کوفه
.
✍️ زبدة الاشعار ✍️
?: @nohe_torki
.
ابوالفضل عباسی معروفان
.
گلون ای اهل ولا زینبی کامل تانیاق
عصمت و معرفت و عفته عامل تانیاق
یار وارسته حق دشمن باطل تانیاق
پرچم سرخ حسینیته حامل تانیاق
باب حیثیتینه شاهلاری سائل تانیاق
گر چه عاجزدی بشر فوق بشردن دانیشا
گینه مایلدی ئورک زیب پدردن دانیشا
.
.
تانیساق زینبی کامل بیلروق عشق ندی
بیلروق عشق خدا امری نه بیر حادثه دی
بیلروق زینبی حیدر نیه تجلیل ائله دی
دخت والای ولی احمده زیبا نوه دی
بودی گلزار ولایت گولونون سرسبدی
پنج تن حلقه ووروب کعبه حیثیتینه
اوخشیور غیرتی واللهی علی غیرتینه
.
.
جامه زهد و لیاقت یاراشور قامتینه
قهرمانلار هله ده مات قالیب غیرتینه
یغشوب حور و ملک قلعه امنیتینه
اجنبی لر دولاشانماز اونون حیثیتینه
ئوزی عارفدی حسین زینب حسینیتینه
اللرین کسدی عدو خنجری ایوای دئمدی
یئدی خون جگر عالمده تصدق یئمدی
.
.
زینب اندیشه سی حق صوتینی داغ داشه سالیب
حیدری خطبه لری ولوله اوباشه سالیب
لرزه اندام و دل فرقه کلاشه سالیب
یدی قارداش باجیسی یدی قرا باشه سالیب
نه وقاریندن آزالدیب نه ده خم قاشه سالیب
دئدی قارداشلاریمون قانی بیلون باتمیاجاق
یاتاجاق فتنه ابالفضل علمی یاتمیاجاق
.
.
بیر خانمدور بو خانم مدرسه عفت آچوب
اوجادیب حق علمون پرچم حریت آچوب
کفری گردابه چکوب مهلکه ذلت آچوب
نه یزید و نه عمرسعده ید بیعت آچوب
شام محنتده حسینون آدینا هیئت آچوب
اولماسیدی بو خانم بیر بئله هیئت یوخودی
شیعه قلبینده بو اندازه محبت یوخودی
.
.
فاطمه دوتدی یامان گونده علینون الینی
ساخلادی کهف اماندا هم علی هم ائلینی
قویمادی غم بوجاقیندا سؤنه حق مشعلینی
آچدی مولا قولونی باغلادی اعدا دیلینی
سئندریب زینب کبراده یزیدون بئلینی
آری زهرا بالاسی مونس ذکر شب اولار
شیره عصمت ایچن قیز دولانیب زینب اولار
.
.
ایستوسن غیرتی معنا ائده سن زینبه باخ
ایستوسن قطره نی دریا ائده سن زینبه باخ
ایستوسن روحوی احیا ائده سن زینبه باخ
سینوی سینه سینا ائده سن زینبه باخ
ئوزوی نوکر مولا ائده سن زینبه باخ
کیم علی نوکریدور زینبه ده نوکر اولار
دیلی زینب کیمی دشمن یوزونه خنجر اولار
.
.
لطف ائدیب معرفتی زینبه خلاق جلیل
شان و اجلالی گؤزل جلوه محزونی جمیل
زینبین عشقی اولوب جمله عشاقه عشاقه دلیل
الی الدن اوزولن درگه زینبده دخیل
نطق زینبدی ائدن دشمنی واللهی ذلیل
بو همان کسدی گئدیب کوفه ده طوفان ائلدی
آل سوفیانی اوگون خانه سی ویران ائلدی
.
.
چون زیاد اوغلی صدور ایلدی فرمان طرب
اولدی آماده همان امریله مستان عرب
کوفیان مست غرور و اسرا حالی تعب
اهل کین تهمت و فحاشیه آچمیشدیلا لب
روز روشن اسرایه دولانیب اولدی چو شب
طاقت زینبی دیل یاره لری ایلدی طاق
میزبان ائتدی جفا گلدی دیله خسته قوناق
.
.
مطلبی که یازیرام معتبر اولموش سندی
راویلر هیچ بیری بو مطلبین عکسین دئمدی
بو سؤزه راوی بشیر ابن خزیم اسدی
او گونی خطبه زینب منی مدهوش ائلدی
ائله بیر خطبه کی دشمن باشینا کول الدی
گؤرمه میشدیم بئله بیر جمعده بیر زن دانیشا
دورا دشمن قاباقیندا سؤزی روشن دانیشا
.
.
باشلادی سؤزلرینی قوم ستم پروریلن
لحن گفتاری اونون فرق ائلمور حیدریلن
گوئیا جنگه گلوب شیر خدا خنجریلن
مردمه ائتدی اشاره یارالی اللریلن
اسکتوا ! ساکت اولون تا دانیشوم سیزلریلن
حق بیزیمدور سیزی باطل بئله بازاره چکوب
ئولدوروب حقی زیاد اوغلی سر داره چکوب
.
.
کوفیان ! حیله و نیرنگیله عمروز دولانور
نور ایمان چکیلوب قلبوز عداوتله یانور
مرد و زن پیر و جوان بیزلری چوخ یاخشی تانور
گر مسلماندی زیاد اوغلی خدادن اوتانور
نیه بس آل علی کوفه ده ویلان دولانور؟
حاکم کوفه یالاندی ٬ سؤزی اعمالی یالان
قارداشیم آدی قالاندی اونون اجلالی یالان
.
.
یارسالار سینوزی قلبوزده عداوت کؤزی وار
لبلروزدن اوخونور ظلم و خیانت سؤزی وار
صورتوزده گئنه ده مکر و سیاست توزی وار
سیزده ابلیس گوزی بیزده ده الله گؤزی وار
لااقل حق دانیشون نیزه ده قرآن ئوزی وار
کربلا واقعه سین صدقیله تفسیر ایلیون
کیم چخوب خط نبی دن اونی تحقیر ایلیون
.
.
قوناقا طعنه ووروب یار اولوسوز باش کسنه
آغلیسوز بعضیلروز علتی روشندی منه
نقدر آغلیاسوز سیزلره یوخدور حسنه
مثلوز بنذور او رشته توخیان پیرزنه
که ائدور رشته سینی پنبیه تبدیل گئنه
سیز منیم قارداشیمی کوفیه دعوت ائلدوز
عار اولا شهروزه مهمانه نه حرمت ائلدوز!؟
.
.
عار اولا مکریله امضا اولونان دعوتوزه
عار اولا شیشه کیمین ساده سئنان بیعتوزه
عار اولا دلده که آلوده اولان نیتوزه
عار اولا همتوزه شوکتوزه غیرتوزه
آغلیوب آز گوله سیز عار اولا حیثیتوزه
خون ثاراللهی ناحق یئره توکدوز یئره سیز
چتین ئوز ایشلریزون حقه جوابین وئره سیز
.
.
بیز مگر عترت پیغمبر خاتم دییروخ؟
بیز مگر شعشعه نور دو عالم دییروخ؟
بیز مگر حور و ملایکلره همدم دییروخ؟
بیز مگر کان کرم سرور حاتم دییروخ؟
بیز مگر آب حیا مالک زمزم دییروخ؟
نیه بس آخدی فراتین سویی بیهوده چؤله؟
باعثی سیزلریدوز اصغر ششماهه ئوله
.
.
زینبم هیچ بیریزه ذره جفا ائتمه میشم
تنگنالرده سیزی تکجه رها ائتمه میشم
من مگر سیزلره تدریس حیا ائتمه میشم؟
سیزی من هانسی نمازیمده دعا ائتمه میشم؟
هانسیزون دردی اولان وقتده دوا ائتمه میشم؟
ساخلیون حرمتیمی عترت خیرالبشرم
یدی قارداشی ئولن زینب خونین جگرم
.
.
اوتانون گؤزده حسین عترتینون گؤزیاشی وار
قوناقون حرمتینی ساخلیانون پاداشی وار
الده عورتلریزون یا کولی وار یا داشی وار
ناقه لرده اسرا نیزه ده سلطان باشی وار
زینبون نیزه باشیندا یارالی قارداشی وار
قورتاریب جنگ و جدل تازه جفا باشلامیون
لا اقل گؤز قاباقیندا او باشی داشلامیون
.
.
او باشین یاخجی بیلون رتبه شاهانه سی وار
ئوزی چؤللرده ٬ ئورکلرده ولی خانه سی وار
ناقه لرده نقدر واله و دیوانه سی وار
شمع عالمدی او باش مین بئله پروانه سی وار
وورمیون قافله ده دختر دردانه سی وار
گؤزیاشی کرب و بلادن بورا یولداشدی اونا
مرهم و چاره فقط نیزه ده کی باشدی اونا
.
.
اوندا که جمع ائدر الله عجمی هم عربی
یوخ جوابیز بیلورم گر سوروشا ختم نبی
بیر بئله جور و جفانین ندور آیا سببی؟
بیلمدوز کیمدی بولار؟ پاکدی اصل و نسبی
گؤرموسوز سینه لرینده آلیشان تاب و تبی؟
سیز منیم عترتیمون حرمتینی ساخلامادوز
باغلادوز قوللارین اما یاراسین باغلامادوز
.
#کوفه
#گلون_ای_اهل_ولا_زینبی_کامل_تانیاق
#معروف_اهری
#ترکی
.
✍️ #زبدةالاشعار ✍️
?: @nohe_torki
نظر دهید