استیذان حضرت قاسم (ع )
..
..
مرحوم سعید شبیری
..
..
ای عمو مین شوقیله گلدیم حضوره جان الیمده
گورنجه واردور آتامدان قتلیمه فرمان الیمده
..
..
ای ویرن عیسایه دم وی برگزیده بی نیازه
مرغ روحه تنگ اولان بیرجسمه گل ویر روح تازه
اذن میدان ویر گیدوم آلدیم آنامداندا اجازه
هم آتامدان هم آنامدان وار عمو فرمان الیمده
..
..
قلبیمی دوتموشدی غم ای درد و محنت آشناسی
فکر ایدردیم دردیمون یوخدور بو عالمده دواسی
یادیمه دوشدی آتام هم دستخط پُر بهاسی
دردمندم گلموشم واردور ولی درمان الیمده
..
..
غرق دریای ملالم سنده دور راه نجاتیم
روحیمی چوخ ایلیوب آزرده بو بار حیاتیم
بیله بیر گونده مقدّمدور حیاتیمدن مماتیم
واردی بو امره کلام اللهدن برهان الیمده
..
..
گرچه سنّیم آزدی لطفونده ولیکن چوخ گوزوم وار
سن بولورسن قلبده بو گلماقیمدا نه سوزوم وار
نچه گوندور آغلاماقدان نه گجه م نه گوندوزوم وا
سنده رد ایتسن قالار دنیا بویی حرمان الیمده
..
..
من سنه بوچولده گر چه یادگار مجتبایم
سن ولی اولا بنفسیم سن ، سنه من خاکپایم
رزمگهده قطعه قطعه دوغرانام دلدن رضایم
دین قبالینده بو جاندور تحفۀ ارزان الیمده
..
..
مکتب عشقونده آگهسَن اؤزون درسیم رواندور
ثبت نام ایتماقلیقا گلدیم که وقت امتحاندور
صفحۀ سینه مدی کاغذ خامه سی تیر و سناندور
یازماقا حق کلمه سین آماده قیللام جان الیمده
..
..
تنگ اولوب سینه م عمو گویا منه دنیا قفسدور
قالماقا عالمده بیر آن قلبده حاشا هوسدور
باشیمه چکسن الون بو آخر عمریمده بسدور
بیر نگاهوندور ایدن هر مشکلی آسان الیمده
..
..
اکبرون قانه بویاندی باغریمی غم تیری دلدی
خیمیه نعشی گلنده آل طاها درده گلدی
منده اکبر تک اگر قانه بویانسام چوخ گوزلدی
خوشدی اولسون قتل اکبر قتلیمه میزان الیمده
..
..
من عمو هرگز دیمم شهزاده ام وار امتیازیم
بو قدر واردى یتیمم لطفوه واردور نیازیم
اذن ویر بلکه آزالسون دلده کی سوز و گدازیم
اولما راضی تنگه گلسون بو دل ویران الیمده
..
..
ای سالان مهر و وفاسی عالم امکانه سایه
ئولمه موش لطف ایت «شبیری» بیرده گلسون کربلایه
شوقیله قویسون یوزون بو جمعیله پائین پایه
سویله سون واردور کلید روضۀ رضوان الیمده
..
..
..
#قاسمیه #شبیری #ترکی #زبدةالاشعار #قاسمیه_شهادت
نظر دهید