حالات حضرت مسلم علیه السلام
.
✍️ زبدة الاشعار ✍️
?: @nohe_torki
.
مرحوم انور اردبیلی
.
چون نامه کوفهدن شه بطحایه یازدیلار
نور دو عین حضرت زهرایه یازدیلار
.
هر نامهده امام حسینون حضورینه
بیر سلسله مطالب بیپایه یازدیلار
.
گل کوفه اهلینی ایله ارشاد رهبر اول
چک بو جماعتی ره معنایه یازدیلار
.
عصرون امامی سن بیزه واجبدی طاعتون
فوراً یتر اوامرون اجرایه یازدیلار
.
خوشدور هوای کوفه گلستاندی چوللری
هر یر دونوبدی باغ مصفّایه یازدیلار
.
خوش منظریله باش باش ویرمشله نخللر
خوش طرزیله سالوبلا یره سایه یازدیلار
.
سایسیز بو شهریده آتوون پیروانی وار
حسرت قالوبلا مَقدم والایه یازدیلار
.
اهل عراقه لطف ایله قالما حجازیده
گل صاحب اول بو خطۀ زیبایه یازدیلار
.
.
یاره خیانت ایلدی اغیار مسلکان
چشم زمان قیامتهجک اولدی خونچکان
.
.
قیلدی حسین حضورینه احضار مسلمی
جریانیدن ایدوبدی خبردار مسلمی
.
لایق عم اوغلسون اوزینه نایب ایلدی
امر مهمّه بُلدی سزاوار مسلمی
.
برنامه یازدی کوفهده نامه یازانلارا
تعریف ایدوب او قومه وفادار مسلمی
.
خیر و صلاحوزه سببین یولادوم سیزه
ناظر ایدون اموره فداکار مسلمی
.
بیعت اونا کیم ایتسه منه بیعت ایلیوب
حرمت قیلون مباد ایدهسوز خوار مسلمی
.
توشیح ایدوبدی نامهنی ویردی سفرینه
برنامهسیندن ایلدی هشیار مسلمی
.
خلقه تواضع ایله عماوغلی فروتن اول
اوندان دعا ایدوب شه ابرار مسلمی
.
گیت منزله بویوردی خداحافظ ایله گیت
سالدی یولا خلاصه دل افکار مسلمی
.
.
یول باشلیوبدی مرکب رهوار کوفیه
اجلالیه یتشدی او سردار کوفیه
.
.
مسلم جمالینی ایلکه رویت ایتدیلر
پیشواز ایدوبله مقدمینی حرمت ایتدیلر
.
اکرام و یا نوازش و یا دست بوسیده
بیربیرلرینه کوفهلیلر سبقت ایتدیلر
.
اطرافدن اوجالدی گوگه مرحبا سسی
شهره ورود ایدنده اونا خدمت ایتدیلر
.
خوش گلموسن آقا گوزموز اوسته وار یرون
مهمان اولا او حضرته چوخ منّت ایتدیلر
.
اشراف کوفه پیر و جوان اولدولار مرید
بیعت الین ویروبله اونا بیعت ایتدیلر
.
صفلر چکلدی پشت سرینده نمازیده
فیض نمازینه چاتالار سرعت ایتدیلر
.
هر مجلس و هر انجمن و بزم انسیده
سوز سالدیلار وفا سوزینی صحبت ایتدیلر
.
گوندردیلر سران بنی هاشمه درود
آل امیّیه دل آچوب لعنت ایتدیلر
.
.
دم ورودیلار مجاهدت و ترک جانیدن
نامردیلر چخانمدیلر امتحانیدن
.
.
تأمین ایدوبله ابنزیادین مرامینی
واجب بیلوبله اوزلرینه احترامینی
.
مطلق وجود مسلمی نادیده دوتدولار
هیچ کیمسه آلمادی او غریبون سلامینی
.
هیچ شهرون اهلی کوفهلی تک روزگاریده
خوار ایتمیوب او نوعیله نایب امامینی
.
گیتدی نمازه مسجده باشدا اوتوز نفر
ختمه یتورممشدی سجود و قیامین
.
بیربیر اوتوز نفرده ایدوب قصد انفراد
بر هم ایدوب پوزوبلا نمازون نظامینی
.
مسلم دونوب باخوب دالا بیر کیمسه گورمدی
ترک ایتدی اشگی گوزده عبادت مقامینی
.
حسرتله باخدی مرکبینه اولمادی سوار
آزاد ایدوبدی اوستونه آتدی لجامینی
.
یوخدور یریم دیدی سنی من هاردا ساخلارام
گیت بلکه روزون اولا بیر کیمسه ضامنی
.
.
محصور ایدوب بلا منی بیر یانه گیتمیوم
آواریم اوزوم سنی آواره ایتمیوم
.
.
یول باغلیوب پیاده اورک انقلابیله
پیچ و خم بلایه دوشوب پیچ و تابیله
.
شهرون غریبی، منزلی یوخ ، میزبانی یوخ
مقصد یوخیدی مقصده گیتسون شتابیله
.
حیران گزوردی کوچهلرون عرض و طولینی
همگامیدی شهادت او عالی جنابیله
.
بیر کوچیه دوشوب گذری چوخ طویلدی
طیّ ایلدی او کوچهنی رنج و عذابیله
.
بن بستیدی یولی یوخیدی قالدی چارهسیز
دیواره تکیه قیلدی دیدی اضطرابیله
.
یارب یوخومدی مسکنیم آخر گیدوم هارا
طرد ایتدی کوفه اهلی من چون عتابیله
.
مأمورلر گزور اوتوروم کوچهده نجه
صبح ایلیوم بو غملی شبی اشک نابیله
.
یوخدور بو شهر ایچره قوناق ساخلیان منی
نسبت مگر یوخومدی منیم بوترابیله
.
.
باغلاندی ایولرون قاپوسی ایش قالوب سنه
رحمت قاپونکه باغلی دگل چاره قیل منه
.
.
طوعه چخوبدی مسلمی ایتدی مشاهده
حیّ ودود شاهدی چاتدوردی شاهده
.
کیمسن دیدی قاپومدا دوروبسان نه علته
گتمورسن اوز مقاموه لیل سیاهده
.
فرمایش ایتدی گئت منه بیر کاسه سو گتور
سیراب ایله اَوَل منی بو ایستگاهده
.
طوعه سو گتدی مسلم ایچوب دوردی گتمدی
بیر آه چکدی قلبی یانوب سوز آهده
.
ایچدون سو ایندیکه دیدی بس گتموسن نیه؟
قویدی منی سنون عملون اشتباهده
.
قیلدی بیان هایانه گیدوم یوخدی منزلیم
گور منزلی اولان دایانار بین راهده؟
.
امکانون اولسا گور منه ویر بو گیجه پناه
الله سنی جزا گونی ساخلار پناهده
.
وار نسبتیم حسینه عقیل اوغلی مسلمم
بلمم نه گوردی کوفهلی من بیگناهده
.
.
طوعه ایشتدی مسلم آدین دلده اشتیاق
عرض ایلدی کنیزوه اول بو گیجه قوناق
.
.
مسلم صباح ایدوب گیجهنی سوز و سازیله
گرم اولدی رو به قبلهده راز و نیازیله
.
یاتماز بو رسمیدور گیجه شب زندهدارلر
تهذیب روح ایدر بلی روح نمازیله
.
گه سجده ایتدی ساحت معبودینه گهی
قرآن تلاوت ایلدی لحن حجازیله
.
لیل فراقه عزّتیله ووردی پشت پا
صبح وصالی درک ایلدی امتیازیله
.
ناگه سوارهلر ایلیوب منزلین حصار
دوردی مقابل اولدی حقیقت مجازیله
.
شمشیرینه نجات ویروبدور غلافدن
گتدی بلا سراغنه آغوش بازیله
.
قرخ بش نفر یازولّا بفوری ایدوب هلاک
زاغ و زغن رقیب دگل شاهبازیله
.
افسوس اولا کمکسیزیدی شهر کوفهده
ناپاکلر حریفدی اول پاکبازیله
.
.
ظلمون دوشوبله باملر اوسته تلاشینه
بیعت ایدنلرون چوخی اود توکدی باشینه
.
.
روبه صفتلر آلدی او شیرون کنارینی
تنگ ایتدیلر او بیکسه غربت دیارینی
.
چوخ یاره دگدی فانی آخوب گتدی طاقتی
آرتوردی کوفیان ولی ظلم و فشارینی
.
شمشیری اندیروب یوزینه بیر نفر شقی
سالدی یره دیشیله لب درّ بارینی
.
قان داشلانوبدی آغزی دولوب لخته قانیله
الدن او یاره آلدی اونون اختیارینی
.
دیواره تکیه قیلیدی بیر آز بلکه دینجله
آرام اولوب ویره نفس مرگبارینی
.
نامردلر شماتت ایدوب طعنه وردیلار
مسلم ولیک ویرمدی الدن وقارینی
.
سعی ایتدیلر دوتولمادی حیلیله دوتدولار
چرخون گلون مذمّت ایدک کجمدارینی
.
شمشیرین الدن آلدیلا دستبند وردیلار
صیادلر کمنده سالوبدور شکارینی
.
.
ابنزیاد بزمینه قول باغلی گتدیلر
باش آچوق اسیری اورک داغلی گتدیلر
.
.
مملوّدی او بزم ستم ازدحامیدن
نخوت یاغوردی مجلسه قوم لئامیدن
.
ابنزیاده باخدی ولی ویرمدی سلام
عالِم اولان بصیر اولور علم کلامیدن
.
وارستهلر تملّقی بُلمز زمانهده
آزادهلر محالیدی دونسون مرامیدن
.
باخدی او بزمه قانلو گوزی دوشدی کوزیه
گلدی دله سو ایستدی قوم ظلامیدن
.
بیر کاسه سو گتوردیلر اما ایچنمدی
قان کاسیه توکولدی لب لعل فامیدن
.
دنیا سوئی بویوردی داخی قسمتیم دگل
کسدی سو التفاتنی بو تشنه کامیدن
.
سعد اوغلونا وصیّتنی ایتدی بیر به بیر
جلاد اونی کناره چکوب بزم عامیدن
.
مجلسده کسمدی اوجا یرده کسوب باشین
آتدی یزه جنازهسینی پشت بامیدن
.
.
باشسیز بدنکه دوشدی اوجا بامیدن یولا
طوعه گلوب سراغینه زلفین یولا یولا
.
.
صیحه وروب سمایه اوجاتدی نواسینی
مهماننون اقامه ایدوبدور عزاسینی
.
آغلار گوزیله قیلدی نظاره قوناقنه
بیر پارچا قان گوروبدی بدنده لباسینی
.
سسلندی من خجالت اولان میزبانوم
گلدوم که طوعهنون گوره مردم وفاسینی
.
سن بیر گیجه ایویمده قوناق اولدون ای غریب
سالدی زمانه باشیمه خجلت قراسینی
.
صبحه کیمی نماز قیلوب ایلدون دعا
قویدون نشان ایویمده عبادت صفاسینی
.
جرمون نهایدی کوفهلیلر کسدی باشوی
ناحقّه ساتدی سن کیمی حق آشناسینی
.
دست جنایت ایتدی منی تیره روزگار
پنهان اولام گورنده گرک آل یاسینی
گر قویسالار جنازوی کفن ایلرم سنون
دفن ایلیوب گتورم اله حق رضاسینی
.
قورخوم بودور قناریه ورسونلا نعشوی
حدّدن گچورتسون اهل جفالر جفاسینی
.
فرصت او قدر تاپمادی «انور» زمانهده
یازدی بو سوزناک سوزی چایخانهده
.
#مسلمیه
#چون_نامه_کوفه_دن_شه_بطحایه_یازدیلار
#انور_اردبیلی
#مردان_جاوید_انور
#ترکی
.
✍️ #زبدةالاشعار ✍️
?: @nohe_torki
دستتان درد نکنه
دنبال این شعر بودم خیلی وقته !
کتاب مردان جاوید بود که نمیتونستم پیدا کنم
از شاهکارای استاد انوره
سلام و درود سرور گرامی ، برادر بزرگوار ممنون از حضورتان التماس دعا