استمداد حضرت ابوالفضل (ع)
.
✍️ #زبدةالاشعار ✍️
.
🆔: @nohe_torki
.
#سبک_ای_باد_صبا … 7 سبک
.
غلامعلی آذری
.
گل قالدیم حسین داشیله پیکان آراسیندا
قول دوشدی علم یاتدی بیابان آراسیندا
.
.
دوشدوم من آت اوستن کسیلن اللریم اوسته
اوخ نیزه قلج شهپر آچوب پیکریم اوسته
اون یئتدی شقی کشمکش ائیلیر سریم اوسته
قالماز بیری من تک بیله طوفان آراسیندا
.
.
سن آغلا منه منده سنین حالیوه قارداش
تک قالدی حسین کیم گله جاق دادیوه قارداش
خاتم یئری وار آغلییا اطفالیوه قارداش
اونلار قالاجاق رحمیسیز عدوان آراسیندا
.
.
دوزدور بدنیمده یارانین یوخدی شماری
آمما یارییا آغلامیرام آند اولا تاری
من سندن اوتور ائیله ییرم آهیله زاری
یالقوزلادی دشمن سنی میدان آراسیندا
.
.
آگه سن ئوزین دوزدی سوزوم ای شه عطشان
عشقینده منی یاندورالار ائتمرم افغان
فخریمدی که ائتدیم جانیمی جانیوه قربان
آرزوم بوئیدی جانیله جانان آراسیندا
.
.
باشیم کسیله چوخ تله سیر دشمن خونخوار
آمما که سنه بو سوزی من ائلیرم اظهار
تأخیر ایله سن گیدی باشیم ای شه ابرار
فریادیمه گل قویما منی قان آراسیندا
.
.
دشمن چالشیر پیکریمی توپراقا قاتسین
صاف یئر تاپا بیلمیر اوخ آتان مطلبه چاتسین
زینب یئری وار ناله سینی عرشه اوجاتسین
قالدی بدنیم خار مغیلان آراسیندا
.
.
جسمیم بیلیرم بنزیری بیرگلشنه قارداش
جان اوسته دی عباس یئتشیر ایمنه قارداش
صبر ائیله منه آغلا باجیم زینبه قارداش
من ئولدیم اولار قالدیلا کُفران آراسیندا
.
.
باش که یارالاندی قانی آخدی گوزوم اوسته
چون اَل یوخیدی دوشدوم آت اوستن اوزوم اوسته
قالسیدی سویوم من سورونردیم دیزیم اوسته
قویمازدیم اوشاقلار قالا عطشان آراسیندا
.
.
تا سو واریدی اوخلاری ائیلیردیم اجابت
فکریم سویودی یاره لر اتئمیردی اذیّت
اوخ مشگیمه که دگدی منی ایتدی خجالت
حسّ ایله دیم اوندا یارانی جان آراسیندا
.
.
درک ائیله منی جسمیم اولوب شان شان حسین جان
گل آل دیزین اوسته باشیمی ای شه عطشان
قوللاریوی سال بوینیما تا جان وئریم آسان
چیخسین بو جانیم سینۀ سوزان آراسیندا
.
.
سایسیز سینوه دگدی بو گون یاره برادر
اکبر یاراسی قلبیوی یاندوردی سراسر
احوالیوا عالم یئری وار آغلاسا یکسر
تک قالدین اخا بیر بیله دونان آراسیندا
..
غم غصّه آقا هر بشره داغدان آغیردی
بو «آذری» نین باشینه قیرخایلدی یاغیردی
علت اودیکه قولسوز علمداری چاغیردی
گل چاره ایله قویما پریشان آراسیندا
.
#عباسیه_غلامعلی_آذری
#عباسیه_شهادت
#گل_قالدیم_حسین_داشیله_پیکان_آراسیندا
#ترکی
.
✍️ #زبدةالاشعار ✍️
.
🆔: @nohe_torki
نظر دهید