالاشعار
.
: @nohe_torki
.
علومی تبریزی
.
نوبت یتوب آل اللّهه گلدی هامو داده
اوّلده حسین اکبری گوندردی جهاده
.
ایستر گیده سس گلدی که جانانیده گور گیت
گل خیمیه جان اوسته دی لیلانیده گور گیت
.
بیردن توکلوب خیمه دن اطرافه حرملر
هی سسدی گلور گل بو پریشانیده گور گیت
.
اصغر الى اوستونده ربابین گله بیلمور
آهسته دیور بو قوزی قربانیده گور گیت
.
بو سس اوجالور شورله بیر خیمه سرادن
کلثومه یتیش زینب کبرانیده گور گیت
.
ناگه باجیسی گوردوله قرانیله گلدی
سسلور سفر اوستونده بو قرآنیده گور گیت
.
یا رب بو کیمون ناله سیدی قلبه ویرور اود
سویلور على بو دیده سی گریانیده گور گیت
.
مشگل گله سن خیمه لره بیرده سلامت
گیت خیمه سینه عابد نالانیده گور گیت
.
بیر خسته دی سو جامی الینده گوزی یاشلو
آغلور دیور آخر بو لب عطشانیده گور گیت
.
گوز یاشلی دیدی اوغلونا یعقوب زمانه
گل یوسفیم آخر شه کنعانیده گور گیت
.
اکبر ایشیدوب باد صبادن بو صدانی
قارداش علی گل یثربه صغرانیده گور گیت
.
.
آلموشدی اجازه گیده میدانه لب عطشان
دوتموشدولا داماننی اطفال پریشان
.
.
///وداع شهزاده علی اکبر///
.
میدانه گیدنده او جوان شیون اوجالدی
اولدوزلار او ماهین توکلوب دوره سین آلدى
.
بیر سمتده اوز عمّه سی بیر سمتده باجی
بیر یاندا آنا شوره گلوب سولدی سارالدی
.
گوردی گیدور اكبر كسیلوب چاره سی الدن
آهیله یانان قلبلره ولوله سالدى
.
سسلندی علی ایندی که میدانه گیدورسن
گیت فکر ایلمه یولدا آناوین گوزی قالدى
.
اما ویر اجازه که ویروم زلفوه شانه
بیرده دولانوم باشوه چون چارم آزالدی
.
بو منظریه دوشدی امامین گوزی ناگه
سسلوب باجیسی زینبون آرامنی آلدى
.
فرمایش ایدوب گل باجی ای وارث زهرا
اکبر گیدوری بیرده قایتماقی محالدی
.
عمّامۀ پیغمبری شمشیر علینی
حاضر ایله زینب که بو گلزاری چم آلدى
.
اکبر بئلینه باغلادی شمشیر علینی
عمّامۀ پیغمبری قویدی یولا سالدى
.
آیرلدی حرمدن هامو ایلوردی تماشا
بیردن هامو فریاده گلوب شیون اوجالدی
.
.
شاه شهدا بیر دولانوب اکبره باخدی
بیرده یتیشوب تلّه کمی لشگره باخدی
.
.
///عزم میدان شهزاده///
.
ای قوم بو اكبردی غم اکبری واردی
سهم علوی صورت پیغمبری واردی
.
حق اوسته ال اوزدوم بیله گل یوزلی جواندان
شهزاده دی سیمای ملک منظری واردی
.
فکر ایله میون یوخ کمکی دشت بلاده
حیدر کیمی دعواده بونون یاوری واردی
.
اکبردی بو اسماعیل اولوب آل خلیله
لیلا کیمی گوز یولدا قالان هاجری واردی
.
منظوری شهادتدی گلور قانه بویانسون
باشیندا شهادتدن ازل افسری واردی
.
بیرده بودی فكری بیر ایچیم سو آلا سیزدن
گهواره ده بیر تشنه جگر اصغری واردی
.
انصافه گلون ایلمیون اوغلومی مأیوس
گوز یولدا حرم خانه ده غم پروری واردی
.
آتدان یخلاندا یره بیر شربه ویرون سو
چوخ تشنه دی سیراب ایلیون داوری واردی
.
شوقیله گیدور دعوت اولوب بزم حضوره
جدّیم کیمی معناده بونون سروری واردی
.
بیر اوزگه خیال ایله میون باخسا خیامه
دل داغلودی بو تازه جوان دلبری واردی
.
.
میدانه یتوب ایلدی اوّلده نصیحت
اما یوخیدی خصمده آثار مروّت
.
.
///جهاد شهزاده علی اکبر///
.
آلدى اله شمشیرینی اوّل دیدی تکبیر
ویردی اوزینی معرکۀ روبَهَه چون شیر
.
عبّاسیدن اورگنمیشیدی شیوۂ جنگی
سانسیز قوشونون هلهله سی ائتمدی تاثیر
.
بکر آدلی قوی پنجه یلى قتله یتوردی
وحشت دل اشراری او دم ایلدی تسخیر
.
صاقدان صولا صولدان صاقا گه ایلدی حمله
شوقیله ویراردی سپه دشمنه شمشیر
.
هر دم دولانوب خیمه لره ساری باخاردی
باخمازدی یاغش تک او بیاباندا یاغیر تیر
.
اما تکیدی کیمسه هواداری یوخیدی
جسمیندن اولوردی یره چوخ قانی سرازیر
.
گئتدوقجه بدن قانی دوشوب تاب و تواندان
تقدیردی تدبیر ایلمز چاره تقدیر
.
یعقوب ایلین ظلمنی اول یوسف عصره
یوخدور قلمیمده او توانا ایده تحریر
.
منقذده باشوندان یارا ویردی او جوانین
اولدی داخی صیّاد ستم پروره نخجیر
.
آتدان یخلاندا یوزینی خیمیه دوتدی
عرض ایتدی بابا داده یتش ایلمه تاخیر
.
.
قالما نگران اولما داخی خیمه ده بی تاب
جدّیم بودی جام الده منی ایلدی سیراب
.
.
.
///استمداد علی اکبر///
.
اکبر سسینى آلدی حسین اولدی پریشان
چوخ سرعتیله رزمگهه گلدی شتابان
.
سسلردی علی هاردا دوشوبسن گنه سسلن
تا گزمیه میدانی آتان دیده سی گریان
.
ای جدّیمه بنذر اوغول ای مایۀ امّید
بیرده آتاوی داده چاغور من سنه قربان
.
ناگه بو سسی آلدى حسین سمت نجف دن
گل گلمشم امدادیوه ای خسرو خوبان
.
اکبر باشینی آلموشام ایندی دیزیم اوسته
گوزلور سنی تا محضر یاره گیده مهمان
.
یتدی او زمان یدّى قدمده یره دوشدی
گئتدی دیزی اوسته تاپوب اوز اوغلونی شان شان
.
گوردی نجه اکبر یخلوب قاننه غلطان
گویا گل احمردی اولوب ظلمیله خندان
.
قانلو یوزینه قویدی ازلده یوزین اول شه
ایتدی آتانین صورتین اكبر قانی الوان
.
باخدى او جوانه اورگی اولمادی آرام
قویدی اورگی باشینه باشین ایدوب افغان
.
سیلدی او گوزل دیشلرینون قاننی بیرده
یوز دوتدی گویه عرض ایدوب ای قادر سبحان
.
.
لطفیله بوقربانی قبول ایله الهی
آخدى یوزونه گوزیاشی اوج ایلدی آهی
.
.
///زبانحال امام بعلی اکبر///
.
فرمایش ایدوب ای منی گوزدن آتان اوغلوم
آچ گوزلریوی داده گلوبدی آتان اوغلوم
.
سن باشدان على منده اورکدن یارالاندیم
ای قتلگهونده قانی قانه قاتان اوغلوم
.
دور گور باشون اوسته باش آچوب نالیه گلّم
حق اوسته دور ای قانینه ناحق باتان اوغلوم
.
یاتمیش سنی من گورمه میشم بیله یاتوبسان
بُلَّم یورولوبسان گوزون آچ ای یاتان اوغلوم
.
گورموب بو قوشون شبه رسول مدنی سن
آخر نجه بی رحمدی بو اوخ آتان اوغلوم
.
سن گتدون اوغول قافلۀ عشقه یتشدون
مقصودینه ای ملک ولاده چاتان اوغلوم
.
چرخ ادبین اولدوزی بوعرصه ده باتدی
صبح اولدوزی تک ای ستمیله باتان اوغلوم
.
سندن صورا کول باشینه دنیانین علی جان
سنسن بو فنا ملکی بقایه ساتان اوغلوم
.
باشون یاراسی سالدی علی کوفه نی یاده
ای اوز باباسی حیدری یاده سالان اوغلوم
.
کیم ویردی اوغول بو اورگین باشینه خنجر
سینسین الى آخر بیله خنجر ووران اوغلوم
.
.
القصّه جنازه حرمه شوریله گلدی
لیلاده گلوب اکبری گوردی دله گلدی
.
.
.
#اکبریه_علومی_تبریزی
#اکبریه_شهادت
#نوبت_یتوب_آل_اللهه_گلدی_هامو_داده
#ایستر_گیده_سس_گلدی_که_جانانیده_گور_گیت
#ترکی
.
#زبدةالاشعار
.
: @nohe_torki
نظر دهید