طفلان مسلم (ع)
.
✍️ زبدة الاشعار ✍️
?: @nohe_torki
.
معروفان اهری
.
وئررم بو دم اللهه قسم من سنی حارث
گل وورما بویوک قارداشیمی وور منی حارث
.
حارث بیلوسن یوخ آتامیز وار غم ئورکده
وار آتش هجران اثریندن نم ئورکده
غمدن آچیلوب غمکده ماتم ئورکده
یوخ بیر نفر آوار ائده بو غصه نی حارث
.
قلبینده اگر رحم و مروتدن اثر وار
آچما قولوی غیضیله وجدانین اگر وار
دینونده قوناق وورماقا تجویز مگر وار؟
تفسیر ائله مه نفعوه هر آیه نی حارث
.
وجدانین ئولوب ورطه غفلتده یاتوبسان
دنیا سنی مغرور ائلیوب دینی آتوبسان
عقبانی زر و زیورون عشقینده ساتوبسان
طوفان آپارار یئل گتیرن سکه نی حارث
.
سن بند اسارتده منال و زر الینده
اما بیز اسیروخ آخان اشک تر الینده
دوتموش گؤزوی قان ٬ دولانور خنجر الینده
بیر آه اریدر الده اولان آهنی حارث
.
مظلومین ازل آهی دوتار ظالم ایاقین
گون تک قورودار بیر گونی آخرده بوداقین
کیم سن کیمی بیداد ایلیوب ووردی قوناقین
الله بیلوسن خوار ائده جاخ فتنه نی حارث
.
سینونده اولان قاره ئورک سنگدی والله
گردابه دوشوبسن نظرین تنگدی والله
ئولدورمه بیزی دامنوه ننگدی والله
حاشا سیله سن دهرده بو لکه نی حارث
.
بو ئولکه ده بیز زار و غریبوخ هارامیز وار؟
سن وورما یارا سینه ده سایسیز یارامیز وار
گؤز یولدا وطنده باجیمیز وار آنامیز وار
یاندیرما وطنده داریخان سینه نی حارث
.
قصدین بودی گر ایلیه سن جور و جنایت
گر ایستیوسن باشلانا بیر آیری قیامت
یوخ چاره گرک نوش ائلیاخ جام شهادت
وئرسون بیزه حق هدیه ارزنده نی حارث
.
دوزدور یئتیشوبدور داخی هنگامه محنت
اللهه گؤره وئر نئچه لحظه بیزه فرصت
برپا ائلیاخ صبح نمازین ایکی رکعت
ئولدور صورا قان ائت یومولان دیده نی حارث
.
ننگین عملین قالمیاجاخ بیر کسه پنهان
بیرگون آرامیزدا ائده جاق حق ئوزی دیوان
جسمون گئده جاق حسرتیلن دوزخه مهمان
حق ریشه کن ایلر علف هرزه نی حارث
.
#سبک_ای_باد_صبا (بیش از 7 سبک)
.
#طفلان_مسلم
#وئررم_بو_دم_اللهه_قسم_من_سنی_حارث
#معروف_اهری
#ترکی
.
✍️ #زبدةالاشعار ✍️
?: @nohe_torki
نظر دهید