زبانحال حضرت مسلم ابن عقیل(ع)در کوفه
.
.
.
بهزاد قاسمی اردبیلی
.
گلمه عم اوغلی کوفیه طوفاندی کوفه ده
یاران عشق بی سر و ساماندی کوفه ده
قائم مقاموین ئورگی قاندی کوفه ده
دریای معرفت بورونوب سیل ماتمه
شمشیر و تیغ و نیزه ویرور بوسه سینمه
.
شدّاد غم یوروبدی شرافتلی شیروی
محتاج ائدوب ستاره یه ماهِ منیروی
دیلدن سالوبدی کوفه نون اهلی سفیروی
تک قالمیشام بو شهریده ای شهریار دَهر
بیلمزدیم هئچ بو قدری وفاسیز اولار بو شهر
.
باران غم آخور یره نم نم بو شهریده
پرچم ویروبدی دولت ماتم بو شهریده
سرنیزه لر اولوب منه همدم بو شهریده
تیترور دیلیم دوداقیم عطشدن بلالیام
دیواره تکیه ایلمیشم من ، یارالیام
.
پرسیز قالوب همای بلند آشیان عشق
باشدان ایاقه قانه باتوب قهرمان عشق
دارالاماره ده سورونور میهمان عشق
پور عقیل کامه چاتوبدور خلیل وار
پرواز عشقه حاضر اولوب جبرئیل وار
.
تیغیم دوشوبدی حیف کَسردن،آدامسیزام
اشکیم آخور بو دیده ی تَردن، آدامسیزام
قلبیم سینوبدی کوفه لیلردن، آدامسیزام
جام بلور عاطفه دولماز بو شهریده
دفن ایلین جنازه می اولماز بو شهریده
.
گلمه عم اوغلی غم بورئیوب عشق داغ داشین
یوخدور سیلن بو شهریده گوزدن بلا یاشین
گوزلور قَناره سیفِ بنی هاشمین باشین
قانیم آخار جمالیمه خون ذبیح تک
داره چَکلّه مسلمی بوردا مسیح تک
.
من حقلیم کی بلبل اولام غملی گلشنه
من حقلیم ستاره سَپم قانلی دامنه
یاخچی سفیر اولانمادیم ای شاه من سنه
شرمندیم، یوزوم قره دی گلمیشم دیله
عفو ائت، منی رقییه خاطر حلال ائله
.
الدن گئدوبدی تاب و توانیم یورولموشام
مرجان کیمین آخور یره قانیم یورولموشام
ای کاش عم اوغلی تئز چیخا جانیم یورولموشام
گلزار سبز عاطفه ده گل اکنمورم
سینم دوشوب فشاره نفس دای چکنمورم
.
تیر بلانی وئردی فلک دست دشمنه
یانّام کی یوخ بو شهریده حرمت ائدن سنه
نامه یازانلار ایندی دوروب داش ویرور منه
سنده بو شهره گلسون آخار بوردا گوزیاشون
من تک عم اوغلی مطمئن اول داشلانار باشون
.
یوخدور بولاردا ذرّه اثر عدل و دادیدن
چکمزلر اَل جهاندا عناد و فسادیدن
خوف ایلمزله قاضی روز معادیدن
اولسا مجال یرده سویاللار جنازوی
آتلار ایاقی آلتدا قویاللار جنازوی
.
الفت تاپوبدی خون و رگیم غم شرابینه
قلبیم اسر باخاندا عزا آفتابینه
یاز«قاسمی» بو بیتی محبّت کتابینه
وقف ائتمیشم حسین آقاما ملک و مالیمی
زهرا کنیزی ایله میشم ئوز «زُلالیمی»(۱)
ـــــــــــــ
(۱)زلال:دختر نازنینم، بزرگترین نعمتی که باعنایت اهلبیت(ع)خداوند منّان به بنده عطا کرده است و شکرگزار این نعمتم.(نقل از قاسمی اردبیلی)
.
#مسلمیه
#گلمه_عم_اوغلی_کوفیه_طوفاندی_کوفه_ده
#بهزاد_قاسمی
#ترکی
#زبدةالاشعار
نظر دهید