زبانحال حضرت علی اکبر (ع) خطاب به عقاب
.
✍️ #زبدةالاشعار ✍️
.
🆔: @nohe_torki
.
.
مرحوم رجائی تبریزی
.
#سبک_زینبم_جان_اوستیم … 4 سبک
مشابه
.
گل شتاب ائت ای عقاب ال تاپماسون اعدا منه
ایندی یول گوزلور باجیم آغلور آنام لیلا منه
.
.
اختیاریم قالميوب دلدن سالوب یاره منی
جهد ایله میداندا سالما ويرمه اغیاره منی
آخر عمرومده يتور حسرت چکن یاره منی
تا سبیل اشک ائده اول عاشق شیدا منه
.
.
ایستورم جان تاپشوران ساعت آنام حاضر اولا
باجیلار باشین آچا اشکین توکه زلفين يولا
حالیمه باخدوقجا عمّه م ابر نیسان تک دولا
سو ويره گوز کاسه سینده زینب کبری منه
.
.
هر گلن یاره ويروبدور گلشن جسمیم سولوب
پیکریم اوخ نیزه و خنجر یاراسیله دولوب
باش آچوب ایمدی حرملر خیمه ده زلفون یولوب
ایلیوب آلِ عبا بزم عزا بر پا منه
.
.
سن بلورسن نوجوانم دويميوب مندن آنام
من آنامون فرقتون ممکن دگل آسان سانام
قويما بو آخر نفسده نار هجرانه یانام
یاره دن چوخ آیرولوخ دردی ایدر ایذا منه
.
.
من آنامدان آیرلاندا محشر اولدی بر ملا
آز قالوردی خیمه ده روحی بدندن آیریلا
تسلیت ویردیم دئدیم جانیم سنه قربان اولا
آغلاما رخصت ویروبدور خسرو بطحا منه
.
.
وئرمشم وعده آنامدان اذن میدان آلمشام
منتظردور خیمه ده بلمور بو حاله قالمشام
بیرده گورسیدیم اله لیلا وصالین سالمشام
روضۀ رضوان اولاردی عرصۀ دنيا منه
.
.
درد و محنتدن آنام تا عمری وار دینجلمدی
صرف ائدوب عمرين منه بیر استراحت بیلمدی
ایمدی آغلور عرض ایدور یارب جوانیم گلمدی
منتظر دور خیمه لرده اول ملک سيما منه
.
.
نیزه و خنجر یاراسی قویمیوب دور منده تاب
بیر طرفدن آیریلوق دردی ویرور رنج و عذاب
بو على وای سسلین خوردا باجیم دور ای عقاب
آغلاشور باهم اونيله عترت طاها منه
.
.
قان آخوب زخم سریمدن پوزدی رنگ آلیمی
ایستورم جان وئرمه میش گورسون سکینه حالیمی
نامه ده یازسون باجیم صغرایه بو احوالیمی
بیر مؤثّر نامه يازمیشدی باجیم صغرا منه
.
.
نامه ده یازموشدی فکر وصلويله دلخوشام
گوزلریم یولدا قالوب گوزلور سنی هر صبح و شام
چوخ يوبانما تیز قئییت قارداش بُلورسن ناخوشام
خوش دگل سن سیز على دنیا و مافيها منه
.
.
ایندی ناخوشدور باجیم آغلور منه شام و سحر
حیف اولا قالدی اوزاقدا اولدی مندن بی خبر
بستر غمده یاتوب گوزلور علی اکبر گلر
بلموری نه ظلم ایدوب بو فرقۀ ادنا منه
.
.
سر بلندم آل هاشمدن قیتل اوّلم
دین اسلامون يولوندا افتخاریمدور ئولم
شایقم اما گئدم بیر لیلینون حالين بُلم
گر نصیب ائتسه بو امری خالق یکتا منه
.
.
شكر لِلَّه من شهادت فیضینی سالدیم اله
آرزومه نایل اولدوم گلدی مقصد حاصله
حسرتیم واردور اورکده حالیمی لیلا بوله
محضرینده جان وئرم اولسون الوم اصلا منه
.
.
بولدى مركب آل طاها گوزلری یول خیمده
ایستدی اوز راكبين بلکه يتورسون مقصده
باری جان ویرسون آناسی خدمتینده کولگده
آنلادی راكب بو امره ایلوری ایما منه
.
.
دوشدی بو فكره يتورسون راکبی بیر مأمنه
واریری زهرا خانم گلسون بو غمده شیونه
نه على مقصودینه یتدی نه ليلا وای منه
بو مصیبتدن اولور هر لحضه عاشورا منه
.
.
اود دوتا واردور یری بو مطلبه قلبون یانا
بسکه قان آخدی یاراسندان ایدوب تاثیر اونا
ضعف گلدی قوللارین سالدى عقابین بوینونا
ایش هارا منجر اولوب دور آه و واویلا منه
.
.
هر گورن بو محنتی فکر ایلمه آسان سانوب
دوشدی یول صفلر آراسندان گورن دشمن یانوب
بو عبارت وار خبرده قطعه قطعه دوغرانوب
الده مدرک اِرباً اِربا بس دگل آیا منه
.
.
قلبيمه دوشدی شرر بو یرده بو عنوانيدن
ناگهان بیر سس اوجالدی عرصۀ میدانیدن
نصرت ایستور گوردولر او حالیده سلطانیدن
سسلنور گل تنگ اولوبدور عرصۀ هيجا منه
.
.
گل بابا جسمیمده یاره چشمه چشمه قان ویرور
اكبرون اوز دینینه صدقیله جان قربان ویرور
چکمه غم اوغلوم على لب تشنه عطشان جان ویرور
ایلوری جدّیم سو جامی الده سو اعطا منه
.
.
هارداسان گل دادیمه ای خسرو عالی مقام
گل اؤزون قويما منی دشمن ایچینده تک قالام
اولمادی ممکن گلم ليلایه مندن ويرسلام
بیر «رجائیله» اوز عمرین صرف ایدوب شاها منه
.
.
#اکبریه_شهادت
#گل_شتاب_ائت_ای_عقاب_ال_تاپماسون_اعدا_منه
#ترکی
.
✍️ #زبدةالاشعار ✍️
.
🆔: @nohe_torki
نظر دهید