پندیات
شهادت علی اکبر(ع)
.
#زبدةالاشعار
.
: @nohe_torki
.
سیفی اردبیلی
.
گتمه ای نفس هوا تیره و شیطانی یولا
جهد ائله ال تاپاسان روشن و رحمانی یولا
.
دهر فانیدن هامی بار سفر باغلیاجاق
آیق اول توشۀ عمر ایلمه خُسرانی یولا
.
اوچوق ایوانلارا باخ عبرتون آئینه سی تک
فکر آسایش جان ایله بو طولانی یولا
.
میهماندور بشر اون گون بو بلا دارینده
بیر گون ایودن سالار ایو صاحبی مهمانی یولا
.
بدرقه ایلیه نون قابض الارواح اولاجاق
گور سالوبدور نچه مین نوح و سلیمانی یولا
.
بؤکمگ اولماز کفنه ثروتیوی دولتووی
آغ کفندن صورا یوخ توشه نون امکانی یولا
.
آخرت جاده سینون قورخولی پیچ و خمی وار
بیر چراغ الده گوتور باری بو ظلمانی یولا
.
خیر عمل لردی گلوم روشن ایدن قبر ایوینی
شرّیلن سالما خطر سایه سی نورانی یولا
.
یدّی داش کعبه ده شیطانه آتان حاجی گرک
غیبته آچمیا دل سالمیا بهتانی یولا
.
زهد کاذبدن ال ئوز عشق حقیقت یولی تاپ
قوی قدم همّتیله بوذر و سلمانی یولا
.
نه تبرزین و نه کشکولیده دور درویشی
بلکه درویش اودی صادق گله یزدانی یولا
.
معرفت اولماسا دؤگسونده آچلماز در عشق
ریب ایلن راهی اولانماز بیری ربّانی یولا
.
حبّ دنیانی گرک باشدان آتا طالب حق
بی ریاضت یتیشوب کیم مگر عرفانی یولا
.
اوددا یاندیرماسا پروانه شهامتله پرین
دؤزه بیلمز بو قدر شمع شبستانی یولا
.
چالش انسانلیقا قالسون ملک اعزازیوه مات
حوریلر گور نه ایدور غبطه بو انسانی یولا
.
یوسف اول چاه فلکدن فقط اللهی چاغیر
گور نه اندازه توکور نعمت الوانی یولا
.
خبره لازمدی که بازاره چکه کالانی
یوخسا نااهلی آتار گوهر اعلانی یولا
.
گل گیدک ایندی او بازاره که مین یوسف مصر
چشم حسرتله باخور اوردا که رضوانی یولا
.
مرغ روحه طیران فرصتی ویر دل گوزین آچ
باخ حسین ابن علی گیتدیگی روحانی یولا
.
ایستدی قانی آخان یردن آچا جنّته یول
دوزدی یتمیش ایکی سرمست مریدانی یولا
.
دیدی بو مزرعۀ عشقی گرک قان سووارا
دوشسون هر کیمسه ده وار قدرت ایمانی یولا
.
هامی لبّیک دیوب ایستدیلر اذن جهاد
سر و جان بذل ایده لر تا که او رحمانی یولا
.
نوح عشقم دیدی من نوح ئوزی اوّلده گرک
پای همّت قویا پر وحشت و طوفانی یولا
.
گیینون سیز کفن عشقوزی آماده اولون
نوبتوزده توکه سوز نقد سر و جانی یولا
.
مسلخ عشقیده خوشدور من اولام پیشقدم
سالام ئوز جدّیمه بنذر گوزل اوغلانی یولا
.
صبر ایدون خیمه دن الآن بزنوب چخسون على
احترامیله سالاق اَشبَهِ طاهانی یولا
.
مرشد عشق نه تدبیر ایلیوب قیلدی عمل
اکبرین راهی ایدوب ئولمه لی بحرانی یولا
.
رسمیدور گیتسه مسافر سپیلر سو یولینا
اولار آیدنلیق او سو غصّه لی هجرانی یولا
.
اولمادی خیمه ده سو سپدیله ناچار اوگون
اشک طفلانیله خون دل لیلانى یولا
.
اکبر آتدیقجا قدم دوردی تماشایه حسین
سالمیوب من کیمی هیچ کیم دیدی قربانی یولا
.
شاهد اولسون دیدی حق عزّت اسلامه گوره
سالمیشام میوۀ عمروم گل زهرانی یولا
.
گیت اوغول سن بلش ئوز قانووه من فخر ایلیم
اهتزازیله ووروم پرچم قرانی یولا
.
قوجا وقتیمده على گرچه عصاسیز قالورام
دلخوشام هر نه واریم بذل اولا منّانی یولا
.
گوز یوموب سندن اوغول آختارورام سلم نگار
طایر روحیم آچوب چشم تماشانی یولا
.
تیر مژگانووی وور بدنظرون سینه سینه
ویر جمالوندن على نور تولّانی یولا
.
پردۂ ظلمته ویر آی کیمی سیرونده شکاف
دیه لر جلوۂ حق سالدی تجلانی یولا
.
باخما لیلا گوزینون یاشینه تکبیروی دی
قوّت جان و دل ائت کلمۀ اعلانی یولا
.
وقت او وقت اولدی علینون سسی اخیامه گلوب
میندیروب مرکبینه سالدیلا مولانی یولا
.
باغبان قانلی گلستانه یتوردی ئوزینی
گوردی صدپاره توکوبلر گل ریحانی یولا
.
باخدی قانه بلشن گوزلره سسلندی على
آهیمون اود جالیوب شعلۀ سوزانی یولا
.
چشم صرّافیده تشبیهی بودور پیکروین
داغیدوبلار دیه سن شدّۀ مرجانی یولا
.
گوزون آچ باخ الى قلبینده قوجالمیش آتووا
گورنه خون دل الور دیدۂ گریانی یولا
.
اوره گیم یانماسون آیا نجه بو حالتووه
هانسی صیّاد یخوب سن کیمی جیرانی یولا
.
باشوون یاره سی شقّ القمری یاده سالور
گورمه مشدیم دوشه آی پارچاسی طوفانی یولا
.
.
.
.
#اکبریه_سیفی_اردبیلی
#اکبریه_شهادت
#گتمه_ای_نفس_هوا_تیره_و_شیطانی_یولا
#ترکی
.
#زبدةالاشعار
.
: @nohe_torki
نظر دهید