ذوالجناح
..
..
مرحوم صدری اردبیلی
..
..
همان زمانده که شهریار ملک عرب
اجازه وئردی گئده سمت خیمیه مرکب
..
لجام مرکبینی بند ائدوب یهر قاشینا
او ذوالجناح وفاداری قویدی اوز باشینا
..
دیولّه بیر نچه دفعه دولاندی میدانی
سالوب ضلالته بیر جمعی فوج اعدانی
..
آلوب ارایه همان مرکبی او فرقۀ کین
نقدری قیلدیلا تدبیر اولمیوب تمکین
..
زبسکه درگه عالیده ایلمیش خدمت
لجامی قویمادی دوشسون اله قیلوب همّت
..
ائله او محور میدانی خصمه تنگ ائتدی
آچوبدی یول اؤزونه سمت خیمیه گئتدی
..
دوروب او یرده که شه پا رکابه قویمیشدی
حیات عاریه دن کربلاده دویمیشدی
..
چکوبدی شیهه قیلوب گوزیاشین یره جاری
آچیلدی فوج غمه درد و غصّه بازاری
..
خانم سکینه که چوخ انتظاریلن واردی
او قاره بخت سیه روزگاریلن واردی
..
ائشیتدی شیهه سسین هوشی باشدن چیخدی
اوزونی تولادی زینب قوجاقینه یخدى
..
باشوا من دولانوم عمه جان بابام گلدی
گئدک قباقینه تئز مهربان بابام گلدی
..
چوخ اینجیدوب اونی دعوا بابام اولوب خسته
رکابی من دوتارام سنده اندیر آهسته
..
آپار منی اوره گیم دوزمیور فراقینه
اؤپوم رکابی قویوم لبلریم ایاقینه
..
باتوب غباره اونون گل جمالی من بیلّم
اگرچه یوخدو سویوم زلفله توزون سیلّم
..
بو درد و غصه من بینوایه چوخ چوخدور
بابام دوشنده یره مرکبین دوتان یوخدور
..
گئدک قباقینه من درد و غصّه دن قوتارام
على یرینه اونون من رکابینی دوتارام
زبسکه تیره بیزه دور روزگار اولموش
خدا نکرده بابام بلکه زخمدار اولموش
..
او نحویلن که بیلور سوز ائدوبله استقبال
او باوفا آتی بیر عده عورت و اطفال
..
امام تشنه لبون آلدیلار سراغیندن
گوتورمدی یوخاری باشینی ایاقیندن
..
آچیلدی گل کیمی باشلار یولوندی گیسولر
سپیلدی تپراقا برگ خزان کیمی مولر
..
امیر قافلۀ غصّه بی نوا زینب
اؤزی اؤزینه دئدی آنلادوم ندور مطلب
..
ائویم یخیلدی عجب تیره روزگار اولدوم
حسینی دوغرادیلار محنته دچار اولدوم
..
بویوردی من گئدورم زینب ام کلثومه
باجی مواظب اولون کودکان معصومه
..
آتام نشانه سینی غرق ائدیبلر آلقانه
قویون گئدوم دالی ای جان بو قانلی میدانه
..
گوروم هایاندا فلک باشیمه توکوب داشین
حسینی هاردا یخوب هاردا کسدیلر باشین
..
گئدون خیامه اولون درد و رنجه آماده
گئدوم گوروم حسین دوشدی هانسی صحراده
..
رکابدن گورورم اول قدر آخوب قانی
باشینون اوسته گئدوم بلکه چخمامیش جانی
..
قویون گئدوم منی تا خصمه التجا ائلیوم
حسینی قاتل الیندن آلوب رها ائلیوم
..
بو خیمه لرده نجه من اوتورّام آسوده
که خیمه صاحبی آلقانه اولموش آلوده
..
گئدوم حسینی گوروم ذوالجناحی هاردا سالوب
آنامون اوغلی نه حاله دوشوب هایاندا قالوب
..
سیزه خبر گتوروم غملو ماجراسیندن
دویونجا بیرده اؤپوم جسمی نون یاراسیندن
..
یاخوم بو زلفیمه قانین سیزه نشان گتوروم
یانان اورکلره من کاسه کاسه قان گتوروم
..
اگر حسین دیری اولسا بیلوم نهان سؤزونی
و یا که قاتل امان وئرسه باغلیوم گوزونی
..
قوتار بو یرده سؤزی صدریا اوزون بیلوسن
بو درد و محنته یوخ انتها اوزون بیلوسن
..
..
#حسینیه #صدری_اردبیلی #ذوالجناح #حسینیه_شهادت #ترکی #زبدةالاشعار
نظر دهید