شهادت حضرت خاتم الانبیا (ص)
.
✍️ زبدة الاشعار ✍️
.
🆔: @nohe_torki
.
مرحوم نادری
.
وقت اولوب دنیادن ایلوم منده رحلت یاعلی
گل سنه پیغمبرون ائتسون وصیت یاعلی
.
.
عدل رحمانیله خلق اولموشدی از بس نیتیم
حکم خلاقیله باشه یتدی مأموریتیم
اولماسیدون سن اگر باشسیز قالاردی امتیم
ای وصی مصطفی نور امامت یا علی
گل غروب ایلور بو گون شمس رسالت یاعلی
.
.
سن هلاکتده اولان بیر کسلرین لولاسی سن
هر کسه مولائیدیم سن اونلارین مولاسی سن
جمله مخلوقین بو گون سن سرور و اولا سی سن
وقت اولوبدور من گئدم بو سن بو امت یاعلی
ای چکن مندن صورا دنیاده ذلت یاعلی
.
.
شیر یزدان زوج زهرا ای علمدار رسول
جمع قیل قرآنی چکمه تیغ ، زحمت قیل قبول
بیرده کی مندن سنه ، واردور امانت بو بتول
جان سنون جان فاطمه ، ساخلا امانت یاعلی
ایسترم زهرانی سندن من سلامت یاعلی
.
.
وقت اولوبدور عرض ائدک ، ای سید عالی نسب
عهد و پیمان باغلاموشدی سنله اول شاه عرب
ائتمه دون عهده وفا ، آیا ندور آخر سبب؟
بس ندن توکدون او گون اشک ندامت یاعلی؟
ائتدی شرمنده سنی ، قوم عداوت یاعلی
.
.
گتدی تابوتی گجه ، مولا بیوردی مدفنه
ای بقیع توپراقی بو زهرا امانتدور سنه
قول سنوب جسمی یارا زهرانی تاپشوردوم سنه
وار یری زهرا دئسون چکمه خجالت یاعلی
ایلمم سندن بابامه من شکایت یاعلی
.
.
چون که سنده منله باهم داغلانوبسان یاعلی
سنده منله ظلم اوخیلا اوخلانوبسان یاعلی
ظلم ایپیله قوللاروندان باغلانوبسان یاعلی
ائتدی بو امت سنه گوردوم جسارت یاعلی
ایلدی تزویریلن غصب خلافت یاعلی
.
.
اولما ناراحت رضایم سندن ای میر حنین
گئت ائوه بیدار اولار آغلار یقین ایندی حسین
مجتبا روح روانیمدور حسین نور دو عین
جان سنون جان زینبون باب کرامت یاعلی
قویما گیسون زینبیم رخت اسارت یاعلی
.
.
گلدی مولا منزله گوردی حسین ایلور فغان
زینبی آلموش قوجاقه آغلاشورلار بی امان
قالمادی مولاده گورجک بونلاری تاب و توان
کاشا ولیدون کربلاده سن او ساعت یاعلی
بس نجه ائتدون او گون سن تاب و طاقت یاعلی
.
.
کربلاده شمر اسیری اولدی اولاد نبی
آه او وقتدن گتدیلر چون قتلگهدن زینبی
باخدی بیر نعش حسینه عرض ائدوب بو مطلبی
ایله سن کوی نجفده خواب راحت یاعلی
قوی حسین ایچسون سوسوز جام شهادت یاعلی
.
.
یوز دوتوب زینب دئدی ای لبلری عطشان حسین
دور منه خوش گلدین ایله نعشیوه قربان حسین
زینبی دور سال یولا شامه گئدیر مهمان حسین
کاش اوگون شمره ائدیدون بیر اشارت یاعلی
یا ائدیدون زینبه اوندا حمایت یاعلی
.
.
#نادری یاز ای اولان حلّال کل مشکلات
ای وصی ختم پیغمبر ایا نیکو صفات
ایستروق بو جمعه آزادی ایچون سندن برات
گلمیشوق عرض ایلیاق باشون سلامت یاعلی
گئتدی دنیادن بو گون ختم رسالت یاعلی
.
.
.
#سبک_زینبم_جان_اوستیم
#سبک_یه_سوال_دارم
#سبک_اذن_ویر_یارب_گله و ….
.
.
#پیامبراسلام_شهادت
#وقت_اولوب_دنیادن_ایلوم_منده_رحلت_یاعلی
#نادری
#ترکی
.
✍️ #زبدةالاشعار ✍️
.
🆔: @nohe_torki
نظر دهید