کوچ از قتلگاه
.
.
.
مرحوم عامل سرابی
.
.
«نه وار هوای بهاریم نه رغبتیم چمنه»
« مریض عشق حسینم حسیندن دئ منه»
.
« نه گلشنه گیدرم نه سیاحت چمنه »
« نظاره ایتمگه بسدور کتاب روضه منه »
.
گلون ویراخ ال اله تز چیخاخ بو گلشندن
اوزیمیزی یتراخ بلکه بیر خیابانه
.
مگربو گلشن او یعقوبه بیت الاحزاندور
و یا که یوسفی بوردا سالوبلا زندانه
.
ندن بو گلشن آرا منجنیق ظلمیله
آتوب خلیلینی نمرود نار سوزانه
.
کلیمه ده نه عصا قالدى نه ید بیضا
ذبیح حق گلوب آغلار بو تشنه قربانه
.
گیرنده گلشنه گوردوله گل آغاجندا
نه گل قالوب نه بوداق باغبان باتوب قانه
.
گُل حسینی کیمی واژگون اولوب بیر نعش
هنوز آخار قانی هم غرق اولوب قیزیل قانه
.
تاپوبدی زینب بیچاره چون او نعشی گوروب
کسوبله باشینی جسمین سالوبلا میدانه
.
سویوبدی دشمن عبا و قبا و پیرهنین
کفن اولوب خس و خاشاک او جسم عریانه
.
ایدوبدی سینه سینی خورد خورد سمّ ستور
یاراسی گلموری چون نجم آسمان سانه
.
نه باش قالوب بدن اوسته نه جسمیده جامه
که بیر نشانه سی معروف اولا او نالانه
.
دیدی حسین سنی من نه نشانیله تانییوم
بو جسمده نه علامت قالوب نه نشانه
.
خیال ایدوب بو منیم قارداشیم حسین اولسا
باخوم الینده کی انگشتر سلیمانه
.
باخوب الینه گوروب یوخدی خوردا بارماقی
آپارمش آهرمن انگشتریله تالانه
.
دوباره باخدی نه گوردی که بیر الی یوخدور
همان الیکه بیلکدن ویروب شتربانه
.
نقدر باخدی که بیرجه نشانه سین تاپسون
تاپانمادی بیر اثر چوخ دولاندی هر یانه
.
چکوب فغان یارالاندیم دیدی که ای یارالی
تانوت اوزون منه سن سن گوروم حسین یا نه؟
.
او قدر یوخدی باجوندان هنوز اوزاخ دوشه لی
بو قدر یاره نه تیز کیم یتوردی بو جانه
.
حسین بو حاله سنی سالدی هانسی کافرلر
دچاریدون نچه بی رحم نامسلمانه
.
اگر منیم آنام اوغلی حسین سن قارداش
جواب ویر منه قویما منی یانا یانه
.
کسوبله باشون، الون، بارماقون بو اولمادی بس
نه چون سویوبدولا نعشون سالوبلا میدانه
.
سن ایله غرقه بخون من غریق غم نیلوم
الیم آچوخ دگی نعشون چکوم که بیریانه
.
اوزوم اسیر، قولوم باغلى، وحشتیم آرتوخ
ترحّم ایتگله سس وئر من هراسانه
.
ایدوبدی نعش حسین قان ایچینده بیر حرکت
گویون ملکلری گلدی تماماً افغانه
.
او باشسیز بدن ایله دوروب بیر اگلشدی
گلوب کَسوک بوغازیندان بو سس او نالانه
.
گل ای ایوی ییخیلان بینوا باجی زینب
تحمل ایله منیم تک قضای یزدانه
.
منیم کسیلدی باشیم قویمارام سیزی باشسیز
کسوک باشیم سیزیلن واردی گیتسز هر یانه
.
گتورمه قلبووه اصلا اسیریلق غمینی
ولی اسیر اولی مملوکینه نه حاشا نه
.
اوزوم یوخام که یریمده اوزوم تک اوغلوم وار
اودور نظام ویرن امر کون و امکانه
.
دوتوم سویولموسوز اما سیزی گورنمز عدو
نه درک ایدر گونی هر چشم کور کورانه
.
سیزیله شامه کیمی هر صباح و شام وارام
اورا کیمی که مقاموز اولنجا ویرانه
.
بو یولدا یولداشی یولداشلا تک قویوب گیتمه
نه بیر قدم دالی قال دوز جفای عدوانه
.
گوتورمه گوز اولوم آغلار گوزیوه من قربان
دوزونجه عترتیمی بیر ایپه چو دوردانه
.
عیالیمون گوزینه قانلو گوزلریم باخاجاق
چکنده سیزلری بزمینه ابن مرجانه
.
یزید بزمینه گلّم سیزیله باش به باش
منیم باشمدا دی هر ظلم بی حسابانه
.
کسوک باشیمی قویار طشته تخت ایاقینده
یزید او گون اوتورار تختیده امیرانه
.
نه نوعی بس دوزه جاقسان او بزم شربده سن
یزید چوب ویراندا بو لعل دندانه
.
اولورسان اوندادا مندن صورا خرابه نشین
اولور خرابه سنه بیرجه پارچا غمخانه
.
خرابه ده دی او قدری سکینمه لای لای
گلینجه خوابینه من قویما گلسون افغانه
.
اودم یوخوسونا گلّم دیوم آپارماقینه
ریاضتون یتهجاقدور او یرده پایانه
.
توک اشک آلیوی چون لعل گوهر ای «عامل»
که سیم و زرله اولور گنج، کُنج ویرانه
.
.
#کوچ_کربلا #عامل_سرابی
#نه_وار_هوای_بهاریم_نه_رغبتیم_چمنه
#گلون_ویراخ_ال_اله_تز_چیخاخ_بو_گلشندن
#ترکی
#زبدةالاشعار
نظر دهید