گلمیشم قصۀ ایامی دیم #اربعین_علومی_تبریزی

اربعین

.
.
.
علومی تبریزی
.
گلمیشم قصۀ ایامی دیم
کوفه دن صحبت ایدم شامی دیم
.
دور تماشا ایله زواریوه باخ
قبرون اوستونده عزاداریوه باخ
.
گرچه شایسته دی سن ناز ایدسن
یریدی قزلاری پیشواز ایدسن
.
چوخ یتوب غصه اوغلسوزلاریوا
حرمت ایله یورولان قزلاریوا
.
سوله عباسه آلا پرچم اله
گلوری باجیسی پیشوازه گله
.
آهوان حرم پیغمبر
قبرون اوستون ایلوبلر محشر
.
لیلی بو دشته سالوب هنگامه
قبرون اوستونده قوروب برنامه
.
گتوروب اکبرینون جامه سینی
آپارور یثربه عمامه سنی
.
باخورام شوره گلن کلثومه
هم صدادی او من مظلومه
.
الده بیر قانلو علم دلده نوا
آختارور قبر ابوالفضلی تاپا
.
بو گوزی یاشلو سریه بو رباب
سوزلری دلدن آلور طاقت و تاب
.
او علی اصغره لایلای دیوری
بودا هی قاسمیم ایوای دیوری
.
گورنه احواله قالوب زین العبا
گورنه شوریله قوروب بزم عزا
.
بیر سنق نی دی نوا آختاروری
خسته دی خاک شفا آختاروری
.
بیر قزین شامده گون تک باتدی
نه منی دشمنیده آغلاتدی
.
عندلیب اولدی چمن سیز گتدی
قبره آخرده کفنسیز گتدی
.
واریدی بیر نچه یار یولداشی
دیرم ویرسه امان گوزیاشی
.
گلدیلر ایتدیلر افغان بالاما
دوتدولار شام غریبان بالاما
.
شامده باشه یتوب محنت و غم
قید غمدن اولوب آزاد حرم
.
گورورم ایستر هامو زارون اولا
اربعینوندی عزادارون اولا
.
همدل و همدم و هم دوش اولدوم
خسته زوّاریوه چاووش اولدوم
.
( آتش هجره آلشدیم گلدیم
منده بو جمعه قارشدیم گلدیم)
.
گر چه وار دلده سوزوم طول دراز
بعضی سوز عرض اولا لازمدی بیر آز
.
چون اوزی حجت حق حاضریدی
نیزه ده قانلو باشین ناظریدی
.
سنی تا ایتدی شهید اهل جفا
غارت ایتدی حرمی شمر دغا
.
بیزه بیلدون نلر اولدی یارالی
غم اودی شعله ور اولدی یارالی
.
کاش بیر فرصت اولیدی یارالی
مجلسیم خلوت اولیدی یارالی
.
گوسترردیم دل بی کینه سنه
بیر گوریدون نه بلایتدی منه
.
یارالی قلبلری داغلادیلار
باجوین قولارینی باغلادیلار
.
بو سنان قلبمی قان ایلدیلر
بیزی شاماته روان ایلدیلر
.
ائتمدی کیمسه حمایت باجوا
کوفه ده اولدی شمادت باجوا
.
باشوا ویردیله بیر داش یاراسی
سالدی دلدن منی قارداش یاراسی
.
دیمه ایتدی سنی دشمن یارالی
منه باخ سن یارالی من یارالی
.
.
.
.
#اربعین #علومی_تبریزی
#گلمیشم_قصه_ایامی_دیم
#ترکی
#زبدةالاشعار