زبان حال امام(ع) بر سر بالین حضرت باب الحوائج(ع)
..
..
مرحوم مولانا یتیم
..
..
گلدیم یتیشم فریادوه من
دور ای سنه من قربان یارالی
سقّاسن اوزون امّا ویرورسن
جانانوه جان عطشان یارالی
..
..
تذهیب اولونان قرآن کیمی وار
جسمون گورورم قاندان شفقی
از بسکه یازوب شمشیر جفا
صد پاره دوشوب هر بیر ورقی
جسمون ایله بیر ترکیب تاپوپ
گویا داغیلوب بیر گل طبقی
یا اینکه دوشوب بیر سرو روان
خاکیله اولوب یکسان یارالی
..
..
عشقونده وفا اثباتنه سن
هر رنج و غمی تصویب ایلدون
بو نیّتله دامان دلی
هر خاطره دن تهذیب ایلدون
جان تشنه جگر بذل ایلماقا
اوز نفسوی چوخ ترغیب ایلدون
خوش طرزله تا پایانه یته
اوّلده اولان پیمان یارالی
..
..
قانون دوزولوب بو عارضوه
شبنم دیه سن گلبرگ تره
یا انجمله پیرایه ویروب
مشاطۀ غم قرص قمره
هریاره ایدور جسمونده عیان
مین باب محن اهل نظره
حسرتله سنون جان ویرماقوی
دنیایه ویرور اعلان یارالی
..
..
گوردوقجا سنی بو حالده من
صبریم کسیلوب چارم آزالوب
حیرانم اوزوم هم آی دوتولوب
هم سیرینه گون آواره قالوب
آچ گوزلروی باخ گور نجه بیر
گل پیکروه گون سایه سالوب
قانیله دولان حسرت گوزوه
عالملر اولا قربان یارالی
..
..
جان ویردون اوزون جانانه منیم
جان ویرماقما تعجیل ایلدون
سینمده اولان مجمل غمه سن
تشریح ویروب تفصیل ایلدون
بیر نوع ولی اسلامه بوگون
اوز خدمتوی تکمیل ایلدون
حاشا که تاپا سندن صورا بو
شرع نبوی نقصان یارالی
..
..
پیمانۀ غم ایچدیردی سنه
انجام سر پیمان ازل
عزمونده ولی اوخ نیزه قلج
ائیموبدی عیان بیر ذرّه خلل
الدن ال اوزوب ترک سر ایدوب
تحکیم اولا تا بنیان امل
شوقاً ایلدون بیر جفت الله
جان پیشکش جانان یارالی
..
..
قتلونله سنون هر چند منه
چوخ تنگدی بو وسعتله فضا
منده گلرم آردونجا سنون
مختوم اولا تا فرمان قضا
دور خیمه لره قیل بیرده گذر
گور زینب اولار بو حاله رضا
سینَنده آچوب سنبل کیمی پر
هر زهرلی بیر پیکان یارالی
..
..
صبر ایلماقی هر نوع غمه
امیال دله زنجیر ایلدون
تدبیر خرد نه حاله دوشوب
سر در قدم تقدیر ایلدون
غم مصحفنون آیاتنی تا
عاشقلر ایچون تفسیر ایلدون
تفسیرینه بو آياتین اولوب
آنونداکی اوخ عنوان یارالی
..
..
مرسومدی گون ایستر که اوزه
مغربده سالا نیلینه خِمار
نوری آزالوب رنگی سارالار
انوار شفق اطرافین آلار
بوصون نفسی گون تک گورورم
یراوزره سنی بی تاب و قرار
رنگون سارالوب قانیله ولی
رخسارون اولوب الوان یارالی
..
..
بیر عمر «یتیم» ایلوبدی شها
مشعوف اورگین بو نیّتله
آخر نفسی جویا اولاسان
حال دلنه چوخ رأفتله
لبریز ایلیوب گوز کاسه سینی
خونابۀ غم بو حسرتله
به به نه گوزل مقصوده چاتار
گر ایلیسن احسان یارالی
..
..
..
نظر دهید