شهادت حضرت علی اصغر (ع)
.
✍️ #زبدةالاشعار ✍️
.
🆔: @nohe_torki
.
مرحوم عاصی تبریزی
.
گل باجی فغانه سینه داغلا
اوخلاندی الیمده اصغریم گل
هم اصغره هم حسینه آغلا
واردور بیر اسفلی منظریم گل
.
.
گلموردی یوزوم گلم خیامه
گوردوم آناسی باخور اوتاندیم
میدانی بالام الیمده زینب
بیر قدر ساقا صولا دولاندیم
گه قانلی جنازه لر یانندا
گه پشت خیمه ده دالدالاندیم
آخرده بو سوز قلبیمیله بو
گوز یاشیم اولدی رهبریم گل
.
.
آهسته بالامی آل الیمدن
باجی هله سسلمه آناسین
سیل یوز گوزونون قانین آناسی
گلسه بئله گورمسون بالاسین
انجتمه چوخ اینجیوب یاتوبدی
لای لای دئنه باغلا اوخ یاراسین
ای غصه و درد و غم شریکی
محنتلی گونیمده یاوریم گل
.
.
بو قانلی جنازه سی بالامون
قویما بو قدر الیمده قالسون
گل آل ویر آناسنا ، دئ باجی
گهوارسینه یواشجه سالسون
وار هر نه باشی قرالی یاسلی
گهواره سنون کنارین آلسون
آچسون باشینی ساچینی یولسون
دوتسونلا عزا حرملریم گل
.
.
دیلدن باجی دوتموشام شراره
غم آتشی قلبیمی یاخاندا
الله بولوری نه چکمیشم من
حلقندن اوخی چکوب باخاندا
دشمنلریم ایلیوب شماتت
من صورته قاننی یاخاندا
علت او دور عارضیمه بئله
قانیاش توکوری بو گوزلریم گل
.
.
اوخ دگدی بوغازینا گوز آچدی
باخدی منه بولمورم نه بولدی
یاندوردی منی او باخماقیلا
قان آخدی من آغلادیم او گلدی
یومدی گوزونی دوشوب نفسدن
جان ویردی بالام الیمده ئولدی
از بس بوغازیندان آخدی قانی
قانه بویانوبدی اللریم گل
.
.
خلوت گه یاره یولادیم من
بو گون باجی بیر دولی گلستان
تک تک هاموسی او گللر اولدی
زیبنده بزم راز جانان
گوردوم قالوری او گلستاندان
ببر غنچه گولوم منیم باجی جان
افزایش زیب و زینت اولدی
اول بزمه بو غنچه تریم گل
.
.
تشنه ئیدی بالام ز بس سوسوزلوق
آلمیشدی الیندن اختیارین
سولدورموشدی خزان گلی تک
آثار عطش بو گل عذارین
اوچ شعبه لی تیر رحمه گلدی
گوردی باجی حال احتضارین
قان ویردی بو طفله سو یرینه
قان اولدی دل مکدّریم گل
.
.
دینموردی الیمده یوخلامشدی
اوخ دگدی بوغازینا اویاتدی
گوردی که اوشاقدور آغلیاجاق
لای لای دئدی اوخ دوباره یاتدی
دئ گلسون آناسی ایستمز سو
سو فکرین آتوب مرامه چاتدی
یوخدور صودی چکمسون خجالت
سرمستیدی صودن اصغریم گل
.
.
یاندیم شرر غمه آلشدیم
سو تک بالامون قانی آخاندا
باخدیم صولا ساقه حسرتیله
حسرتله بالام منه باخاندا
دنیا یوزینه او قانی یاخدیم
قانین بالامون یوزه یاخاندا
آثارینی انتقامه ساخلار
گوگلرده خدای داوریم گل
.
.
بو غم ایله حالیمی پوزوبدور
آنلار هامی اهل دل سوزومدن
آخسا یری وار بو گوز یاشیم تک
گر خون جگر ایکی گوزومدن
گل آل ویر آناسینا بالاسین
گلمور باجی جان منیم یوزیمدن
دئ ویرسون او بی کسه تسلی
وار نه هر سیاه معجریم گل
.
.
هر بیر اوشاقی آچاندا سوددن
بو رسمدی ناز ایدر آنایه
اما آناسی بالا یولوندا
صبر ایلر هامی غم و جفایه
نسگلدی بو غم منیم بالامه
اوچ شعبه لی تیر اولوبدی دایه
زحمتله باجی آچلدی صوددن
بو مهجه قلب مضطریم گل
.
.
بیر عمریدی یا حسین «عاصی»
حسرتدی بولورسن اول مزاره
هر شام و سحر اورکدن ایستر
آغلار توکر اشگ تر عذاره
ایسته سنی زینبون بو وقفه
لطف ایلیه بو چشم انتظاره
قویما قالا حسرتیم اورکده
یاز آدینی باری نوکریم گل
.
.
.
.
#اصغریه_عاصی_تبریزی
#اصغریه_شهادت
#گل_باجی_فغانه_سینه_داغلا_اوخلاندی_الیمده_اصغریم_گل
#ترکی
.
✍️ #زبدةالاشعار ✍️
.
🆔: @nohe_torki
نظر دهید