گوروم خراب اولاسان روزگار دون پرور #راه_شام_رجایی_تبریزی

حالات راه شام و ورود به شام
.
.
مرحوم سید حسین رجایی تبریزی
.
.
گوروم خراب اولاسان روزگار دون پرور
که قویمادون قالا آسوده آل پیغمبر
.
ولایت اهلنی سِیرونده دل کباب ایلدون
پیغمبر عترتین ئولدورماقا شتاب ایلدون
.
اولوبدی جور و جفاده زبسکه طغیانون
سنون الونده دونوب قانه قلبی زهرانون
.
بالالارین ایلدون بیر به بیر جلای وطن
اولوبدی هر بیری بیر یاندا ابتلای محن
.
ایدوبله بعضیسنی زهر کینله مسموم
قالوبدی بعضیسی غربتده بی کس و مهموم
.
اولولّا بعضینه شهر مدینهده پابوس
دیولّه بعضینه مدفندی ارض اقدس طوس
.
قالوبدی حبسده بیر عدّه سی اولوب دلگیر
ووربلا ظلمله بعضیسنه غُل و زنجیر
.
دوشوبدی بعضیسنون قبری شهر بغداده
سالولّا اوردا او زندان غریبنی یاده
.
ووروبلا بعضنه زخم سیف و تیر و سِنان
کسوبله بعضیسنون باشنی سوسوز دالیدان
.
بنای عدلی فلک ظلمله خراب ایلدون
اوتانمادون بو قَدَر ظلم بی حساب ایلدون
.
او ظلملر که ایدوب سِیرون آل طاهایه
چکوبدی نظمنی دعبل خطاب، زهرایه
.
دیر خانم گوزون آچ قبردن گوتور بیر باش
ئوولیدون ایمیدی گوریدون بالالارون ایکاش
.
ویروبله هر بیرینه بیر دیارده مدفن
نه شرم ایدوبله خدادن نه بیر پیمبردن
.
ائمّه جمله سی مظلوم اولوبدی دنیاده
ولیک هیچ بیری یتمز امام سجّاده
.
اگر چه شهرت مظلوم اولوب حسین آدینا
غریب ئولَنده دوشر هامّونون حسین یادینا
.
ایدنده مطلبه دقّت بیله اولور مفهوم
اولوبدی سیّد سجاد هامّودان مظلوم
.
ایدوبله هانسی امامی بو پایه ده دلگیر
اسیر ایدوب وورالار بوینونا آغور زنجیر
.
علیلیدی اوتورانموردی ناقه اوستونده
گوروب او حالی ووروبلا ایاقنا کُنده
.
گهی چکوبله قولی باغلی دیر ترسایه
ویروبله حبسده منزل گهی او مولایه
.
ووروبلا نِیلره اود توکدولر گهی باشنا
اورک دونوب قانا ممزوج اولوبدی گوز یاشنا
.
ایدوبله عمّهلرین دستگیر اهل جفا
چکوبله مجلس شرب و قماره بی پروا
.
گورون، نقدر چتین دور امامه بو مطلب
که بزم عامه گیده عمّه سی خانم زینب
.
ز بسکه ایتدی او مظلومه شامیان بیداد
چکردی عمریجه شام اهلنون اَلیندن داد
.
او گون که اولدی مشرّف حضورینه نعمان
سؤال قیلدی که ای شهریار کُون و مَکان
.
بو قَدْر جور و جفا گورموسن بو دنیاده
بویور گوروم سنه هانسی چتیندی معناده
.
پوزولدی حالی توکوب گوز یاشین عذاره امام
یانیقلی قلبله اوچ دفعه سویلدی اَلشّام
.
بویوردی شام و سحر گوزده شام جلوه لنور
سرشک دیده یوزه اختیار سیز اَلَنور
.
یازاندا بو سوزی اَلده سیزیلدادی خامه
دِیَنمورم نجه او دوتدی یاندی عمامه
.
قلم نَقَدْر یازا شامیان جفاسندن
یازیلمیوب اولارون یوزده بیر خطاسندن
.
ویروبله هر باشی بیر بیحیا شقی اََلینه
سالوبدی نیزه ده بیر محملون مقابلینه
.
اولِیدی کاش جهان تیره چون شب یلدا
که گورمیِیدی اوغول باشنی خانم لیلا
.
اوغول باشین نه روا دور که نیزیه وورالار
او باش دالینجا آناسین سالوب دولاندیرالار
.
آنا بالایه باخوب آغلیه او حالیله
دولانا کوچه و بازاری بو ملالیه
.
او شامون اهلی نجه بیحیا جماعتیدی
اولاردا بو نه جسارت بو نه عداوتیدی
.
او گیر و دارده انصاف دور که آت چاپالار
دوشر نه حاله اوغولسوز آنا، یتیم بالالار
.
نجه دیوم نیه شام اولمادی او گون ویران
اوزون بو مطلبه قان آغلا یا امام زمان
.
او باشلاری گوتورنلرده بیر عداوته باخ
آت اوینادوردولا یابن الحسن جسارته باخ
.
نه ظلم اولوب دیماخ اولماز صریح و بیپروا
اوجالدی گویلره فریاد وآه و واویلا
.
بو یاخشی دور چَکَلَه بعضی مطلبه پرده
اگر چه پرده چکن وقته سوز قالور یرده
.
صریح یازماقا شرم ایلورم پیمبردن
اوخولّا مطلبی ارباب معرفت بَردن
.
آت اوینادانادا کسوک باش نجه جِداده قالار
بولَنْمَرم که نه احواله قالدیلار آنالار
.
اولِیدی کاش او گون شامده آنان زهرا
دوشوب گورِیدی نه احواله زینب کبرا
.
گلیدی شامه باخِیدی او شور و غوغایه
قویاندا قیزلارینی معرض تماشایه
.
گلوب گورِیدی علی قیزلاری حیاسندن
باشین سالوب اَشاقا شامیان جفاسندن
.
گَلِیدی شامه باخِیدی او نیزه دارلره
باسِیدی باغرینا اکبر باشی دوشنده یره
.
گلِیدی شامه چکِیدی او حاله واویلا
دیِیدی یوم گوزوی باخما اکبره لیلا
.
گلیدی شامه عروسین باخیدی گوز یاشینا
چکیدی پرده جدا اوسته قاسمون باشینا
.
گلِیدی شامه قویِیدی ایکی اَلین بِلینه
دیِیدی دیل یاراسی وورمیون تازا گلینه
.
گلِیدی شامه مخاطب ایدِیدی اشراری
دیِیدی اصغره رحم ایلیون سیزی تاری
.
اوشاقدا بیر بیله جور و جفایه اولماز تاب
اَماندی اوز اوزونی ئولدورور آناسی رباب
.
جهاندا ظلم اولی دوز دور ولی بو پایه ده یوخ
بو شیرخواریه بس دور بیچوب بوغازینی اوخ
.
باخور آناسی او باشه دیور بالام ای وای
ویرون قوجاقنه بیرده دیسون علی لای لای
.
بولَنْمَرم ندی مطلب اَیا امام زمان
سبب ندور که او گون شامه گلمه موشیدی آنان؟
.
گلِیدی شامه سالِیدی پیمبری یانینا
عجوزه اوغولونی الوان ایدنده اوز قانینا
.
دیِیدی اوغلومونان نه عداوتون واردی؟
او باشه داش وورسان نه شقاوتون واردی؟
.
گلن ورور بونا بیر زخم تازه قان آخوری
اوتان حیا ایله ظالم بالالاری باخوری
.
گلِیدی شامه ایدِیدی او کوچه لرده گذر
حسین باشندان آخان قانه بیر سالِیدی نظر
.
گلِیدی شامه ویرِیدی اجازه گوز یاشنا
دیِیدی زینیه باخما قیزیم جِدا باشنا
.
گلوب دیِیدی حسینیم آناوی یاندورما
اوغول بیله نگران گوزلرون دولاندورما
.
بیله گوزون یاشنی توکمه بو نه حالت دور؟
بالالارون هاموسی بیر به بیر سلامت دور
.
باخور سنه توکور اشکین مه مدینه قیزون
اوغول باشون دالیسیجا گلور سکینه قیزون
.
اَیا پیمبر رحمت اَیا رسول خدا
ندندی گلمدی شامه او گون قیزون زهرا؟
.
گلِیدی شامه دوتِیدی ئولنلرون یاسین
دیِیدی نیله موسوز باشین اوغلوم عبّاسین
.
تاپوب او باشه باخوب سویلِیِیدی جان بالا وای
دیِیدی هاردادی امّ بنین آنان بالا وای
.
خلاصه شام جفاسی یتیشمز اِتمامه
او دور که دوندی امامون ایشق گونی شامه
.
گورور اسیریدی قول باغلی بانوان حرم
کسوبدی رهگذری دسته دسته نامحرم
.
عبث دگول که تمنّا ایدوب بو لفظی امام
بویوردی کاش منی دوغمِیِیدی ازّل آنام
.
یزید قلبیمی ظلم آتشیله یاندوردی
بو شهرده منی قولّار کیمی دولاندوردی
.
تصوّر ایلموری اهل بیت اطهاروخ
نه نوع آندوروری خلقه بیز گنهکاروخ
.
نَقَدْر آغلاسا گوز آزدی بو معمّایه
گینه ایشق گونوزوم دوندی لیل یلدایه
.
بولنمورم بو نه سوزدی یازولّا اهل کلام
بویوردی شامده «یالَیْتَ ئومّی لَمْ تَلِدْنی» امام
.
یازولّا بو سوزه بیر آیری علّت اهل عقول
دیولّه مطلبه بعضی دلایل معقول
.
بو مطلبی دیدی بیر دفعه والد ماجد
بولولّه جمله اونی شرط نّیر واجد
.
دیدی ساتاشدی گوزوی اوغلی باقره ناگاه
دولوب ملالیله قلبی چکوب جگردن آه
.
بیله حیاتدن البتّه حقّی وار اولا سیر
گوروب ووروبلا او طفلون ده بوینونا زنجیر
.
او صبرله ایله بی صبر اولوب ولیّ الله
باخوب بالاسنا بیر چکدی نالۀ جانکاه
.
ز بسکه غصّه لنوب ایتدی آرزوی عدم
تکلّم ایلدی گویا همان کلامی اودم
.
گورون نَقَدْر شقی میش او شامیان شرور
دل پیمبر و زهرانی ایتدیلر رنجور
.
جفائیله حرم آهولرین ایدوب نخجیر
ووروبلا خوردا اوشاقنده بوینونا زنجیر
.
خیاله سالمادیلار وار قباقدا یوم شمار
گلون گوراخ سیزه نیلوبدی بو یتیم بالالار
.
دولاندوروردولا گونلر اوگنده بی پروا
تمام کوچه لری اهل بیتی اهل جفا
.
خانملارا او زمان بیر اشدّ ساعتیدی
سزادی گر دیوله حشردن علامتیدی
.
امام باشی گوروب نیزده او احوالی
خیال ایدوب تاپا تغییر قیزلارون حالی
.
اوحاله ویرماقا تغییر باشلادی قرآن
سسین آلوب دیدی زینب باجون سنه قربان
.
سسون گلنده وجودیم یانور َالولانوری
خدا بولور نجه قلبیم اود دوتور یانوری
.
اوخوردی آیۀ قرآنی مظهر قرآن
هامی بوله که حسین دیننه اولوب قربان
.
او باش دایاندی او دم بیر عجوزه غرفه سنه
تعجّبیله قولاق ویردی بیر قرآن سسِنه
.
زبسکه قلبنی دوتموشدی کفر بیپایه
نه باخدی زینبه نه جدّینه نه زهرایه
.
الینه بیر داش آلوب بولمرم نجه داشیدی
ووروب او باشه خیال ایتمدی حسین باشیدی
.
همان داشون اثریندن آخوب باشندان قان
همان او قانله گل صورتی اولوب الوان
.
گورنده زینب او حالی گلوبدی فریاده
سالوبدی کرب و بلاده دگن داشی یاده
.
.
#راه_شام #رجایی_تبریزی #ورود_شام_رجایی_تبریزی #ورود_شام #ترکی #زبدةالاشعار