زبانحال رقیه (س) در راه شام
.
.
مرحوم تائب تبریزی
.
.
باغ عمرونده گل ناز وفایم باباجان
ایمدی مقهور ید اهل جفایم باباجان
.
ظاهراً دشمن بی شرمه اسیرم مغلول
باطناً بستۀ زنجیر وفایم باباجان
.
بو وفا رشته سی بوینومدا ایله محكمدور
چکه هر یانه همین رشته رضایم باباجان
.
باغلیوب خام خیالیله عدو قولّاریمی
بولموری عشقویله بند بلایم باباجان
.
نینوادن باشون آردینجا دوشوب شوریله
ابو اوزون یوللاری مشغول نوایم باباجان
.
یولون اوستونده یوزونده بو گوزوم آغلامیشام
توکموشم گوز یاشیمی نوحه سرایم باباجان
.
او شفابخش باخیش چشمیله بیماریوه باخ
دل بیماریله محتاج دوایم باباجان
.
ناقه دن گاه وروب سالدی منی دشمنلر
سانمادی دختر شاه شهدایم باباجان
.
پا برهنه او قدر صاق صولا قاچدیم چولده
قابار اولدی ایاقیم آبله پایم باباجان
.
ایله ساعتده یتوب دادیمه عمّم زینب
گوردی صحراده گرفتار بلایم باباجان
.
گوگلومی آلدی محبّتله أؤپوب یوز گوزومی
او بی بیمدن اودی بیحدّ رضایم باباجان
.
مهرباندور منه هرچند که عمّم زینب
گنه تاپشور منی محتاج عطایم باباجان
.
منی یوللاردا بویور سالمیه عمّم گوزدن
گورمیوم قافله دن یولدا جدایم باباجان
.
ئولدوروللر منی یوللاردا گوزیندن سالسا
چون اسیر ستم اهل جفایم باباجان
.
وقت اولا فرصت اولا چوخ دیمه لی دردیم وار
نیلیوم ظلمیله ممنوع ادایم باباجان
.
هم ورورب اینجیدیری شمر ستمکار دنی
هم دیور آغلاما محروم نوایم باباجان
.
بیله ده درد اولی اؤز دردیمه ده آغلامیوم
نیلیوم خسته و رنجور جفایم باباجان
.
عاشقم من سنه بوعُمده گناهیمدی منیم
ره عشقونده بلایایه سزایم باباجان
.
رهنما اولسا باشون یولدا سورونّم دالیجا
گرچه عشق اهلینه بیر راهنمایم باباجان
.
دوتوب آئینۀ رخساریوی یوللاردا غبار
سیلرم چاتسا الیم گردزدایم باباجان
.
نیلیوم چاتمور الیم گرد رُخون پاک ایلیم
اودی یانماقیله مشمول جزایم باباجان
.
بیزه مداح وفاداردی تائب آدینی
یازارام دفتریمه اهل وفایم باباجان
.
.
#راه_شام #تائب_تبریزی #ترکی #زبدةالاشعار
نظر دهید